Ezra 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Ang mga kaaway sang mga tawo sang Juda kag Benjamin nakabati nga ang nagbalalik gikan sa pagkabihag nagapatindog liwat sang Templo sang Ginoo, ang Dios sang Israel.

2Gani nagkadto sila kay Zorobabel kag sa mga pangulo sang mga kabarangayan kag nagsiling, “Pabuliga kami sa inyo sa pagpatindog sang Templo. Nagasimba kami sa Dios nga inyo man ginasimba kag nagdulot kami sing mga halad sa iya halin pa sang ginpadala kami ni Haring Esarhadon sang Asiria sa pag-estar diri.”

3Si Zorobabel, Jesua, kag ang mga pangulo sang mga kabarangayan nagsiling sa ila, “Indi namon kinahanglan ang inyo bulig sa pagpatindog sang templo para sa Ginoo nga amon Dios. Kami lang ang magapatindog sini, suno sa ginsugo sa amon ni Ciro nga hari sang Persia.”

4Dayon ang mga tawo nga nagaestar sina nga duta nagtinguha sa pagpaluya kag sa pagpahadlok sa mga Judio kag sa pagpauntat sang ila obra.

5Ginhamhaman man nila ang mga opisyales sang gubyerno sang Persia sa pagpamatok sa ila. Ginpadayon nila ini sa paghimo tubtob matapos ang paggahom ni Ciro nga hari kag tubtob sa paggahom ni Haring Dario.

6Sang pagsugod sang paggahom ni Haring Ahasuero, ang mga kaaway sang mga tawo nga nagaestar sa Juda kag Jerusalem nagdala sing mga panumbongon nga nasulat batok sa ila.

7Sa liwat sang paggahom ni Artajerjes nga hari sang Persia, si Bislam, si Mitredat, si Tabeel kag ang iya mga kaupdanan, nagsulat sa hari. Ginsulat ini sa Aramico kag pagabadbaron sa hambal sang Persia kon basahon.

8Si Rehum, ang gobernador, kag si Simsai nga sekretaryo sang probinsya nagsulat man sining sulat kay Haring Artajerjes nahanungod sa Jerusalem:

9“Gikan, kay Rehum, nga gobernador, kay Simsai, nga sekretaryo sang probinsya, gikan sa ila mga kaupod, ang mga hukom, kag gikan sa tanan nga iban nga mga opisyales nga amo ang mga tawo nga naghalin sa Erec, sa Babilonia, kag sa Susa sa duta sang Elam,

10upod sa iban nga mga tawo nga ginpasaylo sa ila mga ilistaran ni Osnapar nga bantog kag gamhanan kag ginpaestar sa siudad sang Samaria kag sa mga lugar sa Probinsya sang Nakatundan-sang-Eufrates.”

11Amo ini ang kaundan sang ila sulat: “Sa kay Haring Artajerjes gikan sa iya mga alagad nga mga tawo sang Nakatundan-sang-Eufrates.

12“Luyag namon, Mahal nga Hari, nga mahibaluan mo nga ang mga Judio nga nag-abot diri gikan sa imo iban nga mga kadutaan nag-estar sa Jerusalem kag nagapatindog liwat sinang malaut kag mabinatuon nga siudad. Nagsugod sila sa pagkaayo sang mga pader kag sa indi madugay matapos na nila ini.

13Mahal nga Hari, kon ining siudad mapatindog liwat kag ang iya mga pader mahuman, ang mga tawo indi na magbayad sang ila mga buhis kag maganubo ang imo ginabaton nga mga buhis.

14Karon, tungod kay may katungdanan kami sa imo Mahal nga Hari, indi kami luyag matabo ini, gani nagapangabay kami

15nga magmando ka sa pag-usisa sang mga listahan nga gintago sang imo mga katigulangan. Kon himuon mo ini, masapwan mo nga ini nga siudad mabinatuon kag halin sang una nga panahon naghatag ini sing libog sa mga hari kag sa mga pangulo sang mga probinsya. Ang mga pumoluyo mabudlay gid man gamhan. Gani ini nga siudad ginlaglag.

16Nagapati kami nga kon ining siudad mapatindog liwat kag ang iya mga pader mahuman, ikaw, Mahal nga Hari, indi na makagahom sang Probinsya sang Nakatundan-sang-Eufrates.”

17Ang hari nagpadala sini nga sabat: “Sa kay Rehum nga gobernador, kay Simsai nga sekretaryo sang probinsya, kag sa ila mga kaupdanan nga nagaestar sa Samaria kag sa iban nga yara sa Nakatundan-sang-Eufrates, batuna ninyo ang akon mga pag-abiabi.

18“Ang sulat nga inyo ginpadala ginbadbad kag ginbasa sa akon.

19Nagmando ako sa pag-usisa nahanungod sini, kag nasapwan nga halin sang una ang Jerusalem nagrebelde batok sa gahom sang hari, kag napun-an ini sing mga rebelde kag mga manuggamo.

20Ang gamhanan nga mga hari naggahom didto kag naghari sa bug-os nga probinsya sang Nakatundan-sang-Eufrates, nga nagakuha sang mga buhis kag mga balayran.

21Gani maghatag kamo sing mando nga inang mga tawo mag-untat sa pagpatindog liwat sang siudad tubtob nga maghatag ako sing dugang nga mga sugo.

22Himua ninyo ini sa gilayon agod nga indi na madugangan ang kahalitan sa akon ginharian.”

23Sang mabasa ang sulat gikan kay Haring Artajerjes sa kay Rehum, Simsai, kag sa ila mga kaupod, nagdalidali sila kadto sa Jerusalem kag ginpilit ang mga Judio nga mag-untat sa pagpatindog liwat sang siudad.

24Gani ang pagpaobra sa Templo wala na pagpadayuna tubtob sa ikaduha nga tuig sang paggahom ni Dario nga hari sang Persia.

← Chapter 3 Jump to: Chapter 5 →