1 Chronicles 29

Gussi (EBIBILIA ENCHENU) 2020

← Chapter 28 Jump to:

1Daudi omoruoti agakwana nomosangererekano bwonsi, agateba, “Sulemani, omwana one, oyo Nyasae achorire, nomoke, taramanya amange, na emeremo eye nigo ere emenene. Enyomba eye y’obonene tekoba ase mwanyabanto, korende nase Omonene Nyasae.

2Inche ase ogokora aya narenge konyara, nabekire ebinto ang’e ase okoagachera enyomba ya Nyasae one: chitahabu ase ebinto bie chitahabu, ne chifeta ase ebinto bie chifeta, ne chitaai ase ebinto bie chitaai, na ebioma ase ebinto bi’ebioma, ne chibao ase ebinto bie chibao. Amo nebinto ebio narure amagena e rigori rinene, buna oiniki na ayande ay’ogosata, ayare nebieni ao ao, akomeka‐meka, amo namagena ande amange amarabu akomeka‐meka.

3Boigo naende ekiagera nanchire na kwerwa ase enyomba ya Nyasae one, narure ase enyomba eye enchenu chinibo chiane chionsi chie chitahabu ne chifeta komenta ase ebinto ebio bionsi konya narure.

4Nkorua inde chitahabu, chitalanta chilifu isato, korwa ase Ofiri, ne chifeta chichenire chitalanta amagana atano na abere ase okooma chinyasi chi’enyomba,

5na ase emeremo ende yonsi egochia gokorwa nabaroisia ebinto, chitahabu ase ebinto bie chitahabu, ne chifeta ase ebinto bie chifeta. Ning’o ogochia kwerua ase ogwancha? Oyio tiga eatanane bweka omonyene ase Omonene rituko ria rero.”

6Erio abateneneri be chiamate chiabo bakarua ebiegwa bi’ogwancha; abaraai b’ebisaku na abatang’ani b’abarwani esegi chilifu na ab’amagana, na abateneneri b’emeremo y’omoruoti boigo bakarua.

7Barabwo bakarua ase emeremo y’enyomba ya Nyasae chitahabu chitalanta chilifu isano ne chidarikoni chilifu ikomi, ne chifeta chitalanta chilifu ikomi, ne chitaai chitalanta chilifu ikomi na isano na isato, na ebioma chitalanta chilifu rigana erimo.

8Omonto onde bwensi obwate amagena e rigori rinene akayarua, na amagena ayio akabekwa ase ekungo y’enyomba y’Omonene, inse y’oborendi bwa Yehieli Omogerisoni.

9Erio abanto bakaba nomogoko, ekiagera bonsi nigo baruete ase ogwancha, na ase chinkoro chieruete ase Omonene. Daudi omoruoti boigo akaba nomogoko omonene.

10Daudi agatogia Omonene ase obosio bw’omosangererekano bwonsi, akabora, “Aye Omonene, Nyasae o Israeli, sokoro yaito, kware gotogigwa korwa kare na gochia kare na kare!

11Aye Omonene, obonene nobwao amo nokobua, na obomeka‐meku, na obobui, na obonguru. Ebinto bionsi bire igoro na ebire ase ense nebiao. Aye Omonene, oboruoti nobwao, naye omonyene bweimokereretie igoro okaba omotwe o bionsi.

12Obotenenku bwonsi na amasikani nigo bikorwa asore aye, naye okogamba igoro ase bionsi. Ase okoboko kwao chinguru na okobua nao bire; nobwate okobua kw’ogokinia na korua chinguru ase bonsi.

13Bono Nyasae oito, twakoiraneirie ng’a mbuya mono na gotogia erieta riao ri’obonene.

14“Korende inche ninki ing’isaine, na abanto baane ninki baisaine, goika twanyarire korua ebinto ase ogwancha buna oko? Ebinto bionsi nigo bikorwa asore; ase ayio ebinto biaruete ase okoboko kwao nabio twakoeire.

15Intwe nigo tore ase ense y’obogeni, naende nigo tore abaeti ase obosio bwao, buna chisokoro chiaito chionsi chiarenge; amatuko aito ay’okomenya ase ense nigo anga buna omorengari, na ogosemeria konde tikoiyo.

16Ee, aye Omonene, Nyasae oito, ebinto ebi bionsi ebinge twarure ase okoagacha enyomba ase engencho y’erieta riao richenu nigo bikorwa ase okoboko kwao, na bionsi nebiao aye omonyene.

17Nyasae one, nimanyete ng’a aye nigo okorenga enkoro, naende nigo ogokirie nayare ay’oboronge. Ase enkoro endonge narure ebinto ebio bionsi nogwancha; na bono narorire abanto bao abare aiga bagokoruera nogwancha, naende ase omogoko omonge.

18Aye Omonene, Nyasae o Ibrahimu, na o Isaka, na o Israeli chisokoro chiaito, tiga abanto bao, bagenderere koba nekerenga eke na ebirengererio ase chinkoro chiabo botambe kogenderera, naende oonchore chinkoro chiabo chibeere asore.

19Oe Sulemani, omwana one, enkoro yeruete asore, erinde arende amachiko ao, na oborori bwao, na emeroberio yao echikire, akore aya onsi na aagache enyomba eria y’obonene nabeire nkobeka ebinto bionsi ang’e ase okoyeagacha.”

20Erio Daudi agatebia omosangererekano bwonsi, “Togia Omonene, Nyasae oino!” Na omosangererekano bwonsi ogatogia Omonene, Nyasae bwe chisokoro chiabo, na agwo abanto baria bagatureka emetwe yabo, bagasasima Omonene naende bakaorokia amasikani ase omoruoti.

21Ne rituko ria kabere barabwo bakaruera Omonene ebing’wanso, bakamoruera nebing’wanso bi’ogosambwa; chieri elifu eyemo, ne chimingichi elifu eyemo, ne chimanwa chie ching’ondi elifu eyemo, amo nokoruegwa kw’ebinyugwa gwachikire amo nabirobio, naende akarua ebing’wanso ebinge ase engencho y’Abaisraeli bonsi.

22Nabarabwo bakaria na konywa ase obosio bw’Omonene ase rituko riria, bakaba nomogoko omonene. Bono eria kabere bakabeka Sulemani, mosinto o Daudi, akaba omoruoti obo; bakamoaka amaguta akaba omogambi ase ogokorera Omonene, na Zadoki agaakwa amaguta akaba omokuani.

23Erio Sulemani agaikaransa ase ekerogo ki’oboruoti bw’Omonene, akaba omoruoti ribaga ria Daudi ise, akaba ogosesenigwa, na Abaisraeli bonsi bakamoigwera.

24Abaraai bonsi, na abanto chituoni, amo nabamura bonsi ba Daudi omoruoti bakaria chiira ng’a mbabwatane nomoruoti Sulemani.

25Omonene akaa Sulemani erieta rinene ase egati y’Abaisraeli bonsi, naende akamoa oboruoti bore nobonene obwo ataete omoruoti onde bwensi omotang’anerete agwo ase Abaisraeli.

26Bono Daudi, mosinto o Yese, konya ogambeire Abaisraeli bonsi.

27Akagambera Abaisraeli emiaka emerongo ene, emiaka etano na ebere agwo Heburoni, na emiaka emerongo etato na etato agwo Yerusalemu.

28Daudi agakwa ore omogotu mono bw’amatuko amange, nigo arenge omonto omonda osikire; na Sulemani, omomura oye, akaba okogamba ase ribaga riaye.

29Bono amang’ana aria Daudi omoruoti akorete korwa omochakano goika omoerie nigo arikire ase chibuku chia Samweli omorori, na ase echia Nathani omobani, na ase echia Gadi omorori.

30Bakarika amang’ana onsi igoro y’okogamba kwaye, na okobua kwaye, na amang’ana onsi amonyorete ere amo n’Abaisraeli, na amaruoti ande onsi ay’ense.

← Chapter 28 Jump to: