Ezra 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sa sadto nga tion ang duha ka mga propeta nga si Hageo kag si Zacarias nga anak ni Iddo, nagsugod sa paghatag sing mga mensahe halin sa Dios sang Israel sa mga Judio nga nagaestar sa Juda kag Jerusalem.

2Sang mabalitaan ni Zorobabel nga anak ni Sealtiel, kag ni Jesua nga anak nga lalaki ni Josadac ang mga mensahe, nagsugod sila sa pagpatindog liwat sang Templo sa Jerusalem, kag ang duha ka mga propeta nagbulig sa ila.

3Sa gilayon si Tatnai nga gobernador sang Nakatundan-sang-Eufrates, si Setar-boznai kag ang ila kaupod nga mga opisyales nagkadto sa Jerusalem kag nagsiling: “Sin-o ang nagsugo sa inyo sa pagpatindog sini nga Templo kag sa pagbutang sang kasangkapan sini?”

4Nagpamangkot man sila sang mga ngalan sang tanan nga mga tawo nga nagbulig sa pagpatindog sang Templo.

5Pero ang Dios nagabantay sang mga pangulo nga mga Judio, kag ang mga opisyales sang Persia nagpamat-od nga pabay-an anay nila tubtob makasulat sila Haring Dario kag makabaton sila sing iya sabat.

6Amo ini ang sulat nga ginpadala nila sa hari:

7“Sa kay Dario nga hari, kabay nga maggahom ikaw sa kalinong.

8“Mahal nga Hari, dapat mo mahibaluan nga nagkadto kami sa probinsya sang Juda kag nasapwan namon nga ang Templo sang gamhanan nga Dios ginapatindog liwat nga may dalagku nga mga bato kag may mga tablon nga balayan nga napahamtang sa pader. Maayo gid ang ila pag-obra kag wala ini nagauntat.

9“Nagpamangkot kami sa mga pangulo sang mga tawo sa pagsugid sa amon kon sin-o ang naghatag sa ila sing awtoridad sa pagpatindog liwat sang Templo kag sa pagbutang sang iya kasangkapan sini.

10Nagpamangkot man kami sa ila sang ila mga ngalan agod amon ikaw mapahibalo kon sin-o ang mga pangulo sang pagpaobra sini.

11“Nagsabat sila, ‘Mga alagad kami sang Dios sang langit kag sang duta, kag nagapatindog kami liwat sang Templo nga ginpatindog kag ginbutangan sing mga kasangkapan sang una sang isa ka gamhanan nga hari sang Israel.

12Pero tungod kay ang amon mga katigulangan nagpaakig sa Dios sang langit, ginpalutos niya sila sa kay Nabucodonosor nga hari sang Babilonia, isa ka hari gikan sa harianon nga panimalay sang Caldeo. Ang Templo nalaglag kag ang mga tawo gindala nga mga bihag sa Babilonia.

13Dayon, sa nahauna nga tuig sang paggahom ni Ciro subong hari sang Babilonia, naghatag sia sing mando sa pagpatindog liwat sang Templo.

14Ginbalik niya ang bulawan kag pilak nga mga galamiton sa Templo nga ginkuha ni Nabucodonosor sa Templo sang Jerusalem kag ginbutang ini sa templo sa Babilonia. Si Haring Ciro nga nagbalik sining mga galamiton sa isa ka tawo nga ginhingalanan kay Sesbasar, nga iya ginpili nga gobernador sang Juda.

15Ang hari nagsiling sa iya sa pagdala sini kag ibalik sa Templo sang Jerusalem, kag sa pagpatindog liwat sang Templo sa ginatindugan sini sang una.

16Gani si Sesbasar nag-abot kag nagpasad sang mga sadsaran sini. Ang pagpatindog nagpadayon halin sadto tubtob sini nga adlaw, pero wala pa gid ini matapos.’

17“Karon, kon nahamut-an sang Mahal nga Hari, ipausisa sa mga listahan sang mga hari sa Babilonia sa paghibalo kon bala si Ciro nga hari nagmando sa pagpatindog liwat sang Templo sa Jerusalem, kag dayon pahibal-on mo kami kon ano ang imo luyag sini nga butang.”

← Chapter 4 Jump to: Chapter 6 →