Ezra 1

Ilonggo (Maayong Balita nga Biblia (2012))

Jump to: Chapter 2 →

1Sa nahauna nga tuig nga si Ciro amo ang hari sang Persia, ginbuot sang Ginoo nga matuman ang iya ginsiling paagi kay Jeremias nga propeta. Iya gintandog ang tagipusoon ni Ciro agod maghimo sia sang isa ka mando kag isulat ini agod nga basahon sing mabaskog bisan diin sa iya ginharian:

2“Amo ini ang mando ni Ciro nga hari sang Persia. Ang Ginoo, ang Dios sang langit, naghimo sa akon nga pangulo sa bug-os nga kalibutan kag naghatag sa akon sing katungdanan sa pagpatindog sing templo para sa iya sa Jerusalem sa Juda.

3Kabay ang Dios manginkaupod ninyo tanan nga iya mga katawhan. Magkadto kamo sa Jerusalem sa pagpatindog liwat sang Templo sang Ginoo, ang Dios sang Israel, ang Dios nga ginasimba sa Jerusalem.

4Ang bisan sin-o sang iya mga tawo nga nabihag nga nagakinahanglan sing bulig sa pagpauli, dapat pagahatagan sila sang ila mga kaingod sini nga bulig. Maghatag sila sing pilak kag bulawan, mga pagkabutang kag mga kasapatan, kag subong man sang mga halad nga kinabubot-on nga idulot sa Templo sang Dios sa Jerusalem.”

5Dayon ang mga pangulo sang mga kabarangayan sang mga tribo ni Juda kag ni Benjamin, ang mga pari kag mga Levita, kag ang tagsatagsa nga ang ila tagipusoon gintandog sang Ginoo, naghanda sa paglakat kag pagpatindog liwat sang Templo sang Ginoo sa Jerusalem.

6Ang tanan nila nga mga kaingod nagbulig sa ila paagi sa paghatag sing madamo nga mga butang: mga gamit nga pilak, bulawan, mga kinahanglanon sa dalanon, mga kasapatan nga kalargahan, mga butang nga malahalon, kag mga halad nga idulot sa Templo.

7Si Ciro nga hari nag-uli sa ila sang mga yahong kag mga kupa nga ginkuha ni Haring Nabucodonosor sa Templo sa Jerusalem kag ginbutang ini sa templo sang iya mga dios.

8Ginhatag niya ini kay Mitridates, ang pangulo nga tulogyanan sang manggad sang hari, kag gin-isip ini para kay Sesbasar, ang gobernador sang Juda.

9Amo ini ang mga pagkabutang kag ang kadamuon sini: mga yahong nga bulawan para sa mga halad – 30 mga yahong nga pilak para sa mga halad – 1,000 iban nga mga yahong – 29 magamay nga mga yahong nga bulawan – 30 magamay nga mga yahong nga pilak – 410 iban nga mga galamiton – 1,000

11Tanantanan, may 5,400 ka bulawan kag pilak nga mga yahong kag iban nga mga pagkabutang nga gindala ni Sesbasar sang sia kag ang iban nga mga bihag nagkadto sa Jerusalem halin sa Babilonia.

Jump to: Chapter 2 →