Esther 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Sa sadto nga gab-i indi makatulog ang hari, gani ginpakuha niya ang libro sang maragtas sang ginharian, kag nagsugo sia nga basahon ini sa iya.

2Sa bahin nga ginbasa nasulat didto ang pagsugid ni Mardoqueo nahanungod sang pagplano sang duha ka mga kapon nga si Bigtan kag si Teres nga nagabantay sang mga kwarto ni Haring Ahasuero sa pagpatay sa iya.

3Ang hari nagpamangkot, “Ano nga kadungganan ukon balos ang nahatag kay Mardoqueo tungod sini?” Ang mga alagad sang hari nagsabat, “Wala gid, Mahal nga Hari.”

4Ang hari nagpamangkot, “Sin-o bala nga opisyal ang yara sa palasyo?” Karon si Haman bag-o lang mag-abot sa nagwa nga pasiyuhan sang palasyo sa pagpangayo sa hari nga si Mardoqueo dapat bitayon sa bitayan nga iya ginhanda.

5Gani, ang mga alagad nagsabat, “Yari si Haman nagahulat sa pagpakigkita sa imo.” Ang hari nagsiling, “Pasudla sia.”

6Gani si Haman nagsulod kag ang hari nagpamangkot sa iya, “May tawo nga luyag ko gid pasidunggan. Ano bala ang himuon ko para sa sini nga tawo?” Si Haman nagsiling sa iya kaugalingon, “Wala na sing iban nga pasidunggan ang hari kundi ako.”

7Gani nagsabat sia sa hari, “Ipadala diri ang harianon nga mga bayu nga ginasuksok sang hari para sa sini nga tawo kag ipahanda ang imo kabayo nga naadornohan.

9Dayon sugoa ang isa sang imo pinakamataas nga opisyal sa pagpabayu sa iya kag pasakyon sia sa kabayo. Guyoron sini nga opisyal ang kabayo palibot sa plasa kag magsinggit: ‘Tan-awa ninyo ang pagpadya sang hari sa tawo nga luyag niya pasidunggan!’”

10Dayon ang hari nagsiling kay Haman, “Dalidali ka, kag kuhaa ang mga bayu kag ang kabayo suno sa imo ginsiling, kag himua ini tanan para kay Mardoqueo, ang Judio nga yara sa pwerta sang palasyo. Himua ang tanan mo nga ginsiling.”

11Gani ginkuha ni Haman ang mga bayu kag ang kabayo, ginpabayuan niya si Mardoqueo, kag ginpasakay sia sa kabayo palibot sa plasa, kag samtang ginaguyod niya ang kabayo, nagasinggit sia: “Tan-awa ninyo ang pagpadya sang hari sa tawo nga luyag niya pasidunggan!”

12Sa tapos sini si Mardoqueo nagbalik sa pwerta sang palasyo kag si Haman nagpauli sing dalidali nga nagapanabon sang iya guya sa daku nga kahuya.

13Ginsugiran niya ang iya asawa kag ang tanan niya nga mga abyan nahanungod sang tanan nga natabo sa iya kag nagsiling sila, “Pierde ka na kay Mardoqueo. Isa sia ka Judio kag wala ka gid sing mahimo batok sa iya. Mapukan gid ikaw sa atubang niya.”

14Samtang nagapakighambal pa sila kay Haman, ang mga kapon sa palasyo nag-abot kag gindala sia sing dalidali sa bangkite nga ginhanda ni Ester.

← Chapter 5 Jump to: Chapter 7 →