Luke 1 — hadiyya

1Lophphitaattoo Teewoofiloosa, ni lambe'enne ihu woshsha kanniinsi illageen lobakat keen kitaabbo'ookko.

2Ixxuwwi kitaabbo'okim luxxaanniinsi ki'issa'a illinne moo'llo'i keenii mishiraachchi sagara alallaattam hee'llo'i keenii niina afisso'i woshsha.

3Ee'isam anim luxxaanniinsi ki'isaa hundem luwwam danaamisa saarayyaa moo'aa lasage woshshooma kiina ogorinne kitaabimmi danaam ihaa iina moo'amaakko.

4An eekka kitaaboommok at lossitti woshshika hanqa qoossitaa laqqoo'isinatte.

5Heeroodais Yihuxxi uullina adil hee'u doollenne Abiya'i qeessooma'n baxxanchiinsetti ihoo Zakkaaryaasa yakkam qeessichchi hee'ukko. Ixxi mi'n ama Eelsaabeexem Aaroon moollitan hee'llo'o.

6Lamim Waa'i ijaajo hundam egerimminne Waa'i illagenne miiqakkam luwwi bee'i muccur keen hee'llo'o.

7Ihukkaarem Eelsaabeexe alceennatte hee'llo'i bikkina ixxuwwina oos hee'ukkoyyo. Ixxuwwim lomma'nnamaa hee'amukko.

8Mat ayyaamo ixxi baxxanchina tar afukkaare Zakkaaryaas Waa'i illagenne qeessoo'm baxo baxam hee'ukko.

9Qeessuwwi eraare issitam losa'nnisam Zakkaaryaasim Keesammi Mine aagaa aduruusa wiriissoo'isina saam ixxena afukko.

10Zakkaaryaas aduruusa wiriissam hee'u ammane minaadab hundim miniinsi biireen Waa'a uunxonam

11Waa'i asse'amaanchi aduruusa wiriissimmina worqiinsi baxamu mu'uxxi makki kollonne uullaa Zakkaaryaasina moo'amukko.

12Ixxim ee asse'amaancho moo'u ammanenne muggaa lobakata baddukko.

13Ihukkaarem oo Waa'i asse'amaanchi «Zakkaaryaasa, baddititte! Ki uunxato Waa'i macceesu bikkina ki are Eelsaabeexe goonchi beeto qattamo. Ixxekam summa Yohaannisa yitaa weeshshootto.

14Atim lobakata liirantootto. Dut keenim ixxi qaranchanne liiramookko.

15Oo beetim Waa'i illagenne loban ihookko. Ixxim woyi'n diqaasaa mulli dimbisoo aggaa agooyyo. Ixxi am godabonne hee'ukkuuyyim Keesammi Ayyaaninne wo'mmaakkoohan ihookko.

16Lobakat Isra'ee'l oosom ixxuwwina Moollanni ihu Waa'i kollonne dabarookko.

17Anno'i tiiro oosaannonne dabareena, ijaajamoobee'i keenom ijaajamoo kee'n tiironne dabareenaa ee'isinne gudu minaadaba Moollannina gudiseenaa Waa'i Eeliyaasina uwwu malaayyinnee Keesammi Ayyaaninnee Moollanni illagenne marookko» yukko.

18Zakkaaryaasim Waa'i asse'amaanchina «Anii i mi'n amaa lomma'nninummi bikkina ku woshshi hinkid iheena xanookko?» yukko.

19Waa'i asse'amaanchim dabaraa «An ka mishiraachcha kiina kuroommisina asse'amaammo; an Waa'i illagenne uulloommi Gabri'eelatte.

20Amman afoohaare wo'mmoo woshsha an kurummaare at amma'nnitbee'i bikkina ku woshshi iheebe'e woccaa xantoobee'isina ki suum duudookko» yukko.

21Keesammi Minenne Zakkaaryaas dasu bikkina biiranne egeraa hee'u manni maalalukko.

22Ixxim firu ammanenne ixxuwwinne woceena xanubee'i bikkina angi mare'inne moo'isukkaare Keesammi Minenne mat luwwa kaaltanne moo'ukkisa laqqo'o. Duud ihaatem hee'ukko.

23Zakkaaryaasim awwaadoo amman beeddaa lasage mine elle'ukko.

24Hofqax ammaniinsi lasage ixxi are Eelsaabeexe lamfoorette ikko'o. Eelsaabeexem «Kaba i Moollanni eese tiiru ammanenne manni eese gadu gado'o iinniinsi hooreena kaka iina issaakko» yita'a onti agana maaxanto'o.

26Eelsaabeexe lamfoorette ikko'i loh aganina Waa'i asse'amaanchi Gabri'eel Galiilanne yoo Naazireexxi beero'o Waa'i beyyiinsi asse'amukko.

27Ixxim asse'amukkok Daawiit moolliinsi qaramaakkoo Yooseefa yakkam manchina xeehanto'oo baajaam landichchi beyyi hee'ukko. Ee landichchokim summi Maaraamette.

28Waa'i asse'amaanchim is beyyo waaraa «Taa xummattennihe? Waa'i kiinninnette. At Waa'i maasse'aakkookkotane» yukko.

29Ihukkaarem Maaraame ixxi wocu woshshanne lobakata muggita'a «Ku hinkido'i xummaato?» yita'a is wodanonne sawwito'o.

30Waa'i asse'amaanchim Maaraamena «Waa'i keese iittoo bikkina baddititte!

31At lamfoorette ikkaa goonchi beeto qattootto. Ixxi summam Yesuusa yitootto.

32Ixxim loban ihaa hundam xanoo Waa'i Beeto yamamaa weeshamookko. Moollanni Waa'im ixxena anni Daawiitika adilla'n barcuma uwwookko.

33Ixxim Yaaqoob shumo'onne heer heerinam adil ihookko. Ixxi adillaninam tungi bee'ane» yukko.

34Maaraamem Waa'i asse'amaanchina «An baajaamotte ihummi bikkina ku woshshi hinkid iheena xanookko?» yito'o.

35Waa'i asse'amaanchim isena dabaraa «Keesammi Ayyaan keesenne dillookko. Waa'i malaayyim keesenne usheexxoo bikkina oo qaramoo keesammi beet Waa'i Beeto yamamookko.

36Oono'o, ki qarmancho Eelsaabeexem alceennatte yakku'uuyyi hee'lla'a kaba lommannanonne lamfoorette ikko'aanniinsi kuk loh agana.

37Mashka'oomim Waa'a kaa'oo luwwi mahim bee'e» yukko.

38Odim Maaraame dabatta'a «Oono'o, an Waa'ina awwaadaanchotte; at yittisam ihona» yito'o. Waa'i asse'amaanchim iseensi annanni ihukko.

39Hofqax ammaniinsi lasage Maaraame Eelsaabeexe moo'lleena duunaam Yihuxxi uullanne yoo beero'o qaqqissa'a matto'o.

40Maaraamem Zakkaaryaas mine aagga'a Eelsaabeexe xummaatisso'o.

41Maaraame Eelsaabeexe xummaatisso'i ammanenne Eelsaabeex godabonne ciilichchi xophukko. Eelsaabeexennem Keesammi Ayyaan dillukkaare

42sagara iimaa'lla'a «At meenti lambe'enne maasse'antaattookkotane; kiinniinsi qaramoo ciilim maasse'amaakkoohane!

43I Moollannina ama at eese moo'lleena waarimmi hinkid labookko?

44Mashka'oomim at eese xummaatissitti ammanenne i godabonne ciilichchi liiranchinne xophukko.

45Moollanni kiina wocu woshshi wo'mmoohan ihukkisa amma'nnitti bikkina maasse'antaattookkotane» yita'a wocco'o.

46Maaraamem «Waa'i eese gadamaammoo awwaadaancho moo'u bikkina Moollanna lonsoommo. Eese Gatisaanchi Waa'annem liiramoommo. Malaayyaam Waa'i iina lobakat luwwa issu bikkina kaballiinsi ki'isaa qaranchi hundim eese ‹Maasse'antaattookkotane› yookko. Summim ixxek keesamma.

50Ixxo lonsitam keenina qaranchiinsi qaranchanne afeebe'em qishixxookko.

51Ixxi wodinnem malaayyaam baxo baxookko. Bolxitam keenom ixxuwwi sawwitinnem binnaa'ookko.

52Malaayyaam adilluwwam ixxuwwi adilla'n barcumiinsi dilliisaakko. Woroon yoo keenom iimiimaa'aakko.

53Sibaatto'i keeno er luwwinne goddisaakko. Ihukkaarem goddaan keeno kora'i angam mattamisa issaakko.

54Waa'i niyyanno'ina Abrihaaminaa Abrihaam shumo'inaa wocukkisam doolli hundinam qishixxukkuuyyi ixxena awwaadaanchi Isra'ee'l minaadabina hara'mmaakko» yito'o.

56Maaraame Eelsaabeexenne maqire sas agana afuutta'a lasage is mine daba'llita'a matto'o.

57Eelsaabeexe qattam amman afukkaare goonchi beeto qatto'o.

58Is olla'ii qarmannii moollanni isena lobakata qishixxukkisa macceessa'a hundim isenne maqire liiranto'o.

59Ciilichchi qaramu sadeenti ayyaamonnem ballachchisseena waatto'o. Ixxuwwim ee ciilichchika summa anni summanne Zakkaaryaasa yita'a fissiteena hassa'a hee'llo'o.

60Ihukkaarem ciilichchi ama dabatta'a «Ihooyyo! Ixxek summi Yohaannisatte yamamona» yito'o.

61Ixxuwwim Eelsaabeexena «Ki'nnuwwi qarmanniinsi ka summanne weeshamukkok matim bee'e» yito'o.

62Ixxuwwim ixxi annina «Ki beetika summa ayyee yitaa fissimma iittitootto?» yita'a mare'inne xa'mmito'o.

63Zakkaaryaasim kitaabaa kuroo luwwa xa'mmaa «Ixxi summi Yohaannisatte» yaa kitaabukkaare hundim maalalto'o.

64Ee ammanchom ixxek suum fooqukko. Allabim tiramukko. Ixxim Waa'a galaxxukkuuyyi wocimma asheerukkaare

65olla'i manni hundim baddito'o. Oo woshshim duunaam Yihuxxi uullanne hundannem afukko.

66Ee ciilichchinne maqirem Waa'ik malaayyi hee'u bikkina ee woshsha macceesso'i manni hundim «Ku ciilichchi hinkido'an iheenatte?» yita'a ixxuwwi wodanonne sawwito'o.

67Ee ciilichchi anni Zakkaaryaasanne Keesammi Ayyaan dillukkaare hiraago wocukkuuyyi

68«Ixxi minaadaba hara'mmeena waaru bikkinaa gatisu bikkinaa Isra'ee'l Moollanni Waa'i galaxxamaakkoohan ihona.

69Ixxi doo'llu hiraagaa'n kollinne ihaa lobakat doolliinsi illageen wocukkisam neese ni diina'iinsii neese sabbam keen hundiinsii gatisoo'isina ixxena awwaadaanchi Daawiit shumo'iinsi malaayyaam Gatisaancho niina ki'isaakko.

72Ixxo ki'isukkokim niyyanno'ina ‹Qishixxoommo› yaa wocukkokaa niyyanni Abrihaamina hide'u keesamaakkoo ixxi hidiroo tiiraatette.

74Ixxi aagu hidirim neese diina'i angiinsi wolabbanonne fillaa baddinoo'n ixxena awwaandoommisinatte.

75Ee'isam ni heechchi doollenne hundannem Waa'i illagenne miiqakkam luwwi bee'i mucculluwwi inkaa hee'nnoommisinatte.

76Kaa i beeto, at Moollannina googo gudisseena ixxi illagenne higgaa mattoo bikkina at ‹Hundam xanoo Waa'i hiraagaancho› yamantootto.

77Waa'i ixxuwwi baaxiilo haafaa gatisoo'isa ixxi minaadabina la'issootto.

78Oohim iheena xanookkok Waa'i kollinne niina eelliinchisa firookkok waaroo ammane Niyyanni Waa'i biijoominnee qishixxatinnettee.

79Ixxim tuunsonnee leh haf woronnee yo'i keenina caakka caakkisookko. Neesem xummi googonne awwonsookko» yukko.

80Ciilichchim uullichchaa tiiroo li'ukko. Ixxim Isra'ee'l minaadabina ixxi baxinne la'amoo balli afeebe'e udma'i uullanne hee'ukko.