Revelation 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Erio nkarora ase okoboko gw’okorio kw’oyoikaransete ase ekerogo ki’obonene ebuku erikire ime na isiko, yabekirwe ebimanyererio bitano na bibere.

2Naende nkarora omomalaika bwe chinguru okoraria neriogi rinene, ogoteba, “Ning’o ogwenerete koigora ebuku, na gosansora ebimanyererio biaye?”

3Na onde tarenge igoro, gose ase ense, gose inse y’ense oyogwenerete koigora ebuku, gose koyerigereria.

4Na inche nkarera mono, ekiagera onde tarorekanete ogwenerete koigora ebuku eria, na koyerigereria.

5Na oyomo bw’abagaaka baria agantebia, “Torera, rora Endo bw’egesaku kia Yuda, Ritina ria Daudi, obuire, nere oranyare koigora ebuku eria na gosansora ebimanyererio biaye bitano na bibere.”

6Erio nkarora Emanwa y’Eng’ondi, oteneine gati y’ekerogo ki’obonene ne ching’iti chiria inye chire moyo, na gati‐gati y’abagaaka; nere ororekanete buna oyonyenyetwe. Nigo arenge ne chingunchara isano na ibere na amaiso atano na abere, ayare emeika etano na ebere ya Nyasae, yatomirwe ase ense yonsi.

7Emanwa y’Eng’ondi agacha, akabogoria ebuku eria korwa ase okoboko gw’okorio kw’oyoikaransete ase ekerogo keria ki’obonene.

8Goika agachia kobogoria ebuku eria, ching’iti chiria inye chire moyo chigatung’ama amo nabagaaka baria emerongo ebere na bane ase obosio bw’Emanwa y’Eng’ondi. Kera oyomo obo narenge nobokano na ebitaabo bie chitahabu biichire ubani nero nogosaba kw’abachenu.

9Barabwo nigo baare gotera ogotera okoyia, bagoteba, “Kwagweneire aye kobogoria ebuku na gosansora ebimanyererio biaye, ekiagera aye nkwanyenyetwe, na ase amanyinga ao okamogorera Nyasae abanto ba kera eamate, na omonwa, na abanto, na egesaku,

10okabakora bakaba ab’oboruoti na abakuani ase Nyasae oito, na barabwo nigo baragambe ase ense.”

11Erio nkarigereria, nkaigwa egeturi ki’abamalaika abange abarenge baetanaine ekerogo keria ki’obonene ne ching’iti chiria chire moyo, na abagaaka baria; na omobaro obo nigo orenge chilifu ikomi ara chilifu ikomi, ne chilifu ara chilifu.

12Barabwo bagateba ase eriogi rinene, “Emanwa y’Eng’ondi oyonyenyetwe igo ogweneire konyora okobua, na obonda, na obong’aini, ne chinguru, na ogosikwa, na obonene, na ogotogigwa.”

13Naende nkaigwa kera egetongwa ekere igoro, na ekere ase ense, na inse y’ense, na igoro y’enyancha na imeo, kegoteba, “Asare ere oyoikaransete ase ekerogo ki’obonene, na ase Emanwa y’Eng’ondi ogotogigwa, na ogosikwa, na obonene, na okobua goika kare na kare!”

14Ne ching’iti chiria inye chire moyo chikabora, “Amina!” Na abagaaka baria bagatung’ama, bagasasima.

← Chapter 4 Jump to: Chapter 6 →