Ezra 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Gani si Haring Dario nagmando sa pag-usisa sang mga listahan sang mga hari nga natago sa Babilonia.

2Pero didto sa siudad sang Ecbatana sa probinsya sang Media ang linukot nga tulon-an nakita, nga may nasulat nga masunod:

3“Sa nahauna nga tuig sang iya paggahom, si Haring Ciro nagmando nga ang Templo sa Jerusalem patindugon liwat subong isa ka lugar sa diin ang mga halad kag mga dulot pagasunogon. Ang Templo nobenta ka tapak ang kataason kag nobenta ka tapak ang kalaparon.

4Ang mga pader pagapatindugon nga may isa ka sampaw sang tablon sa ibabaw sang tagsa ka sampaw sang tatlo ka mga bato. Ang tanan nga kagastohanan pagabayaran gikan sa manggad sang hari.

5Ang bulawan kag ang pilak man nga mga galamiton nga gindala ni Haring Nabucodonosor sa Babilonia gikan sa Templo sa Jerusalem pagaiuli sa ila naiguan nga lugar sa Templo sa Jerusalem.”

6Dayon si Haring Dario nagpadala sining masunod nga sabat: “Sa kay Tatnai nga gobernador sang Nakatundan-sang-Eufrates, kay Setar-boznai, kag sa inyo kapareho nga mga opisyales sa Nakatundan-sang-Eufrates. “Palayo kamo sa Templo,

7kag indi pagbalabagi ang pagpatindog sini. Pabay-i ang gobernador sang Juda kag ang mga pangulo sang mga Judio sa pagpatindog liwat sang Templo sang Dios sa diin ini nagatindog sang una.

8Nagamando ako sa inyo sa pagbulig sa ila sa pagpatindog sini liwat. Ang ila kagastohanan pagabayaran gilayon gikan sa kwarta sang hari, nga ginkuha gikan sa mga buhis sa Nakatundan-sang-Eufrates, agod nga ang pagpaobra indi masablagan.

9Hatagan ninyo ang mga pari sa Jerusalem adlaw-adlaw nga wala untat, sang bisan ano nga isiling nila sa inyo nga kinahanglan nila: mga baka nga torite, mga karnero, ukon mga kordero nga pagasunogon subong mga halad sa Dios sang langit, ukon mga trigo, asin, bino, ukon lana sang olivo.

10Kinahanglan ini matuman agod nga makadulot sila sing mga halad nga kahalamut-an sa atubang sang Dios sang langit, kag magpangamuyo sang iya bendisyon sa akon kag sa akon mga anak nga lalaki.

11Nagasugo pa gid ako nga kon may isa nga indi magtuman sini nga mando, ang isa ka balayan sang iya balay pagakuhaon, taliwison ini kag ibuno sa iya lawas. Kag ang iya balay himuon nga tulumpokan sang ipot.

12Kabay ang Dios nga nagpili sa Jerusalem subong lugar sa diin sia pagasimbahon maglaglag sang bisan sin-o nga hari ukon pungsod nga indi magtuman sini nga sugo kag magtinguha sa paglaglag sang Templo didto. Ako, si Dario, nagmando sini. Ang akon mando kinahanglan tumanon sing bug-os.”

13Dayon si Tatnai nga gobernador, si Setar-boznai, kag ang ila kapareho nga mga opisyales nagtuman suno gid sa ginsugo sang hari.

14Ang mga pangulo nga Judio nagpadayon sa pagpatindog sang Templo tungod sa pagpaisog sang mga propeta nga si Hageo kag si Zacarias. Ginhuman nila ang Templo suno sa mando sang Dios sang Israel paagi kay Ciro, Dario, kag kay Artajerjes, mga hari sang Persia.

15Natapos nila ang Templo sa ikatlo nga adlaw sang bulan sang Adar, sa ikaanom nga tuig sang paggahom ni Dario nga hari.

16Dayon ang mga tawo sang Israel—ang mga pari, ang mga Levita, kag ang tanan nga nagbalik halin sa pagkabihag—naghalad sang Templo sing malipayon.

17Para sa paghalad sing Templo nagdulot sila sing 100 ka toro nga mga baka, 200 ka mga karnero, kag 400 ka mga kordero subong mga halad, kag dose ka mga kanding subong mga dulot tungod sa sala, isa para sa tagsa ka tribo sang Israel.

18Ila man ginpahamtang ang mga pari kag mga Levita sa ila pag-alagdan sa Templo sa Jerusalem, suno sa mga sugo nga yara sa libro ni Moises.

19Ang mga tawo nga nagbalik halin sa pagkabihag naghiwat sang Piesta sa Pascua sa ika-14 nga adlaw sang nahauna nga bulan sang madason nga tuig.

20Ang tanan nga mga pari kag mga Levita nagpaninlo sang ila kaugalingon kag nanginmatinlo sila. Ang mga Levita nag-ihaw sing mga kordero para sa mga halad sa Pascua para sa tanan nga mga tawo nga nagbalik, para sa mga pari, kag para sa ila kaugalingon.

21Ini nga mga halad ginkaon sang tanan nga mga Israelinhon nga nagbalik halin sa pagkabihag, kag sang tanan nga mga tawo nga nagbiya sa pagsimba sang mga diosdios nga ginahimo sang iban nga mga tawo nga nagaestar sini nga duta kag nagsimba sa Ginoo nga Dios sang Israel.

22Sa sulod sang pito ka adlaw nagsaulog sila sing malipayon sang Piesta sang Tinapay nga wala sing Lebadora. Nagkalipay gid sila tungod kay ang Ginoo nagbuot nga ang hari sang Asiria magmaayo sa ila, agod mabuligan sila sa pagpatindog liwat sang Templo sang Dios sang Israel.

← Chapter 5 Jump to: Chapter 7 →