Esther 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Karon nag-abot na ang ika-13 nga adlaw sang Adar. Amo ini ang adlaw nga ang mando sang hari pagatumanon, ang adlaw nga ginalauman sang mga kaaway sang mga Judio sa paglaglag sa ila. Pero sa baylo sini, ang mga Judio amo ang nagdaog batok sa ila mga kaaway.

2Sa lugar nga ginaestaran sang mga Judio sa tagsa ka siudad sang ginharian, ang mga Judio nag-ugyon sa pagsalakay sa kay bisan sin-o nga may tuyo sa paghalit sa ila. Ang mga tawo bisan diin nahadlok sa ila, kag wala sing may makabato sa ila.

3Ang tanan nga mga opisyales sang mga probinsya—ang mga manugdumala kag mga gobernador, kag ang tanan nga mga tiglawas sang hari, nagbulig sa mga Judio, tungod kay hinadlukan sila kay Mardoqueo.

4Si Mardoqueo nangingamhanan nga tawo sa palasyo. Ang iya kabantugan naglambot sa tanan nga mga probinsya samtang padayon ang pagsaka niya sa gahom.

5Gani ang mga Judio nagpamatay sang ila mga kaaway paagi sa espada. Ginpamatay nila sila kag ginlaglag kag naghimo sang luyag nila sa mga nagdumot sa ila.

6Sa Susa, ang kapital nga siudad, ang mga Judio nagpamatay kag naglaglag sang 500 ka mga tawo.

7Ginpamatay man nila sanday Parsandata, Dalpon, Aspata,

8Porata, Adalia, Aridata,

9Parmasta, Arisay, Ariday, kag Baisata.

10Ini sila amo ang napulo ka mga anak nga lalaki ni Haman nga kaaway sang mga Judio, kag sia anak ni Hamedata. Pero ang mga Judio wala magpanguha sang mga pagkabutang sang ila mga kaaway.

11Sang masugid sa hari ang kadamuon sang ginpamatay sadto nga adlaw sa Susa,

12ang hari nagsiling sa kay Rayna Ester, “Sa Susa lamang, ang kapital nga siudad, ang mga Judio nakapamatay kag nakalaglag sing 500 ka mga tawo lakip ang napulo ka mga anak ni Haman. Daw ano pa gid ayhan ang nahimo nila sa iban nga mga probinsya sang hari? Kon ano pa gid ang imo pangayuon pagaihatag sa imo kag kon ano ang imo pangabay pagatumanon ini.”

13Si Ester nagsabat sa iya, “Kon luyag sang Mahal nga Hari, tugoti ang mga Judio sa Susa sa paghimo buas sang ginhimo nila sini nga adlaw kag ipabitay ang mga bangkay sang napulo ka mga anak ni Haman.”

14Ang hari nagsugo nga pagahimuon ini. Ang mando ginpahibalo sa Susa kag ang mga bangkay sang napulo ka mga anak ni Haman ginbitay sa atubang sang mga tawo.

15Ang mga Judio sa Susa nag-ugyon liwat sang ika-14 nga adlaw sang bulan sang Adar, kag ginpamatay nila ang 300 pa gid ka mga tawo sa Susa. Pero ang mga Judio wala magpanguha sang mga pagkabutang sang ila mga kaaway.

16Ang iban nga mga Judio nga yara sa mga probinsya nga sakop sang hari nag-ugyon man sa pag-apin sang ila kaugalingon. Ginpapas nila ang ila mga kaaway paagi sa pagpatay sang 75,000 ka mga tawo nga nagdumot sa ila. Pero wala sila magpanguha sang mga pagkabutang sang ila mga kaaway.

17Natabo ini sang ika-13 nga adlaw sang bulan sang Adar, kag sang ika-14 nga adlaw nagpahuway sila kag ginhimo ini nga adlaw sang pagpinunsyon kag kinalipay.

18Pero ang mga Judio sa Susa nag-untat sa pagpamatay sang ika-15 nga adlaw kag nagpinunsyon sila kag nagkinalipay kay napapas nila ang ila mga kaaway sang ika-13 kag ika-14 nga adlaw.

19Amo ina nga ang mga Judio nga nagaestar sa magamay nga mga banwa nga wala sing pader nagasaulog sang ika-14 nga adlaw sang bulan sang Adar. Sa sini nga adlaw nagahiwat sila sang mga punsyon kag magkinalipay, kag nagahinatagay sila sing regalo nga mga pagkaon.

20Si Mardoqueo nagsulat sini nga mga hitabo. Nagpadala sia sing mga sulat sa tanan nga mga Judio, malapit man sila ukon malayo, sa bug-os nga ginharian sang Persia,

21kag ginsingganan sila sa pagsaulog tuigtuig sang ika-14 kag ika-15 nga adlaw sang bulan sang Adar subong piesta opisyal.

22Amo ini nga mga adlaw nga ang mga Judio nagpapas sang ila mga kaaway, kag amo ini nga bulan nga ang ila kasubo ginbayluhan sang kalipay, kag ang ila paglalaw ginbayluhan sang pagkinasadya. Pagasaulogon nila ini subong nga mga adlaw sang pinunsyon kag kinalipay, mga adlaw sa paghinatagay sing regalo nga mga pagkaon sa isa kag isa kag sa mga imol.

23Gani ang mga Judio nagtuman sang mga sugo ni Mardoqueo kag ang pagsaulog ginhiwat tuigtuig.

24Si Haman nga kaaway sang mga Judio, nga anak ni Hamedata nga kaliwat ni Agag nagpagabutgabot (ginatawag ini Pur) sa pagpat-od sang adlaw sa pagpamatay sang mga Judio, kay ang iya plano amo ang pagpapas sa ila.

25Pero si Ester nagkadto sa hari, kag ang hari nagsulat sing mando kag ang resulta sini amo nga si Haman man lang ang natup-an sang iya malain nga plano para sa mga Judio. Sia kag ang iya mga kabataan ginbitay.

26Gani ini nga mga adlaw nga piesta opisyal gintawag nga Purim, halin sa pulong nga gabutgabot. Tungod sa sulat ni Mardoqueo kag sang tanan nga natabo sa ila,

27ang mga Judio nagpamat-od nga sila, ang ila mga kaliwat, kag ang tanan nga mangin-Judio, magasaulog sining duha ka adlaw sa tagsa ka tuig suno sa mando ni Mardoqueo.

28Ini nga mga adlaw dapat dumdomon kag saulogon sang mga Judio sa tagsa ka kaliwatan, sa tagsa ka panimalay, sa tagsa ka probinsya, kag sa tagsa ka siudad. Kag ining mga adlaw sang Purim pagasaulogon sa gihapon, kag ang handumanan sini indi pagkalipatan sang ila mga kaliwat sa walay katubtoban.

29Dayon si Rayna Ester nga anak ni Abihail nagsulat sa pagpamatuod sining ikaduha nga sulat ni Mardoqueo nga Judio nahanungod sa Purim.

30Ang mga sulat ginpadala sa tanan nga mga Judio sa 127 ka mga probinsya nga sakop sang ginharian sang Persia. Sa mga sulat naghandom sila sang paghidait kag kalig-unan para sa mga Judio

31kag nagamando nga ang mga adlaw sang Purim dapat pagasaulogon sa pat-od nga tion suno sa ginsugo ni Mardoqueo kag ni Rayna Ester. Sa amo man nga bagay naghimo sila sang mga pagsulondan sa pagpuasa kag paglalaw para sa ila kaugalingon kag sa ila mga kaliwat.

32Ang sugo ni Ester nga nagapalig-on sining mga pagsulondan sang Purim ginsulat sa libro nga nalukot.

← Chapter 8 Jump to: Chapter 10 →