Luke 20

hadiyya

← Chapter 19 Jump to: Chapter 21 →

1Mat ayyaamo Keesammi Minenne manna Yesuus losisukkuuyyii mishiraachchi sagara kurukkuuyyii hee'onam qeessa awwonsaan, seera losisaanii lommannii mat ikka'a waatta'a Yesuusina

2«At kaka issitoo'isa issukkok ayyette? Te'im kaka issitona kiina malaayye uwwukkok ayyette?» yita'a xa'mmito'o.

3Yesuusim ixxuwwina «Huno'o anim ki'nnuwwa mat xa'mmichcha xa'mmoommo; kullehe.

4Manna Yohaannis xammaqoo'isa issukkok Waa'annii manna?» yukko.

5Ee ammanenne ixxuwwina'i ixxuwwim «Mayyino? Waa'a yinumlas ‹Eehannah ixxi yukkoka mahina amma'nnitakko'oyyo› yookko.

6Manna yinumlas manni hundim hiraagaanchi issaa Yohaannisa amma'nnoo bikkina neese kininne aphphissa'a shitamo» yita'a a'llanta'a

7«Ayyeensetda'e ihukkisa lanqoommoyyo» yita'a dabatto'o.

8Yesuusim ixxuwwina «Anim ka keeno mah malaayyinne issoommuulda'e ki'nnuwwina kuroommoyyo» yaa dabarukko.

9Minaadabina ka kobi'llishsha Yesuus kurukko. Ixxim «Mat manchi woyina kaasukko. Ee kaasu woyi'n kaashsham abuullaanina uwwaa lobakat ammanina mulli uulla marukko.

10Oo woyi'n kaashshi annichchim woyi'n misha feerakkam amman afukkaare woyi'n mishika uwwitamisina abuullaa'n beyyo awwaadaancho asse'ukko. Ihukkaarem abuullaan ee awwaadaancho ganta'a kora'i angam daba'lloo'isa issito'o.

11Odim la'mmekam mulli awwaadaancho asse'ukko. Ihukkaarem oo abuullaan ee awwaadaanchom ganta'atii sholliissa'atii kora'i angam dabatta'a hollito'o.

12Saxxi korem mulli awwaadaancho asse'ukko. Abuullaanim madissa'a woyi'n kaashshi woriinsi fissita'a uunjito'o.

13Ee lasagem oo woyi'n kaashshi annichchi ‹Maha issumta'n e'llookko? Hanqinam iikka lobakata iittoommi beeto asse'ummaare hayditamo› yaa ixxuwwi beyyo asse'ukko.

14Ihukkaarem oo abuullaan ee beeto moo'lla'a ixxuwwina'i ixxuwwim ‹Lagaanchi kanena'e; lag niihan ihoo'isina ixxo shinona!› yito'o.

15Ee bikkina ee beeto amadda'a woyi'n kaashshi beyyiinsi biiranne fissita'a shito'o. Eehaara'i oo woyi'n kaashshi annichchi ee abuullaano maha issookko?

16Ixxim waaraa ee abuullaano shookko. Woyi'n kaashshoomam mulli keenina uwwookko» yukko. Ixxuwwim eekka macceesso'i ammanenne «Eehido'i luwwa Waa'i eeboone» yito'o.

17Ixxim ixxuwwa moo'aa «Keesammi Kitaabanne ‹Kininne mine baxxam keen awwaadooyyo» yita'a uunjito'i kinchi hundiinsim lobakata lophphaa awwaadoo kinchi ihukko› yamamaa kitaabamukkok mayyimma?

18Ayyim ee kinanne ubookkok xaamookko. Ihukkaarem oo kin hanenne ubookkok liitamookko» yukko.

19Seera losisaanii qeessa awwonsaanii kobi'llishshinne Yesuus ixxuwwa acceeqasukkisa laqqo'i bikkina ee ammanem ixxo amaddeena hasso'o. Ihukkaarem minaadaba baddito'i bikkina utto'o.

20Ee lasage gassimmi malaayyii daannoomii yoo Oroo'm uulli gassaanchina higissa'a uwwimmina makka hassam hee'llo'o. Ee bikkina er manna labbu'uuyyi Yesuus wocoo wocanne huushancha siiddeena egettam manna Yesuus beyyo asse'llo'o.

21Oo asse'anto'i keenim Yesuus beyyo matta'a «Losisaancho! At woccoo woshshii losissoo losishshii hanqo'an ihukkisa lanqoommo. Odim Waa'i googo hanqo'isinne losisimmiinsi bagaan mannika miine moo'lloobee'isa lanqoommo.

22Ni See'llisanne Oroo'm uulli adilina gibiro minqonnii minqoone?» yito'o.

23Ihukkaarem Yesuus ixxuwwika hantaaro la'aa

24«Huno'o, diinaarooma moo'oommo keyye eebbehe» yukko. Ixxim ixxuwwina «Ka diinaaranne yoo misilii kitaabii ayyane?» yaa xa'mmukko. Ixxuwwim «Qeesaarane» yita'a dabatto'o.

25Yesuusim ixxuwwina «Eehaara'i Qeesaarinam ihu luwwa Qeesaarinam uwwehe. Waa'an ihu luwwa Waa'inam uwwehe» yukko.

26Ixxuwwim ixxi dabaru dabachchanne maalalta'a cawwita'a utto'o bagaan Yesuus wocu wocanne minaadaphphi illagenne huushancha siiddeena xanto'oyyo.

27«Manni lehaa lasage ki'ooyyo» yitam Saduuqaawe'uwwiinsi mat qax manni Yesuus beyyo waatta'a

28«Losisaancho! Muse'e niina ‹Mat manchi meentichcho eebaa ooso qaroo'nnim lehulas ixxi abbaayyi ee meentichcho lago gassaa ee lehukkaannina shumo'i ihoo ooso qarimmi hasisookko› yaa kitaabaakko.

29Mat ammane lamar abbaayyuwwi hee'llo'o. Ee abbaayyuwwiinsim won beet meentichcho eebaa ooso qaroo'nnim lehukko.

30Ee lasage wona awwonaanchi ee meentichcho laggassukko.

31Ee lasage odim saxxekim laggassukko. Ee'isinne lamarem abbaayyuwwim ee meentichcho gassita'a ooso qattoo'nnim leto'o.

32Ee lasage isem leto'o.

33Eehaare isa'i lamarannem affo'ookko leto'i keen lehiinsi ki'llam ayyaamo hinkannitan ikkamo?» yita'a xa'mmito'o.

34Yesuusim ixxuwwina dabaraa «Uullanne yo'i manni eebbamoo ladiissamoo.

35Ihukkaarem lehiinsi ki'imminaa lehiinsi ki'akka'a lasage hee'akkam doollenne hee'imminaa labbam keen eebbamoyyoo ladiissamoyyoo.

36Lehiinsi ixxuwwi ki'llo'i bikkina Waa'i asse'amaa'nnisa ikkamo bagaan letamoyyo. Oo lehiinsi ki'llo'i keen Waa'i ooso.

37Odim giir aphpham hee'u shif aganna Muse'e kitaabu ammane Moollanni Waa'ina ‹Abrihaam Waa'a, Yisaaq Waa'aa Yaaqoob Waa'aa› yimminne Waa'i lehu keeno lehiinsi ki'isoo'isa caakkisaa kuraakko.

38Waa'ina hundim fooraam ihaa hee'oohan ihu bikkina Waa'i hee'oo kee'n Waa'a bagaan lehu kee'n Waa'ayyo» yaa dabarukko.

39Seera losisaa'nnek mat mat keen «Losisaancho! Danaam dabachcha dabattaatto» yito'o.

40Ee lasage ixxuwwi mulli xa'mmichcha xa'mmiteena iggito'oyyo.

41Yesuus ixxuwwina «Manni ‹Kiristoosa Daawiit beeto› yookkok mahinatte?

42Daawiit ixxi gagim Mazmuu'l Kitaabanne ‹Waa'i i Moollannina «Ki diina'a ki lokkiinsi woroon isseembe'e

43I makkanne afuure» yaakko› yukko.

44Eehaara'i Daawiit ixxi gagim Kiristoosa ‹Moollanna!› yaa weeshulas Kiristoos hinka'isinne Daawiitina beet ihookko?» yaa xa'mmukko.

45Minaadab hundim macceesonam Yesuus ixxi losaanina

46«Seera losisaano ege'llehe. Ixxuwwi qeeraa'l eddechcha edde'lla'a do'imma, meeranne manni ixxuwwa xummaatisona, wixxixxi minneewwannem hundiinsim e'lloo beyyonne afuuchchaa maadda itteena afuuttam ammanem lombi beyyonne afuurimmaa iittitam keeno.

47Odim ixxuwwi qeeraa'llissa'a Waa'a uunxitu'uuyyi xummaan keeno labbamo. Aro'i lehu kee'n amaxxam boggam keeno. Ee bikkina ixxuwwanne afoo oogato'i kee'mmaalla» yukko.

← Chapter 19 Jump to: Chapter 21 →