1 Chronicles 11

Ilonggo (Ang Biblia (1982))

← Chapter 10 Jump to: Chapter 12 →

1Niyan ang bug-os nga Israel nagtipon sa ila kaugalingon kay David sa Hebron, nga nagasiling, “Yari karon, kami imo tul-an kag imo unud.

2Sa mga tion nga nagligad, bisan sang hari pa si Saul, ikaw ang nagpagowa kag nagpasulud sa Israel; kag ang Ginoo nga imo Dios nagsiling sa imo, ‘Ikaw manginmanugpahalab sang akon katawohan nga Israel, kag ikaw manginpangolo sa akon katawohan nga Israel.’”

3Gani ang tanan nga tigulang sang Israel nag-abut sa hari sa Hebron; kag si David nagpakigkatipan sa ila sa Hebron sa atubangan sang Ginoo, kag ginhaplas nila nga hari si David sa ibabaw sang Israel, sono sa polong sang Ginoo kay Samuel.

4Kag si David kag ang bug-os nga Israel nagkadto sa Jerusalem, nga amo ang Jebus, nga didto ang mga Jebusnon, ang mga pumuluyo sang duta.

5Ang mga pumuluyo sang Jebus nagsiling kay David, “Dili ka magsulud diri.” Walay sapayan si David nag-agaw sang pamakud sang Sion, nga amo, ang banwa ni David.

6Si David nagsiling, “Ang bisan sin-o nga nagasolong sing una sa mga Jebusnon manginpuno kag pangolo.” Kag si Joab nga anak ni Sarvia nagtaklad sing una, gani ginhimo nga puno.

7Kag si David nagpuyo sa pamakud; busa gintawag nila ini nga banwa ni David.

8Kag ginpatindug niya ang banwa sa palibut kutub sa Milyo palibut gid; kag ginkaayo ni Joab ang nabilin sang banwa.

9Kag si David nagdaku kag nagdaku pa, kay ang Ginoo sang mga kasoldadosan nag-upud sa iya.

10Karon yari ang mga pangolo sang gamhanan nga mga tawo nga iya ni David, nga nagpahayag sang ila kaugalingon nga malig-on upud sa iya sa ginharian niya, upud sa bug-os nga Israel, sa paghimo sa iya nga hari, sono sa polong sang Ginoo nahanungud sa Israel.

11Amo ini ang kadamuon sang gamhanan nga mga tawo nga iya ni David: si Jasobeam, ang anak nga lalaki sang Hacmonhon, ang puno sang katloan; sia nagbayaw sang iya bangkaw batok sa tatlo ka gatus nga ginpatay sila sa isa ka tion.

12Kag madason sa iya si Eleazar nga anak ni Dodo, ang Ahohanon, nga isa sang tatlo ka gamhanan nga mga lalaki.

13Sia nag-upud kay David sa Pas-damin sang didto ang mga Filistinhon nagtipon sing tingub sa inaway. Didto may puna sang duta nga hil-ob sang sebada, kag nagpalagyo ang katawohan gikan sa atubangan sang mga Filistinhon.

14Apang nagtindug sila sa tunga sang puna, kag gin-apinan ini, kag ginpatay ang mga Filistinhon; kag ginluwas sila sang Ginoo sa daku nga pagdaug.

15Ang tatlo sang katloan ka puno nga mga tawo nagdulhog sa igang kay David sa lungib sang Adullam, nga ang kasoldadosan sang mga Filistinhon nagapahamtang sing dologan sa nalupyakan sang Refaim.

16Si David didto pa niyan sa kuta; kag ang pamakud nga balantayan sang mga Filistinhon didto pa sa Bet-lehem.

17Kag naghandum si David nga nagsiling, “O kabay kuntani nga may isa nga makapainum sa akon sang tubig sa bobon sang Bet-lehem nga yara sa luyo sang gawang!”

18Niyan ang tatlo nagbulwang sa kasoldadosan sang mga Filistinhon, kag nagsag-ub sing tubig sa bobon sang Bet-lehem nga yara sa luyo sang gawang, kag nagkuha sini kag gindala ini kay David. Apang si David indi buut mag-inum sini; kondi gin-ula niya ini sa Ginoo,

19kag nagsiling, “Ang akon Dios nagadumili sini sa akon nga ako maghimo sini. Magainum bala ako sang dugo sini nga mga lalaki nga nagbutang sang ila kabuhi sa katalagman? Kay sa katalagman sang ila mga kabuhi gindala nila ini.” Busa indi sia mag-inum sini. Ini nga mga butang ginhimo sang tatlo ka gamhanan nga mga lalaki.

20Karon si Abisai, ang utud ni Joab, puno sang tatlo. Ginbayaw niya ang iya bangkaw batok sa tatlo ka gatus kag ginpatay sila, kag may kabantugan sa tatlo.

21Sa tatlo sia labi pa ka dungganon sang sa duha, kag ginhimo nga pangolo nila; apang wala sia makatupung sa tatlo nga nahauna.

22Si Benaya nga anak ni Joiada ang anak sang isganan nga lalaki sang Cabzeel, nga nakahimo sing gamhanan nga mga buhat; ginpatay niya ang duha ka anak nga lalaki ni Ariel sang Moab. Sia nagpanaug man kag nagpatay sing leon sa tunga sang awang sa tion sang nieve.

23Kag nakapatay sia sing Egiptohanon, tawo nga mataas gid, lima ka maniko ang kataason. Sa kamut sang Egiptohanon may bangkaw nga subong sang likisan sang manughabol; apang nagdulhog sia sa iya nga may sungkud, kag gin-agaw sa kamut sang Egiptohanon ang bangkaw, kag ginpatay sia sa iya kaugalingon nga bangkaw.

24Ining mga butang ginhimo ni Benaya nga anak ni Joiada, kag may kabantugan sa tunga sang tatlo ka gamhanan nga mga lalaki.

25Sia labi ka dungganon sa katloan, apang wala sia makatupung sa tatlo ka nahauna. Kag ginpadumala sia ni David sang iya kasapul.

26Ang gamhanan man nga mga lalaki sang mga hangaway si Asael nga utud nga lalaki ni Joab, si Elhanan nga anak nga lalaki ni Dodo sang Bet-lehem,

27si Samot nga Harornon, si Helez nga Pelonhon,

28si Ira nga anak ni Iques nga Tecoanhon, si Abiezer nga Anatotnon,

29si Sibecai nga Husatnon, si Elai nga Ahohanon,

30si Maharai nga Netofanhon, si Heled nga anak nga lalaki ni Baana nga Netofanhon,

31si Itai nga anak nga lalaki ni Ribai sang Gabaa gikan sa mga anak ni Benjamin, si Benaya nga Piratonhon,

32si Hurai gikan sa mga sapa sang Gaas, si Abiel nga Arbanhon,

33si Azmavet nga Baharumnon, si Eliaba nga Saalbonhon,

34ang mga anak nga lalaki ni Hasem nga Gisonhon, si Jonatan nga anak nga lalaki ni Sage nga Ararnon,

35si Ahiam nga anak nga lalaki ni Sacar nga Ararnon, si Elifal nga anak nga lalaki ni Ur,

36si Hefer nga Mequeratnon, si Ahia nga Pelonhon,

37si Hezro nga Carmelonhon, si Naarai nga anak nga lalaki ni Ezbai,

38si Joel nga utud nga lalaki ni Natan, si Mibar nga anak nga lalaki ni Hagri,

39si Zelec nga Amonhon, si Naarai nga Berotnon, nga manugdala sang hinganib ni Joab nga anak nga lalaki ni Savia,

40si Ira nga Itrinon, si Gareb nga Itrinon,

41si Urias nga Hethanon, si Zabad nga lalaki nga anak ni Alai,

42si Adina nga anak nga lalaki ni Siza nga Rubenhon, puno sang mga Rubenhon, kag upud sa iya ang katloan,

43si Hanan nga anak nga lalaki ni Maaca, kag si Josafat nga Mithanon,

44si Uzias nga Astarotnon, si Sama, kag si Jeiel nga mga anak nga lalaki ni Hotam nga Aroernon,

45si Jediael nga anak nga lalaki ni Simri, kag si Joha nga iya utud nga lalaki, ang Tizhanon,

46si Eliel nga Mahavnon, si Jeribai kag si Josabia, ang mga anak nga lalaki ni Elnaam, kag si Itma nga Moabnon,

47si Eliel, kag si Obed, kag si Jaasiel nga Mesobanhon.

← Chapter 10 Jump to: Chapter 12 →