Luke 6

hadiyya

← Chapter 5 Jump to: Chapter 7 →

1Yesuus Usheexxaxxi Ayyaamonne hurbaaxxi worinne higonam ixxi losaan hamaamika quxxa'a anginne cukkita'a ittam hee'llo'o.

2Ee bikkina Farisaawe'uwwiinsi mat mat keen Yesuus losaanina «Usheexxaxxi Ayyaamonne issimmina laboobee'i luwwa mahina issitakkamuulla?» yita'a xa'mmito'o.

3Ihukkaarem Yesuus ixxuwwina «Daawiitii ixxenne maqire hee'llo'i mannii sibaatto'i ammane Daawiit maha issuda'e qananaa'llakko'oyyonnihe?

4Ixxim Keesammi Mine aagaa keesammi qorosho'o oohim xale'i qeessuwwiinsi bagaan mulli manni itimmi hasisoobee'eka aa'aa itukko. Ixxenne maqire hee'llo'i keeninam uwwukko» yaa dabarukko.

5Odim Yesuus ixxuwwina «Manchi Beet Usheexxaxxi Ayyaaminam annichchome» yukko.

6Odim Yesuus mulli Usheexxaxxi Ayyaamonne Ayihuxxi manni wixxixxi mine aagaa losisam hee'ukko. Ee beyyonnem makki angi shiihaakkoo mat manchi hee'ukko.

7Seera losisaanii Farisaawe'uwwii Yesuusa kasassam mashka'a hassam hee'llo'i bikkina Usheexxaxxi Ayyaamonne fayyiisooda'e moo'lleena egetto'o.

8Ihukkaarem Yesuus ixxuwwi sawwite la'aa ee angi shiihu manchina «Waattaa ka beyyonne uulle» yukkaare oo manchi ki'aa maraa ee beyyonne uullukko.

9Yesuusim «Hino'o an ki'nnuwwa xa'mmoommo. Usheexxaxxi Ayyaamonne erokannii jora issimmi hasisookko? Te'im manni foore gatisimminnii shimmi hasisookko?» yaa xa'mmukko.

10Yesuusim ixxi kululleetanne hee'llo'i manni hundam moo'aa angi shiihu manchina «Ki anga biddiqaa'e» yukko. Manchim ixxi anga biddiqaa'ukkaare ixxi angi daba'llaa fayye'ukko.

11Ihukkaarem ixxuwwi lobakata nadadda'a Yesuusa maha issitamda'e ixxuwwina'i ixxuwwim a'llanto'o.

12Mat ayyaamo Yesuus Waa'a uunxeena duuna firukko. Eekke'em hiimo hundoomam Waa'a uunxukkuuyyi garukko.

13Uulli soodu ammanenne ixxi losaano weeshaa ixxuwwiinsim tommoo lam losaanoo doo'llukko. Ixxuwwam «Asse'amaano» yaa weeshukko.

14Doo'llanto'i keenim Pheexiroosa yaa Yesuus weeshu Simi'oonatte, Simi'oon abbaayyi Indiraasatte, Yaaqoobatte, Yohaannisatte, Filiphphoosatte, Bartoloomoosatte, Maatiwoosatte, Toomaasatte, Ilfiyoos beet Yaaqoobatte, uullina to'achchaanchi Simi'oonatte, Yaaqoob beet Yihudattee Yesuusa lehina higisaa uwwu Asqorotokkichchi Yihudattee.

17Asse'amaaninne maqirem Yesuus duuniinsi dillaa lete'i beyyonne uullukko. Eekke'em lobakat ixxi losaanii ixxeensi losseenaa ixxuwwanne yoo jabbiinsi fayye'lleenaa Yihuxxi uulli hundiinsi, Yerusaalee'm beero'iinsi, dambalaq tochchonne yoo Xiiroosaanniinsii Siidoo'n beero'iinsii waatto'oo lobakat mannii hee'llo'o.

18Habus amadaa hawwitam hee'llo'i keenim fayye'llo'o.

19Ixxeensi malaayyi firaa hundam fayyiisam hee'u bikkina manni hundim ixxo nakkeena hasam hee'ukko.

20Yesuusim ixxi losaano moo'ukkuuyyi «Ki'nnuwwi bux keen Waa'i adillan ki'nnuwwan ihu bikkina maassaammuwwa.

21Kaba sibaattakkam keen godditakkam bikkina maassaammuwwa. Odim wi'llitakkam keenim osattakkam bikkina maassaammuwwa.

22«Manchi Beet bikkina manni ki'nnuwwa saboohaare, yaayyoohaare, game'lloohaaree ki'nnuwwi summam jorinne amadoohaaree ki'nnuwwi maassaammuwwa.

23Iimanenne ki'nnuwwik irifo'i lobakat ihu bikkina oo hundim ki'nnuwwanne afoo ammane liirammehe. Liiranchinnem xophxophi'llehe! Mashka'oomim ixxuwwi anno'im hiraagaano eehid issito'ookko.

24«Ihukkaarem ki'nnuwwi goddaan keen danaam heechcha hee'llakko'i bikkina ki'nnuwwina aayye!

25Ki'nnuwwi kaba godditakko'i keen sibaattakkam bikkina aayye! Ki'nnuwwi kaba osattakkam keen kichche'llakkam bikkinaa wi'llitakkam bikkinaa aayye!

26«Manni hundim ki'nnuwwa biroo ammane ki'nnuwwina aayye! Ixxuwwi anno'im ‹Neese hiraagaano› yitam qophphanaano eehid issito'ookko.

27Odim Yesuus «Ihukkaarem an ki'nnuwwina macceessakkam keenina kuroommo; ki'nnuwwi maso'o iittehe. Ki'nnuwwa sabbam keeninam eroomma issehe.

28Ki'nnuwwa duuntam keenom maasse'llehe. Ki'nnuwwa hawwodu keeninam Waa'a uunxehe.

29Kiikka mat xabano aphphisukkaannina la'm xabanom uwwe. Ki gaabe'e masseena hasoohaannina ki qambiisam hoottitte.

30Keese uunxukkaannina hundinam uwwe. Kiinniinsi luwwa massu manchi dabaraa uwwonam xa'mmititte.

31Manni ki'nnuwwina issona hassakkam luwwa ki'nnuwwim mannina issehe.

32«Ki'nnuwwa iittitam keen xale'e iittitakko'aare maha awwaadookko? Eehid ihukkaa'lleensi baaxiilaammuwwim ixxuwwa iittitam keeno iittitamo.

33Ki'nnuwwina danaamo issu keenina danaamo issitakko'aa'lleensi ki'nnuwwina maha awwaadookko? Eekka'i baaxiilaammuwwim issitamo.

34Liqaayyo dabatta'a ‹Uwwitamo› yitakka'a neeyyato issitakkam keenina liqaayyissakko'aalleensi maha awwaadookko? Dabatta'a aa'lleena'i baaxiilaammuwwim liqaayyissamo.

35Ki'nnuwwi ihukkaarem ki'nnuwwi maso'o iittehe. Maso'uwwinam eroomma issehe. Dabaraa ‹Uwwookko› yitakka'a egettakkambee'isam liqaayyissehe. Ee'isamdu issitakkolas ki'nnuwwina uwwamoo irifo'i lobakat ihookko. Odim hundam xanoo Waa'inam oos ikkakkamo. Mashka'oomim Waa'i ixxo galaxxitambee'i keeninaa jor keeninam biijaalla.

36Iimanenne yoo ki'nnuwwi anni haafoohan ihukkisam ki'nnuwwim haafitakkam keen ikkehe.

37Odim Yesuus «Ayyi manchonnem oogattakkotte; Waa'im ki'nnuwwanne oogatooyyo. Ayyi manchom ‹Jora issaakkoohane› yitakka'a higissakka'a uwwitakkotte; Waa'im ki'nnuwwa jorina higisaa uwwooyyo. Haafi'llehe; ki'nnuwwinam haafamookko.

38Uwwehe; ki'nnuwwinam uwwamookko. Ki'nnuwwi keentakka'a uwwitakko'i keennaanchonne dabattakka'a a'llitakkam bikkina ki'nnuwwim uwwehe. Ki'nnuwwinam er keennaanchonne xishshaa'akka'ahii xiibakka'ahii keenakka'a keennaanchiinsi higaakkookkoka qaaphphisakkamo» yukko.

39Odim Yesuus mat kobi'llishsha kurukkuuyyi «Qooq qooqa awwonseena xanoohonnihe? Awwonsulas lamim baallenne ubbamoyyonnihe?

40Losookkok ixxi losisaanchiinsi lophphooyyo. Ihukkaarem ayyim guullaa losaa lasage ixxi losisaanchisam ihookko.

41Ki illenne yoo gudeera laqqoo'nnim kiyyabbaayyi illenne yoo haccichcho moo'lloottok mahinatte?

42Te'im ki illenne yoo gudeeram siiddoo'n kiyyabbaayyina ‹Huno'o, iyyabbaayyo, ki illenne yoo haccichcho fissoommo› yiteena hinkid xantootto? Kaa labsaancho, gaassitaa ki illenne yoo gudeera fisse. Ee lasage kiyyabbaayyi illenne yoo haccichcho fissiteena qoossitaa moo'llootto.

43Odim Yesuus «Danaam haqqichchi jor misha mishooyyo. Jor haqqichchim danaam misha mishooyyo.

44Haqqi hundim mishoo mishinne la'amookko. Uttiinsi oda'i misha feerakkamoyyo. Seego'iinsi woyi'n misha feerakkamoyyo.

45Er manchi ixxi wodanonne wixxaa'u er luwwiinsi erokam fissookko. Jor manchim ixxi wodanonne wixxaa'u jor luwwiinsi joram fissookko. Mashka'oomim suum wocookkok wodanonne wo'mmaa gatu luwwa.

46Odim Yesuus «An ki'nnuwwa issehe yummi luwwa'i issitakkamoyyo. Eese ‹Moollanna! Moollanna!› yitakkamok mahinatte?

47I beyyo waaraa an yummi luwwa macceesaa baxonne hosisookkok hundim maha kobi'llooda'e an ki'nnuwwina kuroommo.

48Oo manchi ixxi mine baxeena shooto'o xillisaa hinaa gortanna kinanne uullisu mancho kobi'lloohane. Diris dirisaa ee mine gafe'ukko. Ihukkaarem danaamisa baxamu bikkina heekkeeseena xanukkoyyo.

49Ihukkaarem an yummi luwwa macceesaa baxonne hosisoobee'ek shooto'o muroo'nnim mine baxu mancho labookko. Oo min diris gafe'ukkaare ee ammanchom ubukko. Ee mi'nnek ubimmim jorisa» yukko.

← Chapter 5 Jump to: Chapter 7 →