Esther 1

Ilonggo (Maayong Balita nga Biblia (2012))

Jump to: Chapter 2 →

1Sang una nga panahon may isa ka hari nga si Ahasuero nga naggahom sa 127 ka mga probinsya halin sa India tubtob sa Etiopia. Ang iya palasyo yadto sa siudad sang Susa nga amo ang kapital sang iya ginharian nga amo ang Persia.

3Sa ikatlo nga tuig sang iya paghari naghatag sia sing punsyon sa iya tanan nga mga opisyales kag mga manugdumala. Nagtambong ang mga pangulo sang mga hangaway sang Persia kag Media, kag subong man ang mga gobernador kag mga prinsipe sang mga probinsya.

4Sa sulod sang anom ka bulan ginpakita niya ang manggad sang iya ginharian kag kon daw ano ka halangdon kag ka dalayawon sini!

5Sa tapos ang anom ka bulan, ang hari naghiwat pa gid sing punsyon sa tanan nga mga tawo, imol kag manggaranon nga yara sa Susa, ang kapital sang siudad. Ini nga punsyon ginhiwat sa pasiyuhan sang hardin sang palasyo kag naglawig ini sing pito ka adlaw.

6Ang pasiyuhan didto ginpunihan sang puti kag asol nga mga kurtina nga ginhigot sang mga lubid nga nahimo sa mapino kag granate nga lino kag gin-angot ini sa mga sulosingsing nga pilak nga yara sa ibabaw sa mga marmol nga haligi. May mga siya nga salaliayan nga nahimo sa bulawan kag pilak nga ginbutang sa pasiyuhan nga ang salog puti nga marmol, perlas, kag malahalon nga mga bato nga nagkalainlain ang kolor.

7Ang mga bisita ginpagustohan lang sang hari sa pag-inom sang bino nga gintagay sa bulawan nga mga ilimnan nga nagkalainlain ang korte.

8Ang pag-imnanay wala sing pugongpugong kay ang hari nagmando sa mga suloguon sa palasyo nga pagustohan lang nila ang luyag sang tagsa ka tawo.

9Sa pihak nga bahin, si Rayna Vasti naghatag man sing punsyon para sa mga babayi sa sulod sang palasyo.

10Sang ikapito nga adlaw sang punsyon, masadya ang hari tungod sa pag-inom sang bino, gani, ginpatawag niya ang iya pito ka mga alagad nga kapon nga amo sanday Mehuman, Bista, Harbona, Bigta, Abagta, Setar kag Karkas.

11Ginsugo niya sila nga dalhon si Rayna Vasti sa atubang niya nga nagasuksok sang korona sang rayna agod ipakita niya ang iya katahom sa mga tawo kag mga opisyales, kay isa sia ka matahom nga babayi.

12Pero sang sugiran sang mga alagad si Rayna Vasti nahanungod sang sugo sang hari indi sia magkadto. Tungod sini ang hari nagbalingaso sa kaakig.

13Dayon ang hari nagpakigsapol sa iya mga palamangkutan nga mga tawo nga nakahibalo sang mga kasugoan kag mga pagsulondan. Kay amo ini ang ginahimo sang hari agod mahibaluan niya kon ano ang dapat himuon.

14Ang salaligan niya nga mga palamangkutan nga pirme ginapamatian niya amo sanday Karsena, Setar, Admata, Tarsis, Meres, Marsena, kag Memukan. Ini sila amo ang pito ka mga opisyales sang Persia kag Media nga may pinakamataas nga mga palangakuan sa ginharian.

15Ginpamangkot niya sila, “Suno sa kasugoan ano bala ang dapat himuon sa kay Rayna Vasti tungod kay wala sia nagtuman sang akon mando nga ginpadala paagi sa akon mga alagad?”

16Dayon si Memukan nagsabat sa hari sa atubang sang iya mga opisyales: “Si Rayna Vasti nagpakahuya, indi lamang sang hari kundi sang tanan nga mga opisyales kag sang tanan nga mga tawo sa bug-os nga ginharian!

17Sa bug-os nga ginharian ang tagsa ka babayi nga makahibalo sang ginhimo sang rayna magatamay sang iya bana. Magasiling sila, ‘Si Haring Ahasuero nagmando nga si Rayna Vasti pagadalhon sa iya atubang pero ang rayna wala magkadto.’

18Kon ang mga asawa sang mga opisyales sang Persia kag Media makabati sining ginhimo sang rayna, magahambal sila nahanungod sini sa ila mga bana sa wala pa magtunod ang adlaw. Bisan diin ang mga asawa magayaguta sa ila mga bana, kag ang mga bana magakaakig sa ila mga asawa.

19Kon luyag mo, Mahal nga Hari, maghimo ka sing isa ka sugo nga si Vasti indi na liwat magkadto sa atubang sang hari. Ilakip ini sa mga kasugoan sang Persia kag Media agod indi gid ini maislan. Dayon ihatag sang hari ang pagkarayna sa isa ka babayi nga mas dungganon pa sang sa iya.

20Kon mahibal-an sa bug-os nga ginharian ining sugo sang hari, ang tanan nga mga babayi magatahod sa ila mga bana, imol man ukon manggaranon.”

21Naluyagan sang hari kag sang iya mga opisyales ang ginhambal ni Memukan, kag ang hari naghimo sang iya ginpanugyan.

22Ang hari nagpadala sing mga sulat sa tanan nga mga probinsya nga sakop sang iya ginharian, suno sa ila pangsulat kag panghambal, nga nagasiling nga ang tagsa ka bana manginpangulo sang iya kaugalingon nga balay kag maggahom sa iya asawa kag mga kabataan.

Jump to: Chapter 2 →