1 Chronicles 11

Gussi (EBIBILIA ENCHENU) 2020

← Chapter 10 Jump to: Chapter 12 →

1Erio Abaisraeli bonsi bagasangerereka ase Daudi agwo Heburoni bakamotebia, “Naama! Intwe nigo tore abamo naye, aba amanyinga ayamo, na omobere oyomo.

2Ase engaki yaetire, nonya nekero Saulo arenge omoruoti, naye kwarenge gotang’ana Abaisraeli kobaare korwana esegi naende kobakoirana. Na Omonene, Nyasae oo, akagotebia ng’a naye orabe omorisia bw’Abaisraeli, abanto baye, na koba omogambi igoro yabo.”

3Nabo abagaaka bonsi b’Abaisraeli bagacha ase omoruoti agwo Heburoni; na aroro Daudi agakora okobwatana kw’ogotianania nabarabwo ase obosio bw’Omonene, na barabwo bagaaka Daudi amaguta akaba omoruoti igoro ase Abaisraeli, koreng’ana ne ring’ana riria Omonene akwanete goetera ase Samweli.

4Daudi amo n’Abaisraeli bonsi bakagenda Yerusalemu, noro Yebusi, ase Abayebusi, abanto b’ense eria, barenge.

5Abanto ba Yebusi bakamotebia, “Aye tokonyara gocha aiga nonya ng’ake.” Korende nonya naboigo, Daudi akabua eburi ya Sayoni, oyio noro Omochie o Daudi.

6Daudi konya otebire, “Omonto onde bwensi orabe oyo bwe ritang’ani goita abanto ba Yebusi, ere oyio nabe omochiki omonene bw’abarwani.” Yoabu, omomura bw’omokungu Seruya, akaba oyo bwe ritang’ani kogenda aroro; ase ayio ere akaba omochiki.

7Daudi akaba okomenya ase eburi eria enkong’u, ase ayio ekarokwa Omochie o Daudi.

8Erio akaagacha omochie goetanana onsi korwa Milo, okaba egesingo kegima; na Yoabu akaroisia omochie ase konya otagokire.

9Daudi akamenta koba omonene, na koba nokobua, ekiagera Omonene bw’Emeganda nigo arenge amo nere.

10Aba nabwo abanto abanene chituoni ba Daudi, baria bamosiirete bokong’u ase oboruoti bwaye, amo n’Abaisraeli bonsi bakamobeka akaba omoruoti, koreng’ana ne ring’ana ri’Omonene igoro y’Abaisraeli.

11Oyo noro omobaro bw’abanto chituoni ba Daudi: Ritang’ani Yasobeamu korwa Hakimoni. Ere nigo arenge omonene bwa baria Batato. Ere akarwania abanto amagana atato ne ritimo riaye akabaita ase engaki eyemo.

12Na oyo o kabere bw’abwo Batato n’Eleazari, mosinto o Dodo, Omoahohi.

13Ere nigo arenge amo na Daudi agwo Pasi‐Damimu ekero Abafilisti basangererekanete amo, barwane esegi aase omogondo bw’esairi orenge. Ekero abanto batamete korwa ase Abafilisti,

14Eleazari agatenena gati gati y’omogondo oria, akaba omokong’u akayoegera, agaaka Abafilisti, akabaita. Omonene akabaa obobui obonene.

15Rituko erimo abanto batato ba baria abanene emerongo etato bagatirimboka gochia ase egetare, bakagenda ase Daudi agwo ase rikuruma ri’Adulamu, ekero abarwani esegi b’Abafilisti batoorete ase ense omweya y’Abarefai.

16Ase engaki eria Daudi nigo arenge ime ase eburi, na abarwani esegi b’Abafilisti nigo barenge Bethlehemu.

17Daudi akabora ase okogania okonene, “Ntare konyora omonto andetere amache inywe korwa ase ensoko eyio ere ase egeita kia Bethlehemu?”

18Erio abanto baria Batato bakabinya‐binyia egati y’Abafilisti aase batoorete, bakabuucha amache korwa ase ensoko eria yarenge ase egeita kia Bethlehemu, bakayairera Daudi. Korende Daudi tayanywa otatiga ayaumorete akaba okoruegwa gw’ekenyugwa ase Omonene,

19akabora, “Omonene ontange tiyanywa. Aya nigo anga buna nkonywa amanyinga ’abanto bataegerete obogima bwabo ase okorenta amache aya.” Ase ayio akaanga tayanywa. Ayio naro abanto abwo chituoni Batato bakorete.

20Abisai, momura omwabo Yoabu, nigo amanyekanete ase baria Batato; akarwania abanto amagana atato akabaaka ne ritimo riaye, akabaita, na igo akaba nerieta rinene ase egati ya baria Batato.

21Ase baria Batato ere nigo abwate ogosikwa okuya goetania abande, akaba omoraai obo, korende tareng’anetie na baria Batato be ritang’ani.

22Benaya, mosinto o Yehoyada, nigo arenge omonto etuoni korwa ase Kabuseli. Ere agakora emeremo emenene, agaita abanto babere chituoni b’Abamoabu. Engaki ende, ekero ki’obokendu na amagena ’embura yatwete, agasoa engoro agaita endo aroro.

23Naende agaita Omomisiri, omonto orenge nobotambe bw’ekerengo ki’amaboko atano. Omomisiri oria nigo abwate ritimo koboko kwaye, riachomeire orotanga oronene buna omwaro, korende Benaya akamochiera nenyimbo, akamoura ritimo riarenge koboko kwaye, akamoitera ne ritimo riria riaye omonyene.

24Amang’ana aya naro Benaya, mosinto o Yehoyada, akorete. Nigo anyorete erieta rinene ase egati ya baria Batato.

25Nonya osikire kobua baria Emerongo Etato, tareng’anirie na baria Batato. Daudi akamobeka akaba omoteneneri bw’abarendi b’obogima bwaye.

26Abanto chituoni b’abarwani esegi nabwo aba: Asaeli momura omwabo Yoabu, na Elihanani, mosinto o Dodo korwa Bethlehemu.

27Samoti korwa Harodi na Helesi korwa Peleti;

28Ira, mosinto o Ikesi korwa Tekoa, na Abieseri korwa Anatoti;

29Sibekai korwa Husa, na Ilai korwa Ahohi;

30Maharai korwa Netofa, na Heledi, mosinto o Baana korwa Netofa;

31Itai, mosinto o Ribai korwa Gibea o Benjamin, na Benaya korwa Piratoni;

32Hurai korwa ase amakura ang’e na Gaasi, na Abieli korwa Ariba;

33Asimaweti korwa Gahurimu na Eliaba korwa Saalaboni;

34basinto ba Hasemu korwa Gisoni na Yonathani, mosinto o Sagee, korwa Harari;

35Ahiamu, mosinto o Sakari korwa Harari, na Elifali, mosinto o Uri;

36Heferi korwa Mekera na Ahiya korwa Peloni

37Hesero korwa Karimeli, na Naara, mosinto bw’Esibai;

38Yoeli, momura omwabo Nathani, na Mibihari, mosinto o Hagiri.

39Seleki korwa Amoni na Naharai korwa Beroti, omobogoria ebirwanero bia Yoabu, omomura bw’omokungu Seruya;

40Ira na Garebu korwa Itiri;

41Uria Omohiti na Sabadi, mosinto bw’Alai,

42Adina, mosinto o Sisa bw’egesaku kia Reuben, omoraai bw’abanto b’egesaku ekio, na amo nere abanto emerongo etato;

43Hanani, mosinto o Maaka na Yosafati korwa Mitani;

44Usia korwa Asitera; Sama na Yeieli, basinto ba Hotamu korwa Aroeri;

45Yediaeli, mosinto o Simuri, na Yoha, momura omwabo, omonto o Tisi;

46Elieli korwa Mahawa Yeribai na Yosawia, basinto b’Elinamu, na Itima korwa Moabu;

47Elieli, na Obedi, na Yaasieli korwa Soba.

← Chapter 10 Jump to: Chapter 12 →