Esther 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sang ulihi, si Haring Ahasuero nagpasaka sa mataas nga palangakuan kay Haman nga anak ni Hamedata nga Agagnon. Ang iya palangakuan mas mataas sang sa tanan nga mga opisyales nga kaupod niya.

2Ang hari nagmando sa tanan niya nga mga opisyales sa pagpakita sang ila pagtahod kay Haman paagi sa pagluhod kag pagsaludo sa iya. Tanan sila nagtuman sini luas lamang kay Mardoqueo nga indi gid magtuman sini.

3Ang iban nga mga opisyales sa palasyo nagpamangkot kay Mardoqueo kon ngaa wala sia nagatuman sa mando sang hari.

4Adlaw-adlaw ginahambalan nila sia nahanungod sini, pero wala sia nagasapak sa ila. Nagsiling sia, “Ako isa ka Judio kag indi ako makasaludo kay Haman.” Gani ginsingganan nila si Haman nahanungod sini agod mahibal-an nila kon bala pabay-an lang ni Haman si Mardoqueo.

5Sang mahibal-an ni Haman nga si Mardoqueo indi magluhod kag magsaludo sa iya naakig gid sia,

6kag sang mahibal-an man niya nga si Mardoqueo isa ka Judio, nagplano sia indi lamang sa pagsilot kay Mardoqueo, kundi sa pagpamatay sang tanan nga mga Judio sa bug-os nga ginharian sang Persia.

7Sa ika-12 nga tuig sang paggahom ni Haring Ahasuero, sa nahauna nga bulan nga amo ang Nisan, si Haman nagmando nga maggabutgabot (ginatawag ini nga Pur) sa paghibalo kon ano ang husto nga adlaw kag bulan sa pagtuman sang iya plano. Ang adlaw nga natup-an amo ang ika-13 nga adlaw sang ika-12 nga bulan nga amo ang bulan sang Adar.

8Dayon si Haman nagsiling sa hari, “May grupo sang mga tawo nga nagaestar sa tanan nga sakop sang imo ginharian kag makita sa tagsa ka probinsya. Ang ila mga kasugoan lain gid sang sa iya sang iban nga mga tawo kag dugang pa, wala sila nagatuman sang imo mga kasugoan. Indi maayo sa imo paggahom nga pabay-an mo lang sila.

9Kon pakamaayuhon mo, O Mahal nga Hari, magsulat ka sing mando sa pagpamatay sa ila. Kon himuon mo ini, pasaligon ko ikaw nga magabutang ako sing 375 ka tonelada nga pilak sa talaguan sang manggad sang hari.”

10Dayon ginhukas sang hari ang iya singsing nga inugpat-in sa mga kasugoan kag ginhatag ini kay Haman nga anak ni Hamedata nga Agagnon, ang kaaway sang mga Judio.

11Kag nagsiling ang hari sa iya, “Ang mga tawo kag ang ila kwarta imo lang. Himua sa ila ang luyag mo.”

12Sa ika-13 nga adlaw sang nahauna nga bulan, ginpatawag ni Haman ang mga sekretaryo sang hari kag gindikta sa ila ang isa ka mando nga pagabadbaron sa tagsa ka linggwahe kag pamaagi sang pagsulat nga ginagamit sa ginharian kag ipadala ini sa tanan nga mga pangulo, mga gobernador kag mga opisyales. Ginsulat ini sa ngalan ni Haring Ahasuero kag ginpat-inan sang iya singsing.

13Ang mando nga ginpadala paagi sa mga mensahero sa tagsa ka probinsya sang hari nagasiling nga laglagon, pamatyon, kag papason ang tanan nga mga Judio, pamatan-on kag tigulang, mga babayi kag mga bata, sa isa lang ka adlaw, sa ika-13 nga adlaw sang ika-12 nga bulan nga amo ang bulan sang Adar. Pamatyon sila nga wala sing luoyluoy, kag panguhaon ang ila mga pagkabutang.

14Ang mando ipahibalo sa tagsa ka probinsya agod ang tanan nga mga katawhan maghanda sa sina nga adlaw.

15Ang mga mensahero naglakat sa gilayon sa sugo sang hari kag ang mando ginpahibalo sa Susa, ang kapital nga siudad. Ang hari kag si Haman nagpungko sa pag-inom, samtang ang siudad sang Susa nagkinagula.

← Chapter 2 Jump to: Chapter 4 →