Esther 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Sa sadto man nga adlaw si Haring Ahasuero naghatag sa kay Rayna Ester sang tanan nga mga pagkabutang ni Haman nga kaaway sang mga Judio. Si Ester nagsugid sa hari nga pakaisa niya si Mardoqueo gani sugod sadto gintugotan si Mardoqueo sa pagpalapit sa hari.

2Dayon ginhukas sang hari ang iya singsing nga inugpat-in nga iya ginbawi kay Haman kag iya ini ginhatag kay Mardoqueo. Si Ester naghimo kay Mardoqueo nga manugdumala sang pagkabutang ni Haman.

3Dayon si Ester nagpakighambal liwat sa hari. Naghapa sia sa tiilan sang hari nga nagahibi kag nagapakitluoy nga indi pagsigihon ang malain nga plano ni Haman nga Agagnon batok sa mga Judio.

4Ang hari nag-untay sang iya setro nga bulawan kay Ester, kag nagtindog sia sa atubang sang hari, kag nagsiling,

5“Kon ginapakamaayo mo Mahal nga Hari, kag kon nagakabalaka ikaw sa akon, kag kon luyag mo, ipadala karon ang sugo nga nagabawi sang mga sulat nga ginsulat ni Haman nga anak ni Hamedata nga Agagnon sa iya pagtinguha sa paglaglag sang mga Judio sa bug-os nga ginharian.

6Kay ano bala ang pagkabatas ko kon ini nga kahalitan mag-abot sa akon mga kadugo kag magkalamatay ang akon mga pariente?”

7Si Haring Ahasuero nagsiling kay Rayna Ester kag kay Mardoqueo nga Judio, “Ginpabitay ko na si Haman kay nagplano sia sa pagpatay sa mga Judio, kag ang iya pagkabutang ginhatag ko kay Ester.

8Pero ang mando nga ginsulat sa ngalan sang hari kag napat-inan sang iya singsing indi na mabayluhan. Wala sapayan, sarang kamo makasulat sa mga Judio sang luyag ninyo kag isulat ini sa akon ngalan nga napat-inan sang akon singsing.”

9Natabo ini sang ika-23 nga adlaw sang ikatlo nga bulan nga amo ang bulan sang Siban. Ginpatawag ni Mardoqueo ang mga sekretaryo sang hari. Suno sa pagdikta ni Mardoqueo, ang mga sulat ginpadala sa mga Judio, mga pangulo, mga gobernador, kag mga opisyales sang 127 ka mga probinsya halin sa India tubtob sa Etiopia. Ang tagsa ka probinsya ginpadalhan sang sulat suno sa ila linggwahe kag pamaagi sang pagsulat. Ang mga Judio ginpadalhan man suno sa ila linggwahe kag pamaagi sang pagsulat.

10Ginsulat ini ni Mardoqueo sa ngalan ni Haring Ahasuero kag ginpat-inan sang singsing sang hari. Ang mga sulat ginpadala paagi sa mga mensahero nga nagasakay sa madasig nga mga kabayo nga ginapanag-iyahan sang hari.

11Sa sini nga mga sulat ang hari naghatag sing pahanugot sa mga Judio sa tagsa ka siudad nga mag-ugyon sa pag-apin sang ila kaugalingon. Kon salakayon sila kag ang ila mga asawa kag mga kabataan sang bisan sin-o nga mga tawo, sa bisan diin nga probinsya sarang sila makabato kag makalaglag sang ila mga kaaway. Sarang nila mapamatay ang tanan nila nga mga kaaway kag makuha ang ila mga pagkabutang.

12Ini nga sugo ginapatuman sa bug-os nga ginharian sang Persia sa ika-13 nga adlaw, sa ika-12 nga bulan sang Adar nga amo ang bulan nga gintalana sa pagpamatay sang mga Judio.

13Ang sulat ipahibalo subong nga mando sa tanan nga mga tawo sa tagsa ka probinsya, agod ang mga Judio maghanda sa pag-apin sang ila kaugalingon batok sa ila mga kaaway kon mag-abot ina nga adlaw.

14Gani ang mga mensahero nga nagasakay sa madasig nga mga kabayo nga ginapanag-iyahan sang hari, ginpadala sa gilayon sa mando sang hari. Ang mando ginpahibalo man sa Susa, ang kapital nga siudad.

15Si Mardoqueo naggwa sa palasyo nga nagabayo sang harianon nga bayu nga asol kag puti kag nagasuksok sang matahom nga korona nga bulawan kag nagakapa sang mapino nga lino nga granate. Dayon ang bug-os nga siudad sang Susa naghinugyaw sa kalipay.

16Ang mga Judio may kalipay kag wala na sila sing kahadlukan. Nagbatyag sila sing kasadya kag kadalag-an.

17Sa tagsa ka probinsya kag siudad nga nalambot sang mando sang hari, ang mga Judio nagkinalipay, naghinugyaw kag nagpinunsyon. Kag madamo sang mga katawhan sa mga probinsya nga nangin-Judio, tungod kay hinadlukan sila sa mga Judio sadto nga adlaw.

← Chapter 7 Jump to: Chapter 9 →