Esther 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Sang pagkahibalo ni Mardoqueo sang tanan nga nahanabo, gingisi niya ang iya bayu sa kasubo. Dayon nagbayo sia sing sako, nagbutang sing abo sa iya ulo kag nagkadto sa tunga sang siudad nga nagahilibion sing mapait kag tudo gid.

2Tubtob lamang sia sa atubangan sang pwerta sang palasyo, tungod kay wala sing bisan sin-o nga ginatugotan sa pagsulod sa pwerta nga nagabayo sing sako.

3Sa tanan nga mga probinsya nga nalambot sang mando sang hari, may daku nga paglalaw sa mga Judio. Nagpuasa sila, naghinibi, kag nagpanalambiton. Ang kalabanan sa ila nagbayo sing sako kag naghigda sa abo.

4Sang magsugid kay Ester ang iya mga suloguon nga babayi kag ang mga kapon nga nagaalagad sa iya kon ano ang ginahimo ni Mardoqueo, natublag gid sia. Ginpadalhan niya sing mga bayu si Mardoqueo agod nga ilisan niya ang iya ginasuksok nga sako, pero indi magbaton sini si Mardoqueo.

5Dayon ginpatawag ni Ester si Hatak, ang isa sang mga kapon sa palasyo nga ginpili sang hari sa pag-alagad sa rayna, kag ginsugo niya sa pag-usisa kay Mardoqueo kon ano ang nagakahanabo kag kon ngaa.

6Si Hatak nagkadto kay Mardoqueo sa plasa sang siudad nga yara sa atubangan sang pwerta sang palasyo.

7Si Mardoqueo nagsugid sang tanan nga mga natabo sa iya kag kon pila ang pilak nga gintug-an ni Haman nga ibutang sa talaguan sang manggad sang hari agod lamang nga mapapas ang tanan nga mga Judio.

8Ang kopya sang kasugoan nga ginpadala halin sa Susa sa paglaglag sang mga Judio ginhatag man niya kay Hatak agod ihatag niya kay Ester kag isaysay sa iya ang kahimtangan. Nagtugon man si Mardoqueo nga si Ester magkadto sa hari sa pagpakitluoy para sa mga tawo nga iya kadugo.

9Gintuman ini ni Hatak, kag

10si Ester nagpabalik sa iya kay Mardoqueo nga may dala nga mensahe nga nagasiling:

11“Ang bisan sin-o, lalaki ukon babayi, nga magsulod sa korte sa pagpakigkita sa hari nga wala ginpatawag, ina nga tawo pagapatyon. Amo ini ang kasugoan. Ang tanan halin sa mga palamangkutan sang hari tubtob sa mga katawhan sa mga probinsya nakahibalo sini. Wala sing iban nga paagi sa paglikaw sini luas lamang kon ang hari mag-untay sang iya setro nga bulawan sa sina nga tawo, dayon ina nga tawo indi pagpatyon. Pero isa na karon ka bulan nga wala gid ako pag-ipatawag sang hari.”

12Sang masugiran si Mardoqueo sang ginsiling ni Ester,

13nagpadala sia sini nga paandam kay Ester: “Indi ka maghunahuna nga sa tanan nga mga Judio ikaw lang ang maluwas, tungod kay yara ka sa palasyo sang hari.

14Kon maghipos ka sa sini nga tion, ang pagtabang kag pagluwas sa mga Judio magaabot gikan sa langit, pero ikaw mapatay kag ang panimalay sang imo amay mapapas. Kag sin-o bala ang nakahibalo nga ginhimo ka nga rayna para sa tion nga kasubong sini!”

15Si Ester nagpadala sini nga sabat para kay Mardoqueo:

16“Lakat ka, tipuna sing tingob ang tanan nga mga Judio nga yara sa Susa kag magpuasa kamo para sa akon. Indi kamo magkaon ukon mag-inom sa sulod sang tatlo ka adlaw kag tatlo ka gab-i. Ako kag ang akon mga suloguon nga dalaga magapuasa pareho sa inyo. Sa tapos sina magakadto ako sa hari bisan batok ini sa kasugoan, kag handa ako bisan patyon pa ako.”

17Gani si Mardoqueo naglakat kag naghimo sang tanan nga ginsiling ni Ester.

← Chapter 3 Jump to: Chapter 5 →