Ezra 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sang pag-abot sang ikapito nga bulan, ang mga tawo sang Israel nag-estar na sa ila mga banwa. Dayon nagtililipon sila sa Jerusalem,

2kag si Jesua nga anak ni Josadac, ang iya kapareho nga mga pari, kag si Zorobabel nga anak ni Sealtiel, upod sa iya mga pariente, nagpatindog liwat sang altar sang Dios sang Israel, agod nga makasunog sila sang mga halad sa sini suno sa mga pagsulondan nga ginsulat sa Kasugoan ni Moises, ang tawo sang Dios.

3Bisan ang nagbalik nga mga bihag nagakahadlok sa mga tawo nga nagaestar sa duta, ginpatindog nila liwat ang altar sa iya nahamtangan sang una. Dayon nagsugod sila liwat sa pagsunog sa altar sang kinaandan nga mga halad sa aga kag sa hapon.

4Ginsaulog nila ang Piesta sang mga Palasilungan suno sa mga pagsulondan, kag sa kada-adlaw nagdulot sila sang mga halad nga ginakinahanglan sa sina nga adlaw.

5Kag wala labot sini, nagdulot sila sang kinaandan nga mga halad nga pagasunogon sing bug-os kag sang mga halad sa Piesta sang Lati, kag sa tanan nga kinaandan nga pagtililipon sa diin ang Ginoo ginasimba subong man ang tanan nga mga dulot nga ginahalad sing kinabubot-on sa Ginoo.

6Bisan ang mga tawo wala pa makasugod sa pagpatindog liwat sang Templo, nagsugod sila sa nahauna nga adlaw sang ikapito nga bulan sa pagsunog sang mga halad sa Ginoo.

7Ang mga tawo naghatag sang kwarta nga ibayad sa mga panday, kag sa mga manugbasbas sang mga bato kag naghatag man sila sang kalan-on, ilimnon, kag lana sang olivo nga ipadala sa mga siudad sang Tiro kag Sidon agod ibaylo sa mga kahoy nga sedro nga halin sa Libano, nga pagabalsahon sa dagat pakadto sa Jope. Ini tanan nahimo sa pahanugot ni Ciro nga hari sang Persia.

8Gani sa ikaduha nga bulan sang tuig sa tapos sila nagbalik sa Jerusalem, sa lugar sa diin makita ang Templo sang Ginoo, nagsugod sila sa pag-obra. Si Zorobabel, si Jesua, kag ang tanan nila nga mga kasimanwa, ang mga pari, ang mga Levita, kag ang tanan nga mga bihag nga nagbalik sa Jerusalem, nagbuylog sa pag-obra. Ang tanan nga mga Levita nga nagaedad sang baynte ka tuig paibabaw gintugyanan sang bulohaton sa pagpatindog liwat sang Templo.

9Si Jesua nga Levita kag ang iya mga anak nga lalaki kag ang iya mga pariente, kag si Kadmiel kag ang iya mga anak nga lalaki—ang barangay ni Odabias —nagbuylog sa pagpakigbahin sa pagpatindog liwat sang templo. Ginbuligan sila sang mga Levita gikan sa barangay ni Henadad.

10Sang pagsugod nila pasad sang sadsaran sang Templo, ang mga pari nga nakasuksok na sang ila mga sutana nagkadto sa ila mga lugar nga may mga trumpeta sa ila mga kamot, kag ang mga Levita sa barangay ni Asaf didto man nga may mga platilyos. Gindayaw nila ang Ginoo, suno sa mga pagsulondan nga ginpalaton halin sang panahon ni Haring David.

11Nagkanta sila sang mga pagdayaw sa Ginoo, nga ginasulit nila ang koro: “Ang Ginoo maayo, kag ang iya gugma wala sing katapusan.” Ang tagsatagsa nagsinggit sing mabaskog nga nagadayaw sa Ginoo, tungod kay ang sadsaran sang Templo nasugoran na.

12Madamo sang tigulang nga mga pari, mga Levita, kag mga pangulo sang mga kabarangayan ang nakakita sang nahauna nga Templo. Samtang nagatan-aw sila nga ginaobra ang sadsaran sang Templo naghibi kag nagpanalambiton sila. Pero ang iban nga yadto didto naghinugyaw.

13Indi mahibaluan ang gahod sang paghinugyaw kag ang gahod sang paghinibi, tungod kay ang pagsininggit matunog kaayo nga sarang mabatian bisan sa malayo.

← Chapter 2 Jump to: Chapter 4 →