Ezra 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Sang makaligad ang mga tinuig, sang si Artajerjes amo ang hari sang Persia, may isa ka tawo nga ginahingalanan kay Esdras. Gin-usisa niya ang iya mga katigulangan halin kay Aaron, ang Pinakamataas nga Pari. Ini sila amo ang masunod: si Esdras anak ni Seraya, si Seraya anak ni Azarias, si Azarias anak ni Helkias,

2si Helkias anak ni Sallum, si Sallum anak ni Sadoc, si Sadoc anak ni Ahitub,

3si Ahitub anak ni Amarias, si Amarias anak ni Azarias, si Azarias anak ni Meraiot,

4si Meraiot anak ni Zeraias, si Zeraias anak ni Uzi, si Uzi anak ni Buki,

5si Buki anak ni Abisua, si Abisua anak ni Fineas, si Fineas anak ni Eleazar, si Eleazar anak ni Aaron.

6Si Esdras manunodlo nga makahibalo sing maayo sang Kasugoan nga ginhatag sang Ginoo, ang Dios sang Israel, kay Moises. Tungod kay si Esdras ginpakamaayo sang Ginoo nga iya Dios, ang hari naghatag sa iya sang tanan niya nga ginpangayo. Si Esdras naghalin sa Babilonia pakadto sa Jerusalem, upod sa isa ka grupo sang mga Israelinhon nga nagalakip sa mga pari, mga Levita, mga musikero sa Templo, mga gwardya sa Templo, kag mga manug-obra. Ini nahanabo sa ikapito nga tuig nga si Artajerjes amo ang hari.

8Naghalin sila sa Babilonia sa nahauna nga adlaw sang nahauna nga bulan, kag sa bulig sang Dios nag-abot sila sa Jerusalem sa nahauna nga adlaw sang ikalima nga bulan.

10Gintugyan ni Esdras ang iya kabuhi sa pagtuon sang Kasugoan sang Ginoo, sa pagtuman sini, kag sa pagtudlo sang iya tanan nga mga sugo kag pagsulondan sa mga tawo sang Israel.

11Si Haring Artajerjes naghatag sang masunod nga mga papeles kay Esdras, ang pari kag manunodlo nga makahibalo sing maayo sang mga kasugoan kag mga sugo nga ginhatag sang Ginoo sa Israel:

12“Gikan kay Haring Artajerjes para kay Esdras nga pari, manunodlo sang Kasugoan sang Dios sang langit.

13“Nagamando ako nga sa bug-os ko nga ginharian ang tanan nga Israelinhon, mga pari, kag mga Levita nga may handom sa pag-upod sa imo sa Jerusalem pagatugotan.

14Ako, upod sang akon pito ka manuglaygay, nagapadala sa imo sa pag-usisa sang mga kahimtangan sa Jerusalem kag sa Juda kon bala ginatuman sing maayo ang Kasugoan nga gintugyan sa imo sang imo Dios.

15Dalhon mo ang bulawan kag ang pilak nga mga dulot nga ginahatag ko kag sang akon mga manuglaygay sa Dios sang Israel, nga ang iya Templo yara sa Jerusalem.

16Dalhon mo man ang tanan nga mga pilak kag bulawan nga imo gintipon sa bug-os nga probinsya sang Babilonia kag ang mga dulot nga kinabubot-on sang mga Israelinhon kag sang ila mga pari nga ihatag sa Templo sang ila Dios sa Jerusalem.

17“Gastuhon mo ini nga kwarta sing maayo kag magbakal sing toro nga mga baka, mga karnero nga lalaki, mga kordero, trigo, kag bino, kag ihalad mo ini sa altar sang Templo sa Jerusalem.

18Gamiton mo ang pilak kag bulawan nga nabilin sa bisan ano nga luyag mo kag sang imo mga kasimanwa, suno sa kabubot-on sang inyo Dios.

19Ihatag mo sa Dios sa Jerusalem ang tanan nga mga gamit nga ginhatag sa imo nga gamiton sa mga pag-alagad sa Templo.

20Kag ang bisan ano pa nga imo kinahanglan para sa Templo, sarang mo makuha ini gikan sa manggad sang hari.

21“Ako nagamando sa tanan nga mga opisyales nga nagatago sang manggad sang hari sa Probinsya sang Nakatundan-sang-Eufrates, sa paghatag sa gilayon kay Esdras, ang pari kag manunodlo sang Kasugoan sang Dios sang langit, sang bisan ano nga iya pangayuon sa inyo,

22tubtob sa 7,500 ka libra nga pilak, 500 ka sako nga trigo, 550 ka galon nga bino, 550 ka galon nga lana sang olivo, kag ang bisan ano kadamo nga kinahanglanon nga asin.

23Kinahanglan maghalong kamo sa paghatag sang bisan ano nga ginakinahanglan sang Dios sang langit para sa iya Templo, kag sigurohon ninyo nga indi sia mangakig sa akon kag sa mga magagahom tapos sa akon.

24Ginadilian kamo sa pagkuha sang bisan ano nga buhis sa mga pari, sa mga Levita, sa mga musikero, sa mga gwardya, sa mga manug-obra, ukon sa bisan kay sin-o nga may kaangtanan sa sini nga Templo.

25“Ikaw, Esdras, paagi sa kaalam nga ginhatag sang Dios sa imo, magpili ka sang mga manugdumala kag mga hukom sa paggahom sang tanan nga mga tawo sa Nakatundan-sang-Eufrates nga nagakabuhi suno sa Kasugoan sang imo Dios. Kinahanglan itudlo mo ang Kasugoan sa kay bisan sin-o nga wala makahibalo sini.

26Ang bisan sin-o nga maglapas sa mga kasugoan sang imo Dios, ukon sang mga kasugoan sang ginharian, pagasilutan sia gilayon: paagi sa kamatayon, ukon paagi sa pagtapok sa iya, ukon paagi sa pagkuha sang iya pagkabutang, ukon paagi sa pagbilanggo sa iya.”

27Si Esdras nagsiling, “Dayawon ang Ginoo, ang Dios sang aton mga katigulangan! Ginhimo niya nga ang hari magpasidungog sing kinabubot-on sang Templo sang Ginoo sa Jerusalem sa sini nga paagi!

28Paagi sa bulig sang Dios, ang hari, ang iya mga manuglaygay, kag ang tanan niya nga gamhanan nga mga opisyales nagpakita sang ila kaayo sa akon. Ang Ginoo nga akon Dios naghatag sa akon sing kaisog, kag nahaylo ko ang madamo nga mga pangulo sang mga kabarangayan sang Israel sa pagbalik upod sa akon.”

← Chapter 6 Jump to: Chapter 8 →