Ezra 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Sang matapos ini nga mga butang, ang iban nga mga pangulo sang mga tawo sang Israel nagkadto kag nagsiling sa akon nga ang mga tawo, mga pari, kag ang mga Levita wala magpain sang ila kaugalingon gikan sa mga tawo sang mga kapungsoran sa palibot nga amo ang mga Canaanhon, mga Hethanon, mga Peresnon, mga Jebusnon, mga Amonhon, mga Moabnon, mga Ehiptohanon, kag mga Amornon. Naghimo sila sang makahuloya nga mga butang nga amo man ang ginhimo sini nga mga tawo.

2Ang mga lalaki nga Judio nagpangasawa sang dumoluong nga mga babayi, gani ang balaan nga mga tawo sang Dios nadagtaan. Ang mga pangulo kag mga opisyales amo ang labing malinapason.

3Sang pagkabati ko sini, gingisi ko ang akon mga bayu sa kasubo, gingan-it ko ang akon buhok kag bungot, kag nagpungko sa tama nga kasubo.

4Nagpungko ako didto nga nagakasubo tubtob sa tion sang pagdulot sang halad sa kahapunanon, kag ang mga tawo nagtipon nga nagalibot sa akon—ang tanan nga nahadlukan tungod sa ginsiling sang Dios sang Israel nahanungod sa mga sala sang mga tawo nga nagbalik halin sa pagkabihag.

5Sang tion na sang paghalad sa kahapunanon, nagtindog ako sa lugar diin ako nagpangasubo nga nagasuksok pa gihapon sang akon bayu nga gisi, nagluhod ako sa pagpangamuyo nga nagabayaw sang akon mga kamot sa Ginoo nga akon Dios.

6Nagsiling ako, “O Dios, nahuya gid ako sa pagbayaw sang akon ulo sa imo atubang. Ang amon mga sala nagtumpok nga mas mataas pa sang sa amon mga ulo; naglambot ini subong kataas sang langit.

7Gikan sa mga inadlaw sang amon mga katigulangan tubtob karon, kami nga imo mga tawo nagpakasala sa imo sing daku. Tungod sang amon mga sala kami, ang amon mga hari, kag ang amon mga pari gintugyan sa mga kamot sang dumoluong nga mga hari, ginpamatay kami, gin-agawan sang amon mga pagkabutang, ginbihag kag ginpakahuy-an, subong sini ang amon kahimtangan tubtob sini nga adlaw.

8Karon sa malip-ot nga tion, O Ginoo nga amon Dios, nagmaluloy-on ka sa amon kag gintugotan mo nga ang iban sa amon makapalagyo gikan sa pagkaulipon kag sa pagkabuhi sing malinong sa sining balaan nga lugar. Ginpapalagyo mo kami gikan sa pagpaulipon kag ginhatagan mo kami sing bag-o nga kabuhi.

9Mga ulipon kami, pero wala mo kami pagpatumbayai sa amon pagkaulipon. Ginhimo mo ang mga hari sang Persia nga magkaluoy kag magtugot sa amon sa pagpadayon sa pagkabuhi kag sa pagpatindog liwat sang imo Templo nga nagguba, kag sa pag-estar diri sing malinong sa Juda kag sa Jerusalem.

10“Pero karon, O Dios, ano bala ang masiling namon sa tanan sining natabo? Ginsupak namon liwat ang tanan nga mga sugo

11nga imo ginhatag sa amon paagi sa imo mga alagad nga mga propeta. Ginsingganan nila kami nga ang duta nga amon panag-iyahan di-matinlo, tungod kay ang mga tawo nga nag-estar sa duta nagpuno sini sing mahigko kag makangilil-ad nga mga buhat.

12Ginsingganan nila kami nga indi gid kami magpangasawa ukon magpamana sa sadtong mga tawo kag indi gid kami magbulig sa ila agod nga sila mag-uswag ukon magmadinalag-on kon luyag kami sa pagpulos sang patubas sang duta kag sa pagbilin sini sa amon mga kaliwat sa wala sing katapusan.

13Bisan sa tapos sadtong mga pagsilot sa amon tungod sang amon mga sala kag mga paglapas, nahibaluan namon nga ikaw, nga amon Dios, nagsilot sa amon sing kulang pa sa nagakabagay sa amon kag nagtugot sa amon nga mabuhi.

14Karon mapatumbayaan pa bala namon liwat ang imo mga kasugoan kag magpangasawa ukon magpamana sa sining malaut nga mga tawo? Kon himuon namon ina liwat, magakaakig gid ikaw kag laglagon mo kami sing bug-os kag indi magtugot nga may isa nga mabilin nga buhi.

15Ginoo nga Dios sang Israel, matarong ka, pero gintugotan mo kami nga mabuhi. Nagatuad kami sang amon mga sala sa imo. Wala kami sing kinamatarong sa pagpalapit sa imo atubang.”

← Chapter 8 Jump to: Chapter 10 →