Esther 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Sang ulihi, sang nagtahaw na ang kaakig ni Haring Ahasuero, nadumdoman niya ang ginhimo ni Vasti kag ang mando niya batok sa iya.

2Gani, ang iban sang mga palamangkutan sang hari nga malapit sa iya nagsiling, “Ngaa indi ikaw magmando sa pagpangita sing matahom, lamharon kag birhen nga mga dalaga?

3Magpili ka sing mga opisyales sa tanan nga mga probinsya sang imo ginharian sa pagtipon sang tanan nga matahom kag lamharon nga mga dalaga sa balay sang imo mga babayi diri sa Susa, ang kapital nga siudad. Itugyan sila sa pag-atipan ni Hegay, ang kapon nga amo ang gintugyanan sa pag-atipan sang imo mga babayi kag hatagan sila sang ila kinahanglanon sa pagpatahom sang ila kaugalingon.

4Dayon magpili ka sing dalaga nga imo gid naluyagan nga manginrayna sa baylo kay Vasti.” Ini nga panghunahuna nagpahamuot sang hari kag ginhimo niya ini.

5Karon sa Susa, ang kapital nga siudad, may isa ka Judio nga ginahingalanan kay Mardoqueo nga anak ni Jair. Nagikan sia sa tribo ni Benjamin kag kaliwat sia ni Simei kag ni Kis.

6Isa sia sang mga bihag gikan sa Jerusalem upod kay Haring Joaquin sang Juda nga gindala ni Haring Nabucodonosor sang Babilonia.

7May pakaisa sia nga si Ester nga ang ngalan niya sa Hebreo si Hadasa. Matahom si Ester nga babayi kag maayo sing lawas. Sang mapatay ang iya mga ginikanan, ginsapupo sia kag ginsagod ni Mardoqueo subong iya kaugalingon nga bata.

8Gani, sang mapahibalo ang bag-o nga mando sang hari, madamo nga mga babayi nga gindala sa palasyo sang hari sa Susa, kag si Ester isa man sang gindala didto. Sia ginbutang man sa idalom sang pagtatap ni Hegay nga amo ang nagatatap sang mga babayi sang hari.

9Si Ester nahamut-an ni Hegay kag gintatap niya sia sing pinasahi. Sa gilayon ginhatagan niya sia sang iya mga kinahanglanon sa pagpatahom kag sang iya pagkaon. Ginhatagan man niya sia sing pito ka mga dalaga gikan sa palasyo sa pag-atipan sa iya. Kag ginbutang sia kag ang mga nagaatipan sa iya sa labing maayo nga lugar sa balay sang mga babayi.

10Karon si Ester wala magsugid nga sia isa ka Judia bangod kay si Mardoqueo nagpaandam nga indi niya pag-isugid ini.

11Adlaw-adlaw si Mardoqueo nagapakadto-pakari sa atubangan sang pasiyuhan sang balay sang mga babayi sa paghibalo sang kahimtangan ni Ester kag kon ano ang nagakatabo sa iya.

12Ang kalawigon sang kinaandan nga pagpatahom sa mga babayi isa ka tuig—anom ka bulan nga masahe sa lana sang mira kag anom pa gid ka bulan sa lana sang balsamo. Sa tapos sina, ang tagsa ka babayi ginadala kay Haring Ahasuero.

13Sa iya paghalin sa balay sang mga babayi pakadto sa palasyo sarang sia makasuksok sang bisan ano nga luyag niya.

14Nagakadto sia sa palasyo kon gab-i kag pagkaaga ginadala sia sa isa naman ka balay sang mga babayi sa idalom sang pagtatap ni Saasgas nga kapon nga nagaatipan sang mga babayi sang hari. Wala na sia nagakadto liwat sa hari luas kon naluyagan sia sang hari kag ipatawag ang iya gid ngalan.

15Nag-abot ang tion ni Ester sa pagkadto sa hari. Si Ester anak ni Abihail kag pakaisa ni Mardoqueo. Si Mardoqueo nagsagod kay Ester subong nga iya anak. Ang tanan nga mga nakakita kay Ester nagadayaw sa iya. Sang mag-abot ang tion sang iya pagkadto sa hari, wala sia sing iban nga ginsuksok kundi ang ginsiling sa iya ni Hegay nga kapon nga nagatatap sang balay sang mga babayi.

16Gani, sang ikapito nga tuig sang paghari ni Ahasuero, sang ika-10 nga bulan nga amo ang bulan sang Tebet, si Ester gindala kay Haring Ahasuero sa palasyo.

17Naluyag ang hari sa iya labaw pa sang sa iban nga mga babayi kag nadaog niya ang pagpalangga kag pagpasulabi sang hari labaw pa sang sa iban nga mga dalaga. Ginkoronahan sia sang hari kag ginhimo sia nga rayna sa baylo kay Vasti.

18Dayon ang hari naghiwat sang daku nga punsyon sa kadungganan ni Ester kag gin-agda niya ang iya tanan nga mga opisyales kag mga manugdumala. Ginpahayag man niya ang isa ka adlaw nga piesta opisyal sa bug-os nga ginharian kag nagpanagtag sia sing mga regalo suno sa iya kaalwan subong hari.

19Karon si Mardoqueo ginpili sang hari nga mangin-isa ka manugdumala.

20Sa pihak nga bahin, si Ester wala gid magpanugid nga sia Judia kay amo ini ang gintugon sa iya ni Mardoqueo. Gintuman niya ang ginsiling sa iya ni Mardoqueo subong sang ginhimo niya sang yara pa sia sa pagtatap niya.

21Isa ka adlaw sang si Mardoqueo yara sa iya opisina sa palasyo, si Bigtan kag si Teres, ang duha ka mga kapon sa palasyo nga nagabantay sa pwerta pakadto sa mga kwarto sang hari naakig kay Haring Ahasuero kag nagplano sila sa pagpatay sa iya.

22Nahibal-an ini ni Mardoqueo kag ginsugiran niya ang rayna nga si Ester. Si Ester nagsugid man dayon sa hari sang nabatian ni Mardoqueo.

23Ini nga butang ginpausisa kag nasapwan nga ini matuod, kag ang duha ka mga tawo ginbitay. Ang hari nagmando nga isulat ini sa opisyal nga maragtas sang ginharian.

← Chapter 1 Jump to: Chapter 3 →