Luke 7

hadiyya

← Chapter 6 Jump to: Chapter 8 →

1Yesuus wocam hee'u woshshi hundam mannina wocaa guullaa lasage Qifirinnaahoom beero'o aagukko.

2Mat Oroomekkichchi xibbi halaqichchina lobakata iittoo awwaadaanchi hee'ukko. Oo awwaadaanchim xissaa leheena ihaa hee'ukko.

3Oo xibbi halaqichchi Yesuus bikkina macceesu ammanenne ixxi awwaadaancho waaraa fayyiisoo'isina Ayihuxxi manni lommanna Yesuus beyyo asse'ukko.

4Ixxuwwim Yesuus beyyo waatta'a «Ni minaadaba iittookkok niinam wixxixxi mine baxisaakkoo xibbi halaqichchik awwaadaanchi xissu bikkina kaba at ixxo fayyiisimmi hasisookko» yita'a qoxxissa'a uunxito'o.

6Ee bikkina Yesuus ixxuwwinne maqirem marukko. Maraa xibbi halaqichchi minenne hincu ammanenne xibbi halaqichchi Yesuus beyyo manna asse'aa «Moollanna, at i mine aaggeena an laboombee'an ihummi bikkina waatteena hawwititte!

7Anim ki beyyo waareena laboomman ihaa i gaga xigoommoyyo. Ee bikkina ki suuminne mat luwwa woce; i awwaadaanchi fayye'ookko.

8An i gagim mulli keenina ijaajamoomman ihummuuyyi odim iinniinsi woroon an ijaajoommi gaadaan yo'o. Ixxuwwiinsim mato ‹Mare› yoommaare marookko. Odim mullaanninam ‹Waare› yoommaare waarookko. I awwaadaanchom ‹Kaka isse› yoommaare ixxim issookko» yukko.

9Yesuus eekka macceesu ammanenne ee xibbi halaqichchonne maalalaa ixxo awwonu minaadaphphi kollonne daba'llaa «An ki'nnuwwina kuroommo; kido'i qoxxaalli amma'nnat yoo mancho Isra'ee'l minaadabannem siidummoyyo» yukko.

10Oo asse'anto'i keenim mine daba'llita'a waatto'i ammanenne awwaadaanchi fayye'aakkoo moo'llo'o.

11Hoffi ammaniinsi lasage Naayina yakkam beero'o Yesuus marukko. Ixxenne maqirem losaanii lobakat minaadabii matto'o.

12Yesuus ee beero'ika gooca afeena ihaakkoohaannonne leesha iyyaakkoo manni beero'iinsi firukko. Oo lehu manchim amana mexxokkichchom hee'ukko. Isem busar meentichchotte hee'llo'o. Ee beero'ik lobakat minaadab isenne maqire hee'ukko.

13Moollanni ee meentichcho moo'u ammanenne isena qishixxaa «Wi'llititte!» yukko.

14Ee lasage maraa hallaqqa nakkukkaare leesha iyyu manni uullukko. Yesuusim «Kaa woraadichcho, an keese ‹Iimihe› yoommuulla; iimihe!» yukko.

15Lehu manchim afuuraa wocimma asheerukko. Yesuus ee mancho amana dabaraa uwwukko.

16Ixxuwwi hundim baa'llo'o. Ixxuwwim «Ni lambe'enne hiraagaanchik malaayyaam ki'aakko. Waa'i ixxi minaadaba gatiseena waaraakko» yitu'uuyyi Waa'a galaxxito'o.

17Ixxi sadim Yihuxxaannonnee ee kululleetanne yoo uulli hundannee macceesamukko.

18Yohaannis losaan ee woshsha hundam Yohaannisina kutto'o.

19Yohaannisim ixxi losaaniinsi lamo weeshaa « ‹Waarookko› yakko'i Kiristoos atettennii te'im mulleka egelloo?» yaa Moollanni beyyo asse'ukko.

20Oo asse'anto'i mannim Yesuus beyyo waatta'a «Xammaqaanchi Yohaannis ‹ «Waarookko» yakko'ok atettennii te'im mulleka egello?› yaa asse'aakko» yito'o.

21Yesuus ee ammanchom manna xissiinsii jabbiinsii fayyiisukko. Habusam fissukko. Lobakat qooqquwwam fooqaa'ukko.

22Ixxim asse'anto'i keenina «Mattakka'a Yohaannisina moo'llakko'okaa macceessakko'i luwwaa oohim ‹Qooqquwwi moo'llamuulla. Shiihuwwim taakke'llamuulla. Oddomachchonne firoo baddisoo jabbiinsim manni fayye'aa muccuroolla. Gawwuwwi macceessamuulla. Leto'i keen lehiinsi ki'llamuulla. Bux keenina mishiraachchi sagar kuramoolla.

23Eesenne malamoobee'ek maasse'amaakkoohane› yaakko yitakka'a kullehe» yaa dabarukko.

24Oo asse'anto'i manni elle'lla'a lasage Yohaannis bikkina Yesuus minaadabina «Udma'a mattakko'ok maha moo'llakkeenatte? Hafachchi heekkeesoo shasha moo'llakkeenattennihe?

25Eehaara'i maha moo'llakkeena mattakko'o? Danaam eddechcha edde'u mancho moo'llakkeenattennihe? Oono'o! Wereeggi eddechcha edde'lla'a heellantu'uuyyi hee'llam keen adilluwwi minenne yo'o.

26Eehaara'i maha moo'llakkeena mattakko'o? Hiraagaanchonnihe? Eeyya, an ki'nnuwwina kuroommo; hiraagaanchiinsim lophphookkoka moo'llakkeenatte.

27Keesammi Kitaabanne ‹Oono'o! Kiina googo gudisoo i asse'amaancho ki illagenne asse'oommo› yamamaa kitaabamukkok Yohaannis bikkinatte.

28An ki'nnuwwina kuroommo; qaramu mannanne Yohaannisiinsi lophphookkok matim bee'e. Ihukkaarem hundiinsim hoffe'ookkok Waa'i adillanonne ixxeensi lophphookko» yukko.

29Yohaannis xammaqam hee'u xammaqanchanne xammaqanta'a hee'llo'i bikkina eekka macceesso'i manni hundim qaraxaanim gattoo'n Waa'i bax hanqo'an ihukkisa qoossito'o.

30Ihukkaarem Farisaawe'uwwii Seera losisaanii Yohaannis xammaqoo xammaqanchanne xammaqantobee'i bikkina Waa'i sawwu sawwite sabbo'o.

31Odim Yesuus «Ka doollenne yoo manna mahinne kobi'llisoommo? Ixxuwwi hinkido'i manna?

32Ixxuwwi kobi'llitamok meeranne afuutta'a ixxuwwina'i ixxuwwim ‹Dibbe'e aphphinsummo, kaddakko'oyyo; sollummo, wi'llitakko'oyyo› yaqqanta'a weeccantam ooso kobi'llitamo.

33Xammaqaanchi Yohaannis soommanukkuuyyii woyi'n diqaasa agoo'nnii waarukkaare ‹Habus amadaakkoohane› yitakko'o.

34Manchi Beeto itukkuuyyii agukkuuyyii waarukkaare ‹Moo'llehe; kuk itaahii agaahii hoogoobee'i gollaancho! Qaraxaaninaa baaxiilaaninaa beshichcho› yitakko'o.

35Ihukkaarem Waa'ik qooroom hanqo'isa la'amookkok qoolluwwi beyyonnette» yukko.

36Farisaawe'uwwiinsi mat manchi Yesuus ixxenne hurbaata itoo'isina weeshukkaare Yesuusim ee Farisaawekkichchi mine aagaa maadda iteena afuurukko.

37Oono'o! Ee beero'onne mat baaxiilaancho meentichcho Farisaawekkichchi minenne Yesuus hurbaata iteena afuurukkisa macceessa'a albaasxiroos bilqaaxanne wo'mmaakkoo shitto'o eebbo'o.

38Isem afaree'n kollinne waatta'a wi'llitu'uuyyi indiiddinne ixxi lokko aashisimma asheetto'o. Ee indiiddam is horoo'l saraatinne shiinshita'a lokko suunqito'o. Ixxi lokkonnem shitto'o labbo'o.

39Hurbaata itiseena Yesuusa massu Farisaawekkichchi ee ammane eekka moo'aa ixxi wodanonne «Tu ixxo nakkitam meentichcho baaxiilaanchotte ikko'i bikkina ku manchi hiraagaanchi ihuta'n ise ayyetda'ee hinkido'i meentichchotda'ee ikko'isa la'am hee'ukko» yaa sawwukko.

40Yesuusim ixxena dabaraa «Simi'oona, an kiina kuroommi luwwi yookko» yukko. Simi'oonim dabaraa «Losisaancho! Maruwwa?» yukko.

41Odim Yesuus «Mat manchiinsi liqaayyo aa'llo'oo lam manchi hee'llo'o. Ixxuwwim aa'llo'ok matii onti xibbi diinaara, la'mmekim ontayyi diinaar hee'ukko.

42Oo liqaayyo aa'llo'i lamem mannim miqimma hooggo'aare liqaayyisu manchi lamikam urukko. Ee lasage ee lamem manniinsim lonsaa iittookkok hinkane?» yukko.

43Simi'oonim «Iina laboo'isina lonsaa iittookkok lobakat badanchi uramukkane» yaa dabarukko. Yesuusim ixxena «Hanqa oogattaatto» yukko.

44Yesuusim ee meentichchi kollonne ille dabaraa Simi'oonina «At ka meentichcho moo'lloollannihe? An ki mine aagummaare at i lokkina wo'om uwwittoyyo. Ihukkaarem ise indiiddinne i lokko aashissa'a is horoo'l saraatinne shiinshito'o.

45At eese suunqittoyyo. Ihukkaarem ise ka mine aagummaanniinsim ki'issa'a i lokko suunqimma utto'oyyo.

46At i horoorenne zaytam labbittoyyo. Ihukkaarem ise i lokkonne shitto'o labbo'ookko.

47Ee bikkina an kiina kuroommo; ise eese lobakata iittito'ok isek lobakat baaxiil haafamu bikkinatte. Ihukkaarem hoffi baaxiil haafamukkok hoffokam iittookko» yukko.

48Yesuusim ee meentichchona «Ki baaxiil haafamaakko» yukko.

49Ee bikkina ixxenne maqire hurbaata itteena afuutto'i keen «Ku ‹Ki baaxiil haafamaakko› yookkok ayyette?» yita'a ixxuwwi wodanonne sawwito'o.

50Ihukkaarem Yesuus ee meentichchona dabaraa «Ki amma'nnat keese gatisaakko. Xumminne mare» yukko.

← Chapter 6 Jump to: Chapter 8 →