Luke 9 — hadiyya

1Tommoo lamem losaano Yesuus ixxi beyyo mat issaa weeshaa habusa fissitamisinaa jabbi hundiinsim fayyiissamisinaa malaayye uwwukko.

2Ixxuwwim mannina Waa'i adilla'n bikkina alallaattamisinaa jabbaanom fayyiissamisinaa asse'ukko.

3Ixxim ixxuwwina «Ki'nnuwwi googina bicci ihukko te'im can ihukko te'im hurbaat ihukko te'im diinat ihukko te'im lago'i eddechchi ihukko maham amaddakkotte.

4Ayyi minem koyyinano aaggakkolas ee gattiinsi fittakkeebe'e ee minenne afuullehe.

5Ayyi beyyonnem ki'nnuwwa aa'akkobeelas ee beyyo uttakka'a fittakkam ammane ki'nnuwwi lokkiinsi dira giggissehe. Oohim ‹Ki'nnuwwi quuxo› yimmi mare'e» yukko.

6Ee bikkina ixxuwwi fitta'a mishiraachchi sagara gatti hundannem kuttu'uuyyii beyyi hundannem jabbaano fayyiissu'uuyyii matto'o.

7Ee iham hee'u luwwa hundam Galii'l uulla gassaanchi hee'u Heeroodis macceesu ammanenne ixxek mal bi'ukko. Mashka'oomim mat mat manni «Yohaannis lehiinsi ki'aakko» yitam hee'llo'o.

8Mulli keenim «Eeliyaas waaraakko» yitam hee'llo'o. Odim mulli keenim «Eraa'l hiraagaaniinsi mat ki'aakko» yitam hee'llo'o.

9Ee bikkina Heeroodis «Yohaannisika gaanje mussiisummo. Eehaare ku ixxi bikkina wocakku'uuyyi macceesummok ayyette?» yaa Yesuusa moo'eena mixukko.

10Awwonaanim asse'anto'i beyyiinsi daba'llita'a waatta'a issito'i luwwi hundam Yesuusina kutto'o. Yesuusim ixxuwwa annanni issaa Beetesaayid beero'o amadaa marukko.

11Eekka laqqo'i ammanenne lobakat manni ixxo laseesso'o. Ixxim ixxuwwa aa'aa Waa'i adilla'n bikkina kurukko. Fayye'immi hasisoo keenom fayyiisukko.

12Uulli hiimeena ihaa hee'u bikkina tommii lamem losaanim ixxi beyyo waatta'a «Neese yoommine'ek udma'annetti ihu bikkina ku manni ka kululleetanne yoo gattuwwanne matta'a gattamisinaa ittam luwwa siixxitamisinaa geegeese» yito'o.

13Ihukkaarem Yesuus ixxuwwina «Ka mannina ittam luwwa ki'nnuwwi uwwehe» yukko. Ixxuwwim dabatta'a «Ka manni hundinam ihoo hurbaata beero'o mallaa bito aa'nnumbeelas niina onti xeffo'i qorosho'iinsii lam qurxumme'iinsii bagaan bee'e» yito'o.

14Ee beyyonne onti kuma ikkamqax manni hee'llo'o. Yesuusim ixxi losaanina «Ontayyi ontayyi issitakka'a afuussehe» yukko.

15Ixxuwwim ixxi yukkisa issita'a hundam afuussito'o.

16Yesuusim ontem xeffo'i qorosho'oo lamem qurxumme'ee aa'aa iimane moo'aa Waa'a galaxxukko. Ee lasage mannina uwwitamisina iiqaa losaanina uwwukko.

17Manni hundim itaa goddaa gatu giggira tommonnee lam sanfonnee wonshita'a ki'isso'o.

18Mat ayyaamo Yesuus mullam Waa'a uunxukkuuyyi ixxi losaan ixxi beyyo waatto'o. Yesuus ixxuwwina «Manni eese ayyette yoolla?» yaa xa'mmukko.

19Ixxuwwim dabatta'a «Mat mat keen ‹Xammaqaanchi Yohaannisatte› yitamuulla. Odim mulli keen ‹Eeliyaasatte› yitamuulla. Mulli keenim ‹Eraa'l hiraagaaniinsi mat ki'aakko› yitamuulla» yito'o.

20Yesuusim ixxuwwina «Eehaare ki'nnuwdu eese ayyette yitakkamuulla?» yukkaare Pheexiroos dabaraa «At Kiristoosatte» yukko.

21Ihukkaarem Yesuus eekka ayyenam kuttambee'isa qoxxisaa ijaajukko.

22Odim Yesuus ixxuwwina «Manchi Beet lobakata hawwimmi hasisookko. Ixxom lommanni, qeessa awwonsaanii Seera losisaanii sabbamoo shitamomee. Ihona bagaan saxxi ballanne lehiinsi ki'ookko» yukko.

23Odim Yesuus hundinam «Ayyim eese awwoneena hasulas ixxi gaga lagona. Ixxim ballina ballina lehina gudaa eese awwonona.

24Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok hundim ixxi foore gatisookko.

25Mat manchi ka uulli amaxxa hundam siixxaa ixxeka foore bi'isuta'n ixxena maha awwaadookko?

26Ayyim eesennee i sagarannee tuurulas Manchi Beet ixxi lombinne, Anni lombinnee keesammi asse'amaa'n lombinnee waaroo ammane ixxonnem tuurookko.

27Hanqinam an ki'nnuwwina kuroommo; ka beyyonne yo'i keeniinsi Waa'ika adillano moo'lloo'n gaassita'a letambee'i keen yo'o» yukko.

28Yesuus eehid yukkaanniinsi sadeenti balla ihooqaxa ihaakkoohaannonne ixxenne maqirem Pheexiroosa, Yohaannisaa Yaaqoobaa amadaa Waa'a uunxeena duuna firukko.

29Waa'a uunxukkuuyyim ixxek illi kolli mulli hagaranne daba'llukko. Ixxi eddechchim belecce'oo qadaalli ihukko.

30Oono'o! Lam manni ixxenne maqire atoorattam hee'llo'o. Ixxuwwim Muse'ettee Eeliyaasattee hee'llo'o.

31Oo lombinne moo'anta'a atoorattam hee'llo'i woshshim Yerusaalee'm beero'onne Yesuus lehimminne Waa'ika sawwite hinkid wonshooda'ette hee'ukko.

32Ihukkaarem Pheexiroosaa Pheexiroosinne maqire hee'llo'i keenoo kee'mmaalli diriichchi amadaa hee'ukko. Ixxuwwim baqito'i ammanenne ixxi lombaa ixxenne maqire uullita'a hee'llo'i lamem manchoo moo'llo'o.

33Oo mannim Yesuusiinsi annanni ikku'uuyyi Pheexiroos Yesuusina «Moollanna! Ka beyyonne hee'immi niina danaam ihu bikkina sas daasa kiina mato, Muse'ina mato, Eeliyaasina mato banxona» yaa mayyuda'e la'oo'nnim wocukko.

34Pheexiroos eekka woconam umbu'l waaraa ixxuwwa ifiisukko. Ixxuwwim umbu'l ifiisu ammanenne baddito'o.

35Ee umbu'l woriinsim «An doo'llummi i Beet kane; ixxeensim macceessehe!» yoo sagar waarukko.

36Oo sagar macceesamaa lasage xale'i Yesuusa moo'llo'o. Ee ammane ixxuwwi ee moo'llo'i luwwa ayyenam maham kuttoo'n cawwita'a utto'o.

37La'm balla duuniinsi ixxuwwi dillito'i ammanenne lobakat minaadab Yesuusinne edanto'o.

38Ee minaadaphphi lambe'iinsim mat manchi «Losisaancho! Iina yookkok ka mexxo'i beetichcho. Ixxom habus amadaa dangonnem laassiisookko. Ga'nnansukkuuyyi aqinne himba eebisaa iiqansaa hawwona urookko. Ki losaan fissitamisina uunxummo. Ihukkaarem fissiteena xanto'oyyo. Ee bikkina at ixxo moo'e» yaa uunxukko.

41Yesuus dabaraa «Ka amma'nnatbee'i boqqi qarancha? An hinkaa'n amman afeebe'e ki'nnuwwinne hee'oommo? Hinkaa'n amman afeebedu ki'nnuwwika iyyaqqoommo?» yaa «Huno'o, ki beeto keyye eebe» yukko.

42Oo beet waaronam habus uullanne ubbuusaa ga'nnansukko. Ihukkaarem Yesuus ee habusa ijaajaa beetooma fayyiisaa ixxi annina dabaraa uwwukko.

43Ixxuwwi hundim Waa'ika lob malaayye moo'lla'a maalalto'o. Yesuus issu luwwi hundannem manni hundim maalaltonam Yesuus ixxi losaanina

44«An ki'nnuwwina kuroommoka qoossitakka'a macceessehe. Manchi Beeto manni anganne higisakka'a uwwakkamo» yukko.

45Ihukkaarem oo woshshi ixxuwwiinsi daphphaa hee'u bikkina mayyimda'e qoossiteena xanto'oyyo. Ee woshsham ixxo xa'mmiteena baddito'o.

46Losaan «Ni lambe'iinsi lophphookkok ayyette?» yita'a fitancha asheetto'o.

47Yesuusim ixxuwwi woda'nneka la'aa ciilichcho massaa ixxi gadanonne uullisukko.

48Uullisaa ixxi losaanina «Ki'nnuwwi lambe'iinsi hundiinsi hoffok hundiinsim lobane. Ee bikkina ayyim ka ciilichcho i summinne aa'ookkok eesem aa'ookko. Odim eese aa'ookkok ayyim eese asse'ukkokam aa'ookko» yukko.

49Yohaannis Yesuusina «Moollanna! Mat manchi ki summinne habusa fissukkuuyyi moo'nnaa niinninne maqire keese awwonoobee'i bikkina fisseena hoollummo» yukko.

50Ihukkaarem Yesuus ixxena dabaraa «Ki'nnuwwa saboobee'ek ki'nnuwwan ihu bikkina hoottakkotte» yukko.

51Yesuus iimane maroo amman hincu ammanenne Yerusaaleema mareena murte'aa ki'ukko.

52Ixxim ixxeensi gaassita'a mattamisina asse'amaano asse'ukko. Oo asse'amaanim hundi luwwam gudisseena Samaare'i gatte matta'a aaggo'o.

53Ihukkaarem Yerusaaleema Yesuus maram hee'u bikkina ee beyyi manni ixxo aa'llo'oyyo.

54Ixxi losaan hee'llo'i Yaaqoobii Yohaannisii eekka moo'llo'i ammanenne «Moollanna! Iimaniinsi giir dillaa ixxuwwa itoo'isa issinona hassoohonnihe?» yito'o.

55Ihukkaarem Yesuus ixxuwwi kollonne daba'llaa «Manchi Beet waarukkok manni foore gatiseenatte bagaan bi'iseenayyo» yukko.

56Ixxuwwim mulli gatte matto'o.

57Mattu'uuyyim googonne hee'llonam mat manchi Yesuusina «At mattoo beyyi hundam keese awwonaa maroommo» yukko.

58Yesuusim ixxena dabaraa «Wengereellina bar yookko. Iimaninne bararoo cii'inam do'n yookko. Ihukkaarem Manchi Beetina aagaa usheexxoo beyyim bee'e» yukko.

59Yesuusim mulli manchina «Eese awwone» yukko. Ihukkaarem oo manchi dabaraa «Moollanna! Gaassaa maraa iyyanna waammoommo» yukko.

60Yesuusim ixxena «Lehu keeno lehu keenim waammona; at uttaa mattaa Waa'i adilla'n woshsha alallaate!» yukko.

61Odim mullekim «Moollanna! An keese awwonoommo. Ihukkaarem gaassaa maraa i mi'n manna ‹Xumma hee'llehe› yoommo» yukko.

62Yesuusim dabaraa «Ayyim abuulleena kado'o amadaa laso daba'llaa moo'ookkok Waa'i adillanonne hee'eena labooyyo» yukko.