Esther 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Gani ang hari kag si Haman nagkadto kag nagkaon sa bangkite upod kay Ester

2sa ikaduha nga tion. Sang nagainom sila sang bino ang hari nagsiling liwat kay Ester, “Karon, Mahal nga Rayna, ano bala ang luyag mo pangayuon? Sugiri ako kag ihatag ko sa imo bisan pa ang katunga sang akon ginharian.”

3Ang rayna nagsabat, “Kon luyag ihatag sang Mahal nga Hari ang akon diutay nga ginapangabay, luyag ko nga mabuhi pa agod ang akon kadugo mabuhi man.

4Ako kag ang akon mga kadugo ginbaligya agod pamatyon, laglagon kag papason! Kon ginbaligya lamang kami subong mga ulipon, kuntani naghipos na lang ako, kay ang amon kahimtangan indi gid man makahatag sing libog sa hari.”

5Dayon si Haring Ahasuero nagpamangkot sa rayna, “Sin-o ang nagapangahas sa paghimo sini? Diin sia?”

6Si Ester nagsabat, “Ang amon kasumpong nga nagahingabot sa amon wala sing iban kundi ining malaut nga si Haman!” Si Haman nagkurog sa daku nga kahadlok sa atubang sang hari kag rayna.

7Ang hari naghalin sa bangkite nga nagabalingaso sa kaakig kag nagkadto sa hardin sang palasyo, samtang si Haman wala maghalin sa pagpakitluoy sa kay Rayna Ester tungod sang iya kabuhi, kay iya nasat-uman nga ang iya katapusan napat-od na sang hari.

8Sang pagbalik sang hari sa ginahiwatan sang bangkite gikan sa hardin, si Haman nagahapaon sa ginasaliayan ni Ester sa pagpakitluoy. Ang hari nagsinggit, “Buot bala niya lugoson ang rayna bisan pa sa akon atubang diri sa palasyo?” Halos lang nakahambal ang hari sini, gintabunan sang mga kapon ang ulo ni Haman.

9Dayon si Harbona nga isa sang mga kapon nga nagaalagad sa hari nagsiling, “Mahal nga Hari, si Haman nagpahimo pa gani sing bilitayan nga setentay singko ka tapak ang kataason agod ipabitay si Mardoqueo nga nagluwas sang imo kabuhi.” Ang hari nagmando, “Ipabitay si Haman didto!”

10Gani ginbitay nila si Haman sa bilitayan nga ginhimo niya para kay Mardoqueo. Sa tapos sini ang kaakig sang hari nag-ugdaw.

← Chapter 6 Jump to: Chapter 8 →