1 Chronicles 27

Gussi (EBIBILIA ENCHENU) 2020

← Chapter 26 Jump to: Chapter 28 →

1Oyo noro omoroberio bw’Abaisraeli na abateneneri be chiamate chiabo na obw’abatang’ani b’abarwani esegi chilifu na ab’amagana, na obw’abateneneri b’emeremo ende yonsi ase oboruoti. Kera omotienyi ase omwaka ekeombe ki’abanto chilifu emerongo ebere na inye (24,000), nigo kiarenge gokora emeremo inse y’oboraai bw’omotang’ani bw’omotienyi oyio.

2Yasobeamu, mosinto o Sabidieli, nere otenenerete ekeombe egetang’ani, ase omotienyi bwe ritang’ani; ekeombe kiaye nigo kiarenge nabanto chilifu emerongo ebere na inye (24,000).

3Ere nigo arenge bw’ororeria rwa Peresi, na orenge omochiki bw’abatang’ani bonsi b’abarwani esegi ase omotienyi bwe ritang’ani.

4Dodadi bw’ororeria rw’Ahohi nere otenenerete ekeombe ki’omotienyi o kabere. Ekeombe kiaye nigo kiarenge nabanto chilifu emerongo ebere na inye (24,000). Mikiloti nere orenge omokonyi oye.

5Omoteneneri bw’ekeombe kia gatato, ase omotienyi o gatato, nere Benaya, mosinto o Yehoyada omokuani. Benaya nigo arenge omotang’ani omonene, na ekeombe kiaye nigo kiarenge nabanto chilifu emerongo ebere na inye (24,000).

6Benaya nere orenge omonto etuoni, omanyekanete ase baria Emerongo Etato, naende orenge nomochiki obo. Amisabadi, omomura oye, nere orenge komokonya ase ekeombe ekio.

7Oyo o kane, Asaeli, omomura omwabo Yoabu, akaba omoteneneri bw’ekeombe ki’omotienyi o kane, na Sebadia, omomura oye, akagetenenera nyuma yaye. Ekeombe kiaye nigo kiarenge nabanto chilifu emerongo ebere na inye (24,000).

8Oyo o gatano, Samuti bw’ororeria rwa Isihari akaba omoteneneri bw’ekeombe ki’omotienyi o gatano. Ekeombe kiaye nigo kiarenge nabanto chilifu emerongo ebere na inye (24,000).

9Oyo o gatano na rimo, Ira, mosinto o Ikesi Omotekoa akaba omoteneneri bw’ekeombe ki’omotienyi o gatano na rimo. Ekeombe kiaye nigo kiarenge nabanto chilifu emerongo ebere na inye (24,000).

10Oyo o gatano na kabere, Helesi, Omopeloni bw’ororeria rw’Efraimu, akaba omoteneneri bw’ekeombe ki’omotienyi o gatano na kabere. Ekeombe kiaye nigo kiarenge nabanto chilifu emerongo ebere na inye (24,000).

11Oyo o gatano na gatato, Sibekai bw’ororeria rwa Husa Omozera akaba omoteneneri bw’ekeombe ki’omotienyi o gatano na gatato. Ekeombe kiaye nigo kiarenge nabanto chilifu emerongo ebere na inye (24,000).

12Oyo o kianda, Abieseri korwa Anatoti bw’ororeria rwa Benjamin akaba omoteneneri bw’ekeombe ki’omotienyi o kianda. Ekeombe kiaye nigo kiarenge nabanto chilifu emerongo ebere na inye (24,000).

13Oyo o ikomi, Maharai korwa Netofa bw’ororeria rwa Zera akaba omoteneneri bw’ekeombe ki’omotienyi o ikomi. Ekeombe kiaye nigo kiarenge nabanto chilifu emerongo ebere na inye (24,000).

14Oyo o ikomi na rimo, Benaya korwa Piratoni bw’ororeria rw’Efraimu akaba omoteneneri bw’ekeombe ki’omotienyi o ikomi na rimo. Ekeombe kiaye nigo kiarenge nabanto chilifu emerongo ebere na inye (24,000).

15Oyo o ikomi na kabere, Helidai korwa Netofa bw’ororeria rw’Otinieli akaba omoteneneri bw’ekeombe ki’omotienyi o ikomi na kabere. Ekeombe kiaye nigo kiarenge nabanto chilifu emerongo ebere na inye (24,000).

16Aba nabwo barenge abaraai b’ebisaku bi’Abaisraeli: Eliezeri, mosinto o Sikiri, ase Abareuben; Sefatia, mosinto o Maaka, ase Abasimeoni;

17Hasabia, mosinto o Kemueli, ase Abalawi; Zadoki ase abanto ba Haroni;

18Elihu, oyomo bw’abamura bamwabo Daudi, ase Abayuda; Omuri, mosinto o Mikaeli, ase Abaisakaru;

19Isimaya, mosinto bw’Obadia, ase Abasabuloni; Yerimoti, mosinto bw’Asirieli, ase Abanafutali;

20Hosea, mosinto bw’Asasia, ase Abaefraimu; Yoeli, mosinto o Pedaya, ase ekeng’ese kende ki’egesaku kia Manase;

21Ido, mosinto o Zakaria, ase ekeng’ese ki’egesaku kia Manase, keria kiarenge agwo Gileadi; Yaasieli, mosinto bw’Abineri ase Ababenjamin;

22Asareli, mosinto o Yerohamu, ase Abadani. Aba nabwo barenge abaraai b’ebisaku bi’Abaisraeli.

23Daudi tabarete na korika abanto konya bataraika emiaka emerongo ebere, ekiagera Omonene nariete eira ng’a namente Abaisraeli babe abange buna ching’enang’eni chia igoro.

24Yoabu, omomura bw’omokungu Seruya, agachaka kobara Abaisraeli, korende takoorete emeremo eyio. Nyasae akaba nendamwamu ase Abaisraeli ase engencho y’okobarwa koria, na omobaro oyio tobekiri ase Ebuku y’ogokora gwa Daudi.

25Asimaweti, mosinto bw’Adieli, agatenenera chimonga chi’omoruoti; na Yonathani, mosinto bwa Usia, agatenenera chimonga chi’ense eria, ase emechie emenene na emeke, na ase emerobiri.

26Esiri, mosinto o Kelubi, agatenenera abakori emeremo b’emegondo, abarenge koyerema.

27Simei Omoramati agatenenera emegondo y’emesabibu, na Sabidi Omosifumi agatenenera edivai ase yare kogachwa.

28Baali‐Hanani Omogederi agatenenera emezeituni na emeko agwo ase ense omweya. Na Yoashi agatenenera ebigachero bi’amaguta ’amazeituni.

29Sitirai Omosaroni agatenenera amaicho arenge korisia agwo Saroni, na Safati, mosinto bw’Adilai, agatenenera amaicho arenge korisia ase amakura.

30Obili Omoisumaeli agatenenera chingamia, na Yedaya Omomeroni agatenenera chitigere, na

31Yasisi Omohagari agatenenera ching’ondi ne chimbori. Abe bonsi nigo barenge abateneneri ba chinibo chia Daudi omoruoti.

32Yonathani, ise moke Daudi, nere orenge omosemia; nigo arenge omonto omong’aini naende omonyasemi. Ere na Yehieli, mosinto o Hakimoni, nigo barenge abateneneri b’abana abamura b’omoruoti.

33Ahitofeli nere orenge omosemia bw’omoruoti, na Husai Omoariki nomosani bw’omoruoti orenge.

34Yehoyada, mosinto o Benaya, na Abiatari bakabekwa ase ribaga ri’Ahitofeli gakure. Yoabu nere orenge omochiki bw’abarwani esegi b’omoruoti.

← Chapter 26 Jump to: Chapter 28 →