Luke 15

Guarani 2015 (Ñanderuete Ñe’ẽ Porã 2015)

← Chapter 14 Jump to: Chapter 16 →

1Ha oñembojave ohóvo Hesu rendápe heta impuésto mbyatyhára ha angaipavóra ohendu hag̃ua ichupe.

2Umi fariséo ha umi oporombo’éva Ñanderuete ñe’ẽ oñe’ẽngururu hese he’ívo: Ko kuimba’e kóva oiko angaipavóra apytépe ha okaru avei hendivekuéra.

3Upérõ Hesu omombe’u ichupekuéra ko ñe’ẽ mbojoja kóva ha he’i:

4Mba’eichagua kuimba’épa pende apytépe oguereko ramo 100 ovecha ha okañy ramo peteĩ ovecha ijatýgui, ndohejaichéne ñúme umi 99 oheka hag̃ua pe okañyva’ekuépe ojohu peve.

5Ha ojohúvo ichupe ohupi vy’apópe ijati’y ári.

6Ha og̃uahẽvo hógape ombyaty iñirũnguéra ha hóga ypy peguápe, he’ívo ichupekuéra: Pevy’a chendive, ajohu haguére che ovecha okañyva’ekuépe.

7Che voi ha’e peẽme, ovy’aveva’erã yvagayguakuéra peteĩ angaipavóra ojevy ramo Ñanderuete rendápe, umi 99-gui, he’íva ijehe noikotevẽiva perdon rehe, heko iporãgui.

8Térã moõpa oĩ peteĩ kuña oguerekóva 10 pláta pehẽnguemi, ha okañy ramo ichugui peteĩpa, nomyendyichénepa hataindy oitypei hag̃ua hóga ha oheka kyre’ỹme ojohu peve pe okañyva’ekue ichugui.

9Ha ojohúvo ombyaty iñirũnguéra ha hóga ypy peguávape ha he’i ichupekuéra: Pevy’a chendive ajohu haguére che pláta pehẽnguemi okañyva’ekue chehegui.

10Che voi ha’e peẽme, oikoha vy’aguasu Ñanderuete angelkuéra apytépe peteĩ angaipavóra ojevy ramo Ñanderuete rendápe.

11Hesu omombe’u ambue ñe’ẽ he’ívo: Peteĩ kuimba’e ita’ýra mokõiva.

12Ha upe imitãvéva he’i itúvape: Che ru, eme’ẽna chéve opaite ne mba’e rerekóvagui che mba’erãva, upérõ itúva omboja’o imba’eita ita’yrakuéra apytépe.

13Ndahi’aréi ko ita’ýra imitãvéva ombyatypa oñeme’ẽmava’ekue ichupe ha oho mombyry tetã ambuépe, ha upépe oiporu vaipa oguerekóva guive iñirũ pyahu ndive, kuña heko vaíva ndive ifarrahakuérape.

14Ohundipa riréma upe oguerekóva guive, og̃uahẽ upe tetãme ñembyahýi ndetuicháva, ha pe karia’y oñepyrũ ohasa asy ha iñembyahýi.

15Ha ha’e oho ojeko hag̃ua peteĩ upe tetãygua rehe, ha ha’e omondo ichupe iñúme oñangareko hag̃ua hymba kurekuéra rehe.

16Ha omyenyhẽse hye pe kure rembi’úgui, pe algarrobo’akuéra reheve, ha avave nome’ẽi ichupe hembi’urã.

17Upémaramo oñeñandu vaiete jave ha’e he’i: Mboy tembiguái piko oĩ che ru rógape hembypáva ichupekuéra ho’u hag̃ua, ha che katu amanóta ko’ápe ñembyahýigui.

18Apu’ãta aha che ru rendápe, ha ha’éta ichupe: Che ru tuicha ajavy Ñanderuete ndive ha nendive avei.

19Ndaijavéima chéve aiko hag̃ua nde ra’y ramo, ejapónte chehegui peteĩ ne rembiguái ramo.

20Upérõ pe karia’y opu’ã ha oho itúva rendápe. Ha mombyry guive itúva ohechávo ichupe, ipy’a oiporiahuvereko ha ñaniháme oho oñañu’ã ha ohetũ hag̃ua ita’ýrape.

21Upérõ pe karia’y he’i itúvape: Che ru, tuicha che ajavy Ñanderuete ndive ha nendive avei, ndaijavéima chéve aiko hag̃ua nde ra’y ramo.

22Itúva katu he’i hembiguáipe: Pya’e penohẽ ao iporãvéva ha pemonde hese, ha pemoĩ kuãirũ ikuãre ha sapatu ipýre,

23ha pegueru pe vaka ra’y ikyravéva ha pejuka, ja’u ha javy’apa joa hag̃ua.

24Ko che ra’y kóva ningo omanomava’ekue, ha péina oikove jevy, okañyva’ekue ha péina ojejohu jevy, ha oñepyrũ ovy’a joa hikuái.

25Pe túva ra’y itujavéva katu ningo upejave oĩhína kokuépe, ojevývo ha og̃uahẽmbotávo hógape, ohendu pe mbaraka pu ha ohecha umi ojerokýva.

26Ha ohenói peteĩ tembiguáipe ha oporandu ichupe mba’épa upe oikóva.

27Ha pe tembiguái he’i ichupe: Nde ryvy ningo ou jey, ha nde ru ojukauka pe vaka ra’y ikyráva, hesãire oúvo ha’e.

28Upevove ha’e ipochyete ha ndoikeséi hógape, upévare itúva oho hendápe ha ojerure asy ichupe oike hag̃ua.

29Ha’e ombohovái ichupe: Che ningo amba’apo’aína heta áñoma ndéve g̃uarã ha araka’eve ndaja’yveréi nendive, ajapo uvei hekópe opaite mba’e nde ereva’ekue guive chéve, ha araka’eve nde nereme’ẽi chéve peteĩ kavara ra’yrusu jepe avy’a hag̃ua che irũnguéra ndive.

30Ha og̃uahẽvo katu ko nde ra’y ohundipava’ekue imba’eita kuña reko vaikuéra ndive, rejukauka ichupe g̃uarã pe vaka ra’y ikyravéva.

31Itúva ombohovái ichupe: Che ra’y, nde ningo tapia reikoreína chendive ha opaite mba’e che arekóva ningo ne mba’e voi.

32Ko’ág̃a ningo javy’a ha ñanderoryva’erã, ko nde ryvy kóva ningo omanomava’ekue, ha péina oikove jeýma, okañyva’ekue ha péina ojejohu jey ichupe.

← Chapter 14 Jump to: Chapter 16 →