Revelation 14

Gussi (EBIBILIA ENCHENU) 2020

← Chapter 13 Jump to: Chapter 15 →

1Erio nkarigereria, nkarora Emanwa y’Eng’ondi oteneine ase egetunwa gia Sayoni, na amo nere abanto chilifu rigana erimo na emerongo ene na inye (144,000) abaare nerieta riaye amo neria Ise riarikire ase amasio abo igoro.

2Nkaigwa eriogi rikorwa igoro buna eriogi ri’amache amange akoeera, na buna eriogi ri’enkoba enene. Eriogi riria naigwete riarenge buna eriogi ri’abaare kobugia amakano abo.

3Barabwo nigo baare gotera ogotera okoyia bosio bw’ekerogo ki’obonene, na ase obosio bwe ching’iti chiria inye chire moyo, na ase obosio bw’abagaaka baria. Omonto onde tare ore konyara kwegera ogotera koria otatiga baria chilifu rigana erimo na emerongo ene na inye (144,000) ababooretigwe korwa ase ense.

4Aba nabwo batesoetie ase ogotacheneka nabakungu, ekiagera barabwo nabekungi, naende bagotunyana Emanwa y’Eng’ondi kera aase ase akogenda. Aba nababooretigwe korwa ase mwanyabanto buna ogotongorwa ase Nyasae na ase Emanwa y’Eng’ondi,

5na ase emenwa yabo borimo bonde tibwanyorekanete, ekiagera barabwo tibari na komocha.

6Erio nkarora omomalaika onde okoiruruka igoro gati. Oyo nigo arenge nenchili ya kare na kare okorareria abwo bamenyete ase ense, ase kera egesaku, na eamate, na omonwa, na abanto.

7Ere agateba neriogi rinene, “Moiroke Nyasae na komotogia, ekiagera ensa yaye y’okogambia yaikire, mosasime ere oyotongete igoro na ense, na enyancha, ne chinsoko chi’amache.”

8Omomalaika onde, oyo o kabere, akamotunyana, ogoteba, “Babeli ogure! Babeli, omochie oria omonene, ogure, oyo onyoisirie abanto b’ebisaku bionsi edivai y’endamwamu y’obotomani bwaye!”

9Na omomalaika onde, oyo o gatato, akabatunyana, ogoteba neriogi rinene, “Omonto karasasime eng’iti eria na omogwekano oye, na kobekwa ekemanyererio ase obosio bwaye igoro, gose ase okoboko kwaye,

10ere nanywe edivai y’endamwamu ya Nyasae yaroisigwe, etasang’aniri kende, ase egekombe ki’endamwamu yaye. Naende nachandwe nomorero na ekebiriti ase amasio ’abamalaika abachenu, na ase obosio bw’Emanwa y’Eng’ondi.

11Na erioki ri’okoyia kw’abwo bagochandeka nigo rirachongororoke gochia igoro goika kare na kare. Na ogotimoka tikori omobaso gose obotuko ase abwo basasimete eng’iti eria na omogwekano oye, na kera oyonyorire ekemanyererio ki’erieta riaye.”

12Aiga nao abachenu barabe nokoremereria, abwo babwatete amachiko a Nyasae na koba abegenwa ase Yeso.

13Erio nkaigwa eriogi rikorwa igoro rigoteba, “Rika aya: Mbasesenirie abagokwa korwa bono, bamwegenete Omonene. Ee, nabo, Omoika ogoteba, tiga batimoke korwa ase emeremo yabo, ekiagera okwama kw’ogokora kwabo nigo gokobatunyana.”

14Erio nkarigereria, nkarora riire rirabu, na igoro ase riire riria naikaranseteo oyomo ogwekaine omwana o mwanyabanto, orenge negutwa y’etahabu ase omotwe oye, na omoyio okogesa ase okoboko kwaye.

15Na omomalaika onde agasoka korwa ase Hekalu akarera neriogi rinene, agatebia oyoikaransete igoro ase riire riria, “Soyia omoyio oo mogondo, ogese, ekiagera engaki y’okogesa yaikire, ne rigesa riomire mono.”

16Na ere oyoikaransete igoro ase riire riria agasoyia omoyio oye ase ense, na ense ekageswa.

17Na omomalaika onde agasoka korwa ase Hekalu ya igoro, nere boigo narenge nomoyio okogesa.

18Erio korwa ase egesasimero omomalaika onde agasoka, oyore nokobua igoro ase omorero, agakwana neriogi rinene, agatebia oyio orenge nomoyio okogesa, “Butora nomoyio oo okogesera, na gosangereria ebisago bi’amasabibu ’emesabibu y’ense, ekiagera amasabibu aye atobire.”

19Omomalaika oria akabutora, agasangereria amasabibu ’emesabibu y’ense, na akayaruta ase ekemitero ekenene ki’endamwamu ya Nyasae.

20Na ekemitero keria kegatiringwa isiko y’omochie, na amanyinga agaiteka korwa ase ekemitero, na amanyinga aria akagenda ase oboare bwe chimaeli amagana abere, agaichora goika ebiokio bie chibarasi.

← Chapter 13 Jump to: Chapter 15 →