Luke 19

hadiyya

← Chapter 18 Jump to: Chapter 20 →

1Iyyaarko'i beero'o Yesuus aagaa eeheenim higam hee'ukko.

2Eehe'em qaraxaanina awwonsaanchi ihu mat Zakkiwoosa yakkam goddaanchi hee'ukko.

3Zakkiwoosim Yesuus hinkanda'e ihukkisa moo'eena hasaa hee'ukko. Ihukkaarem ixxek uullichchi gundi ihu bikkina manni lophphimmiinsi ki'ukkok moo'eena xanukkoyyo.

4Yesuus ee googinne higam hee'u bikkina illageen higaa moo'eena geeraa mat odakkichchonne firukko.

5Ee lasage Yesuus ee beyyo afu ammanenne iim moo'aa ixxena «Zakkiwoosa, an kaballa ki minenne hoseena hasummi bikkina iimaniinsi qaqqissaa dille» yukko.

6Zakkiwoosim qaqqisaa dillaa liiranchinne aa'ukko.

7Mannim eekka moo'llo'i ammanenne «Baaxiilaanchi manchi mine koyyinano marukko» yita'a hundim quunquunto'o.

8Zakkiwoosim uullaa Moollannina «Oono'o, Moollanna! Iina yoo luwwiinsi buxina kollo uwwoommo. Ayyeensim aphphisansaa aa'aammoo luwwi yoolas soor suum issaa dabaroommo» yukko.

9Yesuusim ixxena «Ku manchi Abrihaam beet ihu bikkina kaballa ka mi'n manni gataakko.

10Mashka'oomim Manchi Beet waarukkok bi'llo'i keeno haseenattee gatiseenattee» yukko.

11Mannim Yesuus kobi'llishshinne wocam hee'ukkoka macceesso'o. Ee ammane Yerusaaleema Yesuus afeena ihaa hee'u bikkina Waa'i ixxuwwanne adil ihoo amman afukkoka labissa'a hee'llo'o.

12Ee bikkina kobi'llishshinne Yesuus «Mat geejji manchi adillano aa'aa daba'lleena qee'l uulla marukko.

13Oo manchim ixxi awwaadaaniinsi tommo weeshaa annannichchinam mat mat xibbi diinaara uwwaa ‹An waareembe'e ka diinatinne daddallehe› yukko.

14Ihukkaarem ixxi uulli manni ixxo sabbam hee'llo'i bikkina ‹Ku manchi waaraa neesenne adil ihona hansoommoyyo› yita'a ixxi lasonne asse'amaano asse'llo'o.

15Oo manchi adillano aa'aa daba'llu ammanenne woddaa'i daddattamisina diinate uwwu awwaadaan daddatta'a hinkaa'nna qassiissoda'e xa'mmeena ixxi beyyo weeshisukko.

16Ee lasage luxxi awwaadaanchi waaraa ‹Moollanna, ki diinat tommi suume qaraakko› yukko.

17Moollannim ixxena ‹At amma'nnantaattoo er awwaadaancho, danaamisa issitaatto. Hoffi luwwanne amma'nnantaattoohan ikkitti bikkina tommi beero'ina gassaanchi issoommo› yukko.

18La'mmekim waaraa ‹Moollanna, ki diinat onti suume qaraakko› yukko.

19Moollannim ‹Atim onti beero'uwwa gassitona daannooma uwwaammo› yukko.

20Ee lasage mullekim waaraa ‹Moollanna, at dissitbee'ekamii massitoo wixxitbee'ekamii muttoo mogaalli manchi ikkittisa la'aa baddummi bikkina suusinne karaa dissummi ki diinat oono'o!› yukko.

22Ixxi moollannim dabaraa ‹Kaa jor awwaadaancho, an ki suumiinsi firu woshshinnem keesenne oogatoommo. An dissumbee'ekamii massoommi, wixumbee'ekamii muroommi mogaalli manchi ihummisa laqqoo'isa kuttaatto.

23Eehaare an daba'llaa waaraa i diinate qarukkaanninnem a'lloommisina mahina daddaraanina uwwittoyyo?› yaa

24ixxi gadanonne uullito'i keenina ‹Diinatooma ixxeensi aa'llakka'a mat xibbi diinaar yoohaannina uwwehe› yukko.

25Ixxuwwim ixxena ‹Moollanna, ixxena eraarem kum diinaar yookko› yito'o.

26Ixxim dabaraa ‹An ki'nnuwwina kuroommo; yoohaannina ayyenam edakka'a uwwakkamo. Bee'aanniinsi ayyeensim ee yooqaxam massakkamo.

27Ihukkaarem an ixxuwwina adil ihoombee'isa sabbo'i i maso'uwwa keyye eebbakka'a i illagenne shi'llehe!› yukko» yaa kurukko.

28Yesuus ee woshsha wocaa guullaa illageen higaa Yerusaaleema marukko.

29Marukkuuyyim Wee'l Duu'n gadanonne yo'i Beetafaagee Biitaanaa yakkam gatte afu ammanenne ixxi losaa'nneka lamo weeshaa

30«Ki'nnuwwi illagenne yoo gatte mallehe. Ee gatte aaggakkam ammane ayyi manchim saa'llubee'i wotar karamaakkoo siiddakkamo. Ee wotara tittakka'a keyye eebbehe.

31Ayyi la'ukko ayyim ‹Mahina tittakkamuulla?› yaa xa'mmuta'n ‹Moollanni hasu bikkinatte› yi'llehe» yaa asse'ukko.

32Ixxuwwim matta'a hundi luchchim Yesuus yukkisam ihaa siiddo'o.

33Ixxuwwim ee wotara tittonam ee wota'l anno'i «Mahina tittakkamuulla?» yita'a xa'mmito'o.

34Ixxuwwim dabatta'a «Moollanni hasu bikkinatte» yito'o.

35Ee wotara eebba'a ixxuwwika eddechcha ee wota'l hanenne issita'a Yesuusa saa'llisso'o.

36Ixxim saa'llaa maronam manni liiramaa ixxuwwi eddechcha ixxi illagenne daham hee'ukko.

37Yesuusim Yerusaaleema afeena hincaakkoohaannonne Wee'l duuninne aad dillukkuuyyi lobakat ixxo awwontam hee'llo'i minaadab sagara iimaa'lla'a ixxi issukkuuyyi moo'llo'i maalalsiisoo luwwi hundinam liiranta'a Waa'a galaxximma asheetto'o.

38Ixxuwwim «Waa'i summinne waaroo adil maasse'amaakkoohane! Xummi iimanenne ihona, lombim Waa'ina ihona» yitam hee'llo'o.

39Ee minaadaphphi lambe'iinsi mat mat Farisaawe'uwwi Yesuusina «Losisaancho! Ka ki losaano ‹Sa'i'llehe!› yitooyyonnihe?» yito'o.

40Ixxim ixxuwwina dabaraa «An ki'nnuwwina kuroommo; ixxuwwi sa'itota'nnim ku kinneewwi shuuraa galaxxookko» yukko.

41Yerusaalee'm beero'o Yesuus afeena ihaakkoohaannonne beero'ooma moo'aa

42«Kaballa kiina xumma eeboo luwwi mada'e ihukkisa qoossitaattoota'n danaam hee'ukko. Ihukkaarem at eekka qoossittoyyo.

43Ki maso'i ki kululleeta ootta'atii fittoo beyyi hundam ifiissa'atii keese kibbita'a u'nnansitam ayyaam waarookko.

44Waa'i keese gatiseena waarukkisa at laqqibee'i bikkina oo maso'i keesee ki woronne yoo minaadabaa hundam bi'isookko. Odim ka ki woronne baxamu minneewwikii ootikii mat kinchim beyyonne gatoobee'isa gindookko» yaa wi'llukko.

45Yesuusim Keesammi Mine aagaa ee minenne daddattam keeno «Keesammi Kitaabanne ‹I min eese uunxakkam min ihookko› yamamaa kitaabamaakko. Ihukkaarem ki'nnuwwi gamaa'n ma'n issitakko'ookko» yaa Keesammi Miniinsi fissaa hollukko.

47Yesuusim ballina ballina Keesammi Minenne losisam hee'ukko. Qeessa awwonsaan, Seera losisaanii minaadaphphi awwonsaanii ixxo shiteena hasso'o.

48Ihukkaarem lobakat manni ixxi losishsha ma'lluchchim gatoobee'isa macceessam hee'llo'i bikkina shitam googo siiddeena xanto'oyyo.

← Chapter 18 Jump to: Chapter 20 →