1 Chronicles 28

Gussi (EBIBILIA ENCHENU) 2020

← Chapter 27 Jump to: Chapter 29 →

1Daudi akarangeria abateneneri bonsi b’Abaisraeli bache Yerusalemu. Ase ayio abateneneri b’ebisaku, na ab’ebiombe biarenge gokorera omoruoti, na abatang’ani b’abarwani esegi chilifu na ab’amagana, na baria batenenerete chinibo chionsi chi’omoruoti ne chiombe chiaye, na echi’abana baye, amo nabateneneri b’enyomba y’omoruoti, na abanto bonsi chituoni, na abwo bonsi barenge abakong’u ase esegi, bagacha aroro.

2Erio omoruoti Daudi agatenena, agakwana, “Inwe baminto na abanto baane, inyigwe. Nigo narengereretie koagacha enyomba ase Esanduku eria ere ne chibao chirikire okobwatana kw’Omonene erabekwe, eyio ere egeteni ki’amagoro ’Omonene, Nyasae oito, nkabeka ebinto ang’e ase okoagacha enyomba eyio.

3Korende Omonene Nyasae agankania, agantebia: Aye tokonyara koagacha enyomba ase engencho y’erieta riane, ekiagera kwarwanire chisegi na gwaiteire amanyinga ’abanto.

4Korende nonya naboigo, Omonene, Nyasae bw’Abaisraeli, aganchora korwa ase enyomba ya tata, akambeka nkaba omoruoti igoro ase Abaisraeli kogenderera botambe. Nigo achorete Abayuda bakaba abaraai, na korwa ase Abayuda agachora enyomba ya tata, na ase egati y’abana baye Omonene akagokigwa nainche, akambeka nkaba omoruoti igoro ase Abaisraeli bonsi.

5Omonene ong’eire abamura abange, na ase abwo bonsi ochorire Sulemani aikaranse ase ekerogo ki’oboruoti ki’Abaisraeli abwo Omonene akogambera.

6“Omonene agakwana agantebia: Sulemani, omomura oo, nere oraagache enyomba yaane ne chiraaro chiane, ekiagera namochorire abe omwana one, na inche nimbe ise.

7Ninkore oboruoti bwaye bobe ne chinguru kare na kare karagenderere bokong’u kobwata na koigwera amachiko aane, na emeroberio yane echikire, buna agokora ase engaki eye.

8“Ase ayio bono aiga ase amasio ’Abaisraeli bonsi bare omosangererekano bw’Omonene, na ase obosio bwa Nyasae oito oyotoigwete, morende mono amachiko onsi ay’Omonene, Nyasae onio, na koyabwatia, erio nario moramenye ase ense eye engiya na koyetigera abana baino, ebe omwando obo kogenderera botambe nyuma yaino.

9“Naye Sulemani, omwana one, omomanye Nyasae one inche iso, naende omokorere nenkoro yao yonsi, na ase ogwancha kwao gwonsi, ekiagera Omonene nigo akorenga chinkoro chionsi, naende nigo amanyete kera omoroberio na ebirengererio bionsi. Koramorigie, ere nanche omonyore; korende onye gokomotiga, ere nigo aragotugute kare na kare.

10Bono bwerende, ekiagera Omonene ogochorire oagache enyomba ebe Obomenyo bwaye Obochenu. Obe omokong’u na okore ayio.”

11Erio Daudi akaa Sulemani, omwana oye, omogwekano bw’enyomba eria enke erabe bosio bwe Hekalu, na oyo bw’ebinyomba bie Hekalu, ne chikungo chie Hekalu, na obw’ebinyomba bia irongo, na ebinyomba bia ime, na obw’akanyomba k’Oboikaranso bw’Amabera.

12Naende akamoa omogwekano bw’ebinto bionsi arengereretie igoro y’okoagacha chiraaro chi’enyomba y’Omonene, na obw’ebinyomba bionsi biraetanane Hekalu biagachwe ase chimonga chi’enyomba ya Nyasae chiragachwe, amo ne chikungo chi’ebiegwa biare gocha gwatananwa bibe ebichenu.

13Boigo akamoa emeroberio y’ebiombe bi’abakuani na Abalawi buna barache gokora emeremo yonsi y’obokoreri bw’enyomba y’Omonene, na obw’ebinto bionsi bi’obokoreri bw’enyomba y’Omonene.

14Akamotebereria igoro y’oborito bwe chitahabu na obwe chifeta chikoroiserigwa kera egekorero kegokorerwa ase Hekalu,

15na oborito bwe chitahabu chi’ebibekerero bie chitaya na echie chitaya chiria, na obwa kera ekebekerero gie chitaya ao ao, na oborito bwe chifeta chia kera ekebekerero gie chitaya, ne chitaya chiria, koreng’ana nemeremo ya kera ekebekerero,

16na oborito bwe chitahabu chia kera emesa y’emegati ekoruegwa ase Nyasae, na obwe chifeta chikoroiserigwa chimesa chie chifeta.

17Akamotebereria igoro ye chigami, ne chisani, na ebitaabo biroisigwe korwa ase chitahabu chichenire na igoro ye chibakuri chie chitahabu, na echie chifeta, na oborito bwa kera eyemo;

18na igoro y’egesasimero ki’ogosambera ubani, keraroisigwe korwa ase etahabu echenire. Akamotebereria boigo igoro y’omoroberio oyo bw’egari y’etahabu nero abakerubi baria baramborete chimbaba chiabo igoro y’Esanduku ere ne chibao chirikire okobwatana kw’Omonene na bayetubete.

19Daudi agatebia Sulemani, “Aya onsi Omonene nigo andikerete nokoboko kwaye, akanyorokereria buna emeremo yonsi egochia gokoreka yare kobwatekana nomogwekano orwetwe.”

20Naende Daudi agatebia Sulemani, omwana oye, “Obe omokong’u, naende omoremu, erio okore ayio. Toiroka, gose tokwa moyo, ekiagera Omonene Nyasae, oyore Nyasae one, nigo are amo naye. Omonene takogotiga obugwe, goika emeremo yonsi y’enyomba yaye eere.

21Rora ebiombe bi’abakuani na Abalawi baria barakore emeremo yonsi y’enyomba ya Nyasae nao bare aa; kera omonto ore nogwancha, naende omanyete emeremo ende yonsi, nabe naye ase emeremo yonsi. Boigo abaraai bonsi amo nabanto bonsi nababe bagokora aya onsi orabachike.”

← Chapter 27 Jump to: Chapter 29 →