Daniel 5

Hausa Arabic 2020 (أَتَّوْرَتْ دَ أَنَّبَاوَا)

1أَنَانً سَيْ سَرْكِے بٜىٰلْشَظَّرْ يَشِرْيَ بَبَّنْ بِكِ دُواْمِنْ مَنْيَنْ مُتَنٜىٰنْ مُلْكِنْسَ غُدَا دُبُو؞ أَغَبَنْ مُتَنٜىٰ دُبُنَّنْ، سَرْكِے يَنَ شَنْ ضُوً إِنَبِے تَرٜىٰدَسُو؞

2سَعَدَّ يَكٜىٰ شَنْ ضُوً إِنَبِے، سَيْ بٜىٰلْشَظَّرْ يَعُمَرْتَ عَكَٰوُاْ ݣُوڢُنَ نَظِينَارِيَ دَ نَأَظُرْڢَا دُواْمِنْ شِے دَ مَنْيَنْ مُتَنٜىٰنْسَ دَ مَاتَنْسَ دَ مَاتَانْدَ يَأَجِيٜىٰ، سُشَا دَغَ ثِكِنْسُ؞ وَطَنَّنْ ݣُوڢُنَ كُوَ سُنَ ثِكِنْ كَايَيَّكِنْ دَ بَابَنْسَ نٜىٰبُكَدْنٜىٰزَّرْ يَݣُوشٜىٰ دَغَ هَيْكَلِ أَ عُرُوشَلِيمَ نٜىٰ؞

3سَيْ عَكَ كَٰوُاْ ݣُوڢُنَ نَظِينَارِيَ دَ نَأَظُرْڢَا وَطَنْدَ عَكَ ݣُوشٜىٰ دَغَ هَيْكَلِ، وَتُواْ غِدَنْ اللَّهْ أَ عُرُوشَلِيمَ؞ سَيْ سَرْكِے دَ مَنْيَنْ مُتَنٜىٰنْسَ دَ مَاتَنْسَ دَ مَتَنْ دَ يَأَجِيٜىٰ سُكَشَا دَغَ ثِكِنْ ݣُوڢُنَنْ؞

4سُكَشَا ضُوً إِنَبِنْ، سُكَ يَبِے غُمَكَنْ أَلُّواْلِنْسُ نَظِينَارِيَ دَ نَأَظُرْڢَا دَ نَتَغُلَّ دَ نَبَڧِنْ ڧَرْڢٜىٰ دَ نَ إِتَاثٜىٰ دَ نَدُوڟٜىٰ؞

5بَا لَابَرِ سَيْ يَڟُنْ حَنُّنْ مُتُمْ سُكَ بَيَّنَ، سُكَيِ رُبُوتُو عَكَنْ شَاڢٜىٰنْ بَنْ‌غُواْ نَغِدَنْ سَرْكِنْ، عِنْدَ حَصْكٜىٰنْ ڢِتِلَ يَڢِ حَصْكَكَاوَا؞ حَنُّنْ يَيِ تَرُبُوتُ، سَرْكِے كُوَ يَنَ غَنِ؞

6سَيْ ڢُسْكَرْ سَرْكِے تَثَنْجَ؞ تُنَانِنْسَ يَبَا شِ ڟُواْرُواْ؞ غَٻُواْٻِنْ جِكِنْسَ سُكَ مُتُ، ڠُوِوُاْيِنْسَ سُكَ ڢَارَ ضَوَ سُنَ بُبُّغَ جُونَ؞

7سَيْ سَرْكِے يَيِ كِرَا دَ بَبَّرْ مُرْيَ دُواْمِنْ عَكَٰوُاْ مَسَ مَاسُ دُوبَادَ ڠُونَيٜىٰنْ ڟَاڢِ دَ مَاسُ يِنْ دُوبَادَ تَوْرَرِ؞ سَيْ سَرْكِے يَيِ مَغَنَ غَمٜىٰدَ مَاسُ حِكِمَرْ نَنْ يَثٜىٰ «دُكْ وَنْدَ يَ عِيَ كَرَنْتَ وَنَّنْ رُبُوتُو، يَكُوَ ڢَطَا مِنِ مَعَنَرْسَ، تُواْ، ذَاعَ سَا مَسَ رِغَرْ مُلْكِ تَجَرْ غَرُورَا، أَسَا مَسَ سَرْڧَرْ ظِينَارِيَ أَوُيَنْسَ، ذَاعَ كُمَ بَاشِ مَڟَيِ نَعُكُ عَثِكِنْ مَاسُ مُلْكٍ ڧَسَرْ؞»

8سَيْ دُكَنْ مَاسُ حِكِمَرْ نَنْ نَسَرْكِے سُكَ شِغُواْ، عَمَّا بَاوَنْدَ يَ عِيَ كَرَنْتَ رُبُوتُنْ بَلّٜىٰ مَا يَسَنَرْ وَسَرْكِے مَعَنَرْسَ؞

9سَيْ بَبَّنْ ڟُواْرُواْ يَكَامَ سَرْكِے بٜىٰلْشَظَّرْ، حَرْ ڢُسْكَرْسَ تَثَنْجَ؞ مَنْيَنْ مُتَنٜىٰنْسَ كُمَ سُكَ ضِكِثِے؞

10سَعَدَّ سَرَوْنِيَ مَامَرْ سَرْكِے تَجِ مَغَنْ‌غَنُنْ دَ سَرْكِے دَ مَنْيَنْ مُتَنٜىٰنْسَ سُكٜىٰيِ، سَيْ تَشِغَ بَبَّنْ طَاكِنْ دَ عَكٜىٰبِكٍ؞ تَاثٜىٰ «يَا سَرْكِے، رَنْكَيَدَطٜىٰ! كَدَ كَبَرْ تُنَانِنْ ذُوثِيَارْكَ سُبَاكَ ڟُواْرُواْ، كَدَ كُمَ ڢُسْكَرْكَ تَثَنْجَ؞

11أَيْ، أَݣَويْ وَنِ مُتُمْ أَمُلْكِنْكَ وَنْدَ يَكٜىٰ ثِكٜىٰ دَ رُوحٌ أَلُّواْلِ مَاسُ ڟَرْكِے؞ أَ لُواْكَثِنْ دَ بَابَنْكَ يَكٜىٰ مُلْكِ، وَنَّنْ مُتُمْ يَكَسَنْثٜىٰ مَيْ بَسِيرَ دَ غَانٜىٰوَ دَ حِكِمَ كَمَرْ حِكِمَرْ أَلُّواْلِ؞ بَابَنْكَ سَرْكِے نٜىٰبُكَدْنٜىٰزَّرْ يَنَطَشِ شُوغَبَنْ مَاسُ دَبُواْ دَ مَاسُ دُوبَادَ ڠُونَيٜىٰنْ ڟَاڢِ دَ مَاسُ يِنْ دُوبَادَ تَوْرَرِ؞

12وَنَّنْ مُتُمْ شِينٜىٰ دَانِيٜىٰلْ وَنْدَ بَابَنْكَ يَثَنْجَ مَسَ سُونَ ذُوَا بٜىٰلْتٜىٰشَظَّرْ؞ شِ مُتُمْ نٜىٰ مَيْ ثِكٜىٰ دَ رُوحٌ بَنْ مَامَاكِ دَ سَنِ دَ بَسِيرَ؞ وَنَّنْ يَسَا يَ عِيَ بَيَّنَ مَعَنَرْ مَڢَرْكَيْ دَ تَكَثِثِ كَثِثِ، يَكُمَ عِيَ وَرْوَارٜىٰ أَلْعَمُرَ مَاسُ وُيَ؞ بَرِ إِنْ سَرْكِے يَيَرْدَ، يَعَيْكَ عَكِرَوُاْ دَانِيٜىٰلْ دُواْمِنْ يَبَادَ مَعَنَرْ وَنَّنْ أَبِنْدَ كَغَنِ؞»

13سَيْ عَكَ كَٰوُاْ دَانِيٜىٰلْ أَغَبَنْ سَرْكِے؞ سَرْكِے يَثٜىٰ وَ دَانِيٜىٰلْ «كَيْ نٜىٰ دَانِيٜىٰلْ طِنَّنْ، طَيَ دَغَ ثِكِنْ وَطَنْدَ بَابَنَ يَكَٰوُاْ دَغَ يَهُودَ ذُوَا بَوْتَا؟

14نَجِ لَابَرِ ثٜىٰوَ كَنَدَ رُوحٌ أَلُّواْلِ، كَنَ كُمَ دَ غَانٜىٰوَ دَ بَسِيرَ دَ ثِكَكِّيَرْ حِكِمَ؞

15يَنْذُنَّنْ عَكَ كَٰوُاْ مِنِ مَاسُ حِكِمَ دَ مَاسُ دُوبَا دُواْمِنْ سُكَرَنْتَ وَنَّنْ رُبُوتُو، سُكُمَ بَيَّنَ مِنِ مَعَنَرْسَ، عَمَّا سُنْ كَاسَ ڢَطِنْ مَعَنَرْ رُبُوتُنْ؞

16عَمَّا نَجِ كَا عِيَ ڢَطَرْ مَعَنَرْ أَسِرَيْ، كَكُمَ عِيَ وَرْوَارٜىٰ أَلْعَمُرَ مَاسُ وُيَ؞ عِدَنْ ڢَا كَا عِيَ كَرَنْتَ رُبُوتُنَّنْ، حَرْ كُمَ كَا عِيَ بَيَّنَ مِنِ مَعَنَرْسَ، تُواْ، ذَاعَ سَا مَكَ رِغَرْ مُلْكِ تَجَرْ غَرُورَا، ذَاعَ كُمَسَا سَرْڧَرْ ظِينَارِيَ أَوُيَنْكَ؞ ذَاعَبَاكَ مَڟَيِ نَعُكُ عَثِكِنْ مَاسُ مُلْكٍ ڧَسَرْ؞»

17دَانِيٜىٰلْ كُوَ يَأَمْسَ يَثٜىٰ وَ سَرْكِے، «رَنْكَيَدَطٜىٰ! ذَاكَ عِيَ رِڧٜىٰ ݣَوْتَرْكَ، كُواْ كَبَا وَنِ؞ دُكْدَهَكَ ذَنْ كَرَنْتَ وَسَرْكِے رُبُوتُنْ، إِنْكُمَ بَيَّنَ مَسَ مَعَنَرْسَ؞

18يَا سَرْكِے، اللَّهْ مَڢِے طَوْكَكَ يَا بَا بَابَنْكَ نٜىٰبُكَدْنٜىٰزَّرْ مُلْكِ دَ غِرْمَ دَ طَوْكَكَ دَ دَرَجَ؞

19سَبُواْدَ غِرْمَنْ دَ اللَّهْ يَبَا شِ، شِے يَسَا دُكَنْ ڧَبِيلُ دَ أَلْعُمَّيْ دَ مَاسُ يَرٜىٰ دَبَمْ دَبَمْ سُكَجِڟُواْرُوانْسَ سُكَيِ ضَوَرْ جِكِے أَغَبَنْسَ؞ يَكَنْ كَشٜىٰ دُكْ وَنْدَ يَغَ دَامَ، يَبَرْ وَنْدَ يَغَ دَامَ دَ رَيْ؞ حَكَ مَا يَكَنْ طَوْكَكَ وَنْدَ يَغَ دَامَ، يَڧَسْڧَنْتَرْ دَ وَنْدَ يَغَ دَامَ؞

20عَمَّا سَعَدَّ يَتَوْرَرَ ذُوثِيَارْسَ دَ تُنَانِنْسَ، يَڢَارَ تَڢِيَ ثِكِنْ غِرْمَنْ كَيْ، سَيْ عَكَ كُواْرٜىٰشِ دَغَ كُجٜىٰرَرْ مُلْكِنْسَ دَرَجَرْسَ كُمَ تَرَبُ دَشِ؞

21عَكَ كُواْرٜىٰشِ دَغَ ثِكِنْ مُتَنٜىٰ ذُوَا دَاجِ، عَكَ مَيْدَ حَنْكَلِنْسَ إِرِنْ نَدَبَّ؞ يَتَڢِے يَذَوْنَ تَرٜىٰدَ جَاكُنَنْ دَاجِ، يَنَ تَثِنْ ثِيَوَ كَمَرْ بِجِمِ؞ جِكِنْسَ يَجِڧٜىٰ دَ رَٻَ حَرْ ذُوَا لُواْكَثِنْدَ يَغَانٜىٰ ثٜىٰوَ اللَّهْ مَڢِے طَوْكَكَ نٜىٰ يَكٜىٰ مُلْكٍ یَنْ أَدَمْ، يَكَنْ كُمَ بَادَ مُلْكِ غَ وَنْدَ يَغَ دَامَ؞»

22«عَمَّا يَا كَيْ بٜىٰلْشَظَّرْ، كَيْ دَ كَكٜىٰ طَنْسَ، كُواْدَيَكٜىٰ كَسَنْ دُكَنْ وَطَنَّنْ، دُكْدَهَكَ بَكَ ڧَسْڧَنْتَرْ دَكَنْكَبَ؞

23أَ مَيْمَكُوانْ حَكَ، سَيْ كَنُونَوَ عُبَنْ‌غِجِنْ سَمَ غِرْمَنْ كَيْ، حَرْ كَسَا عَكَ كَٰوُاْ مَكَ ݣُوڢُنَنْ غِدَنْسَ؞ كَيْ دَ مَنْيَنْ مُتَنٜىٰنْكَ دَ مَاتَنْكَ دَ مَاتَانْدَ كَأَجِيٜىٰ دُكَنْكُ كُكَ شَا دَغَ ثِكِنْسُ؞ كُكَ يَبِے غُمَكَنْ ظِينَارِيَ دَ نَأَظُرْڢَا دَ نَتَغُلَّ دَ نَبَڧِنْ ڧَرْڢٜىٰ دَ نَ إِتَاثٜىٰ دَ نَدُوڟٜىٰ وَطَنْدَ بَاسَجِ، كُواْ سُغَنِ، بَلّٜىٰ عَثٜىٰ سُغَانٜىٰ كُواْمٜىٰ؞ عَمَّا اللَّهْ وَنْدَ رَنْكَ دَ دُكَنْ هَنْيُواْيِنْكَ سُنَ أَ حَنُّنْسَ، شِينٜىٰ كَاڧِ غِرْمَمَاوَا؞

24شِينٜىٰ دَلِيلِنْدَ يَسَا اللَّهْ يَعَيْكُواْ دَ حَنُّنَّنْ دَ يَيِ رُبُوتُنْ؞

25غَا رُبُوتُنْ دَ عَكَيِ؞ «مٜىٰنٜىٰ، مٜىٰنٜىٰ، تٜىٰكٜىٰلْ، ڢَرْسِنْ؞

26«غَا مَعَنَرْ كَلْمُواْمِنْ؞ «مٜىٰنٜىٰ، وَتُواْ ‹ڧِرْغَ›، اللَّهْ يَاڧِرْغَ ݣُونَكِنْ مُلْكِنْكَ، كُمَ يَارِغَا يَكَٰوُاْسُ غَ ڧَرْشٜىٰ؞

27«تٜىٰكٜىٰلْ، وَتُواْ ‹نَوْيِ›، أَنْعَوْنَ نَوْيِنْكَ أَ مَعَوْنِ، عَكَ كُمَ تَرَرْ بَاكَ دَ إِسَشّٜىٰنْ نَوْيِ؞

28«ڢَرْسِنْ، وَتُواْ ‹رَبَ›، أَنْرَبَ مُلْكِنْكَ أَنْبَا مُتَنٜىٰنْ مٜىٰدِيَ دَ نَ ڢَٰشِيَ؞»

29نَنْ دَنَنْ سَيْ سَرْكِے بٜىٰلْشَظَّرْ يَعُمَرْتَ مَاسُ يِمَسَ حِدِمَ سُسَاوَ دَانِيٜىٰلْ رِغَرْ مُلْكِ تَجَرْ غَرُورَا، عَكُمَسَا مَسَ سَرْڧَرْ ظِينَارِيَ أَوُيَنْسَ؞ سَعَنً عَكَيِ شٜىٰلَ ثٜىٰوَ أَنْبَاشِ مَڟَيِ نَعُكُ عَثِكِنْ مَاسُ مُلْكٍ ڧَسَرْ؞

30أَ دَرٜىٰنَّنْ كُوَ عَكَ كَشٜىٰ سَرْكِے بٜىٰلْشَظَّرْ مُتُمِنْ كَلْدِيَ نَ بَابِيلَ؞

31دَرِيُسْ مُتُمِنْ مٜىٰدِيَ كُوَ يَكَرْٻِ مُلْكِ، يَنَدَ شٜىٰكَرَا سِتِّنْ دَ بِيُ؞

← Chapter 4 Jump to: Chapter 6 →