Revelation 19

Gussi (EBIBILIA ENCHENU) 2020

← Chapter 18 Jump to: Chapter 20 →

1Nyuma ase aya nkaigwa egento buna neriogi rinene ri’omoganda omonene igoro, rigoteba, “Haleluya! Ogotooreka, na obonene, na okobua, nebia Nyasae oito.

2Okogamba kwaye nogw’ekeene, na okw’oboronge, naki omogambirie oria omotayayi omonene, oyosaririe ense ase obotomani bwaye. Nyasae orusirie egesiomba ki’amanyinga ’abasomba baye korwa ase amaboko ’omotayayi oria”

3Eria kabere bagateba, “Haleluya! Erioki ri’okoyia kwaye nigo rirachongororoke gochia igoro goika kare na kare.”

4Na abagaaka baria emerongo ebere na bane amo ne ching’iti chiria inye chire moyo bagatung’ama, bagasasima Nyasae oyoikaransete ase ekerogo ki’obonene, bagoteba, “Amina. Haleluya!”

5Eriogi rikarua ase ekerogo ki’obonene rigateba, “Motogie Nyasae oito, inwe abasomba baye bonsi, inwe abamomoirogete, abake na abanene!”

6Erio nkaigwa buna neriogi ri’omoganda omonene, na buna eri’amache amange, na buna eri’enkoba ye chinguru rigoteba, “Haleluya! Omonene Nyasae oito Omobui nkogamba are.

7Togoke na gochenga, tomotogie ase obonene bwaye, ekiagera rituko ri’enyangi y’Emanwa y’Eng’ondi riaikire, na omoriakari oye bwebekire ang’e.

8Ere oeirwe eanga y’egatani engiya endabu, ekomeka‐meka, akobeka.” Egatani eyio nogokora kw’oboronge kw’abachenu.

9Omomalaika oria agantebia, “Rika aya: Mbasesenirie abarangerigwe ase omoyega bw’enyangi y’Emanwa y’Eng’ondi.” Naende agantebia, “Amang’ana aya namang’ana ay’ekeene a Nyasae.”

10Erio ngatung’ama ase amagoro aye nkamosasima. Na ere agantebia, “Tokora igo! Inche nomosomba omogisangio oo na oyo bw’abamino abare noborori bwa Yeso. Osasime Nyasae! Naki oborori bwa Yeso nabwo omoika bw’obobani.”

11Erio nkarora igoro amaanokire. Agwo nkarora ebarasi endabu, na ere oyoyeriinete okorokwa Omwegenwa na Omonyakeene; ere nigo are kogamba na gokora esegi ase oboronge.

12Amaiso aye nigo arenge buna ekebemberi ki’omorero, na igoro ase omotwe oye nchiarengeo chigutwa chinyinge. Narenge nerieta riarikire asare ritamanyiri na onde, otatiga ere omonyene.

13Ere obekeire eganchwa etobekire ase amanyinga, na erieta riaye are korokwa Ring’ana ria Nyasae.

14Na emeganda y’esegi ere igoro ekamotunyana, na abwo bariinete chibarasi chindabu, babekeire chianga chi’egatani engiya endabu.

15Korwa ase omonwa oye okaruao omoyio o birende ore omwoge, na ase oyio naake abanto b’ebisaku. Ere nabagambere nenyimbo y’ekioma, naende natiringe ekemitero ki’edivai y’endamwamu entindi ya Nyasae Omobui.

16Naende nare nerieta ase eganchwa yaye na ase eriagati riaye ririkire iga: Omoruoti bw’abaruoti na Omonene bw’abanene.

17Erio nkarora omomalaika oteneine ase erioba ime, okorera ase eriogi rinene, ogotebia chinyoni chiare koiruruka ase igoro gati, “Inchuo mosangererekane ase omoyega omonene o Nyasae.

18Monyare koria chinyama chi’abaruoti, na echi’abatang’ani b’esegi, na echi’abanto bare ne chinguru, ne chinyama chie chibarasi, na echi’abariini babo, ne chinyama chi’abanto bonsi, abatari abasomba, abake na abanene.”

19Erio nkarora eng’iti eria, na abaruoti b’ense amo nemeganda yabo y’esegi basangererekanete amo bamorwanie ere oyoriinete ebarasi eria na omoganda oye.

20Eng’iti eria ekabwatwa amo nomobani oria bw’oborimo, ere oyokorete ebikone ase obosio bwaye. Ase ebikone ebio nigo are kong’aina abanto baria baetwe ekemanyererio ki’engiti eria na gosasima omogwekano oye. Abwo babere bakarutwa bare moyo ase enyancha y’omorero egwoka ekebiriti.

21Na baria batigarete bagaitwa nomoyio o birende bw’oyoikaransete igoro ase ebarasi eria, omoyio o birende, oria okorua ase omonwa oye. Ne chinyoni chionsi chikaigota ase chinyama chiabo.

← Chapter 18 Jump to: Chapter 20 →