Revelation 1

Gussi (EBIBILIA ENCHENU) 2020

Jump to: Chapter 2 →

1Oko nokomaanoka kwa Yeso Kristo oko Nyasae amoete, erinde orokie abasomba baye amang’ana agwenerete gocha gokoreka bwango. Ase ogotoma omomalaika oye akorokia omosomba oye Yohana,

2oyorenge kirori ase ring’ana ria Nyasae na ase oborori bwa Yeso Kristo, ase ogoteba amang’ana onsi ayaroche.

3Nasesenirie ere oyogosoma, na abwo bakoigwa amang’ana ’obobani obo, na kobwata ayarikireo, ekiagera engaki ng’ang’e ere.

4Inche Yohana nkobarikera nde inwe abanto be chikanisa isano na ibere chi’Asia: Obuya bobe asemore na omorembe bikorwa asare ere oyoreo, na oyorengeo, na oyorache kobao, na korwa ase emeika etano na ebere ere bosio bw’ekerogo kiaye ki’obonene,

5na korwa ase Yeso Kristo, oyore kirori omwegenwa, omoiborwa bwe ritang’ani oyobogete korwa ase abakure, omogambi bw’abaruoti b’ense. Asare ere oyotwanchete na agatobooria korwa ase ebibe biaito namanyinga aye ase ogotokwera,

6oyotokorete koba ab’oboruoti na abakuani ase Nyasae Ise oye asare ere obonene na okobua goika kare na kare. Amina.

7Rigereria, ngocha are namare, na kera eriso narimorore, nonya nabwo bamoitete, na abanto b’ebisaku bionsi bi’ense nabeng’ererie ase engencho yaye. Ee, nabo. Amina.

8“Inche n’Alifa na Omega,” Omonene Nyasae otebire, oyoreo, na oyorengeo, na oyorache kobao, oyore Omobui.

9Inche Yohana, momura omino, na omobwatani amo nainwe ase emechando, na ase oboruoti, na ase okoremereria amo na Yeso, nigo narenge ase egesinka gekorokwa Patimo, ekiagera nigo narenge koraria ring’ana ria Nyasae na komobera Yeso kirori.

10Ase rituko ri’Omonene nigo nabogoretigwe n’Omoika, nkaigwa korwa magega aane eriogi rinene, buna eriogi ri’egetureri,

11rigoteba, “Aya orarore oyarike ase ebuku, oyatome ase chikanisa echi isano na ibere echire Efeso, na Sumurina, na Perigamo, na Tiatira, na Saridi, na Filadelfia, na Laodikia.”

12Nkeonchora ndore eriogi riria rigokwana nainche. Ngachia kweonchora nkarora ebibekerero bie chitaya bitano na bibere bie chitahabu,

13na gati‐gati y’ebibekerero biria nkarora oyomo onga buna omwana o mwanyabanto, obekeire eanga entambe eigete inse ase ebisanyi bi’amagoro, na bweboeretie orokini rw’etahabu gekuba kiaye.

14Omotwe oye na etukia yaye nigo biarenge ebirabu se buna amarionya amarabu, ebirabu se buna amagena ’embura; na amaiso aye nigo arenge buna ekebemberi ki’omorero.

15Na amagoro aye nigo arenge buna etaai esenirie koyasibigwe ase eriko ri’omorero, na eriogi riaye buna eriogi ri’amache amange akoeera.

16Ase okoboko kwaye gw’okorio nigo abwate ching’enang’eni isano na ibere, na ase omonwa oye okaruao omoyio o birende ore nobwoge chinsemo ibere, na obosio bwaye nigo bware kobara buna erioba rikobara ne chinguru chiaye.

17Ngachia komorora nkagwa ase amagoro aye, nkaba buna oyokure. Erio akabeka okoboko kwaye gw’okorio igoro asende, agantebia, “Toiroka, inche noyo bwe ritang’ani, na oyo bw’omoerio,

18na oyore moyo. Inche konya nakure, na rigereria, nigo inde moyo goika kare na kare, ninde nebigorero bi’amakweri na ebi’aase abakure.

19Bono rika amang’ana aya kwarorire, ayareo, na ayarache koba nyuma y’ayio.

20Obo nabwo obobisi bwe ching’enang’eni chiria isano na ibere kwarora ase okoboko kwane gw’okorio, na ebibekerero biria bie chitaya bie chitahabu bitano na bibere: Ching’enang’eni chiria isano na ibere nabamalaika be chikanisa isano na ibere, na ebibekerero biria bitano na bibere nechikanisa isano na ibere.”

Jump to: Chapter 2 →