1 Chronicles 17

Ilonggo (Ang Biblia (1982))

← Chapter 16 Jump to: Chapter 18 →

1Karon sang si David nagpuyo sa iya balay, nagsiling si David kay Natan nga manalagna, “Yari karon, ako nagapuyo sa isa ka balay nga cedro, apang ang kaban sang katipan sang Ginoo yara sa idalum sang mga kumbung.”

2Kag si Natan nagsiling kay David, “Himoa ang tanan nga yara sa imo tagiposoon, kay ang Dios nagaupud sa imo.”

3Apang sa among gab-i ang polong sang Dios nag-abut kay Natan,

4“Lakat kag isiling kay David nga akon alagad, ‘Amo ini ang ginasiling sang Ginoo: Dili mo ako pagpatindugan sing balay nga akon puluy-an.

5Kay wala ako makapuyo sa balay kutub sang adlaw nga ginpataklad ko ang Israel tubtub sining adlaw, kondi nga nagsaylosaylo sa layanglayang pa layanglayang, kag gikan sa kayangkayang pa isa.

6Sa tanan nga duug nga ginlaktan ko upud sa bug-os nga Israel, nagpamolong bala ako sing isa ka polong sa bisan sin-o sang mga hukom sang Israel, nga ginsogo ko nga magpahalab sang akon katawohan, nga nagasiling, “Ngaa bala nga wala ninyo ako pagpatindugi sing isa ka balay nga cedro?” ’

7Busa karon amo ini ang isiling mo sa akon alagad nga si David, ‘Amo ini ang ginasiling sang Ginoo sang mga kasoldadosan, Ginkuha ko ikaw sa halalban, gikan sa pagsonod sa mga carnero, agud nga manginpangolo ka sa akon katawohan nga Israel;

8kag ako nag-upud sa imo bisan diin ka magkadto, kag ginpapas ko gikan sa atubangan mo ang tanan nga imo kaaway; kag pabantugon ko ikaw, kaangay sang kabantugan sang mga kadalagkuan sa duta.

9Kag magatangdo ako sing duug nga sa akon katawohan nga Israel, kag ako magatanum sa ila, agud nga magpuyo sila sa ila kaugalingon nga duug, kag indi na paghalinon; kag ang mga anak sang pagkamalaut indi na maglaglag sa ila, subong sang sa una,

10kutub sa tion nga nagsogo ako sing mga hukom nga magdumala sa akon katawohan nga Israel; kag daugon ko ang tanan mong kaaway. Labut pa nagasugid ako sa imo nga ang Ginoo magapatindug sa imo sing balay.

11Kon natuman na ang adlaw nga dapat ka isimpon sa imo mga ginikanan, ipahamtang ko ang imo kaliwat madason sa imo, nga nagagikan sa imo mga lalaking anak, kag palig-onon ko ang iya ginharian.

12Sia magapatindug sa akon sing balay, kag ako magapalig-on sang iya trono sing dayon.

13Ako mangin-iya amay, kag sia mangin-akon anak; indi ko pagkuhaon sa iya ang akon malig-on nga paghigugma subong sang pagkuha ko sini sa iya nga nahauna sa imo,

14kondi paluntaron ko sia sa akon balay kag sa akon ginharian sa gihapon kag ang iya trono manginmalig-on sa gihapon.’”

15Sono sa sini tanan nga polong, kag sono sa sining bugos nga palanan-awon, sa amo nagpamolong si Natan kay David.

16Niyan si Hari David nagsulud kag naglingkod sa atubangan sang Ginoo, kag nagsiling, “Sin-o bala ako, O Ginoong Dios, kag ano ang akon panimalay, nga gindala mo ako tubtub diri?

17Kag ini diotay nga butang sa imo mga mata, O Dios; nagpamolong ka man nahanungud sang panimalay sang imo alagad nga sa malayo nga palaabuton, kag gintamud mo ako sono sa kahimtangan sang tawong halangdon, O Ginoong Dios!

18Kag ano pa bala ang masiling ni David sa imo nahanungud sang kadungganan nga nahimo sa imo alagad? Kay kilala mo ang imo alagad.

19O Ginoo, tungud sa imo alagad, kag sono sa imo kaugalingon nga tagiposoon, ginhimo mo ini tanan nga pagkadaku, sa pagpakilala sini tanan nga dalagkung butang.

20O Ginoo, walay kaangay sa imo kag walay Dios luwas sa imo, sono sa tanan nga nabatian namon sang amon mga idulungug.

21Ano bala nga pungsud sa duta ang kaangay sang imo katawohan nga Israel, nga ginkadtoan sang Dios sa pagtubus nga mangin-iya kaugalingon nga katawohan, sa paghatag sa imo sing ngalan tungud sa dalagku kag makakulugmat nga mga butang, sa pagtabog sing mga pungsud sa atubangan sang imo katawohan nga imo gintubus gikan sa Egipto?

22Kay ang imo katawohan nga Israel ginhimo mo nga imo kaugalingon nga katawohan sing dayon; kag ikaw, O Ginoo, nangin-ila Dios.

23Kag karon, O Ginoo, palig-ona sing dayon ang polong nga imo napamolong nahanungud sa imo alagad kag nahanungud sa iya balay, kag himoa sono sa imo napamolong;

24kag palig-ona kag padakua sing dayon ang imo ngalan, nga nagasiling, ‘Ang Ginoo sang mga kasoldadosan, ang Dios sang Israel, amo ang Dios sa Israel,’ kag ang balay sang imo alagad nga si David napalig-on sa atubangan mo.

25Kay ikaw, O Dios ko, nagpahayag sa imo alagad nga patindugan mo sia sing balay; busa ang imo alagad nakakita sa iya tagiposoon sing palangamuyoon sa imo atubangan.

26Kag karon, O Ginoo, ikaw Dios, kag nagsaad sining maayong butang sa imo alagad;

27busa karon ini nagpahamuut sa imo sa pagpakamaayo sang balay sang imo alagad, agud nga magpadayon ini sa atubangan mo sa gihapon; kay ikaw, O Ginoo, nagpakamaayo kag ini ginpakamaayo sa gihapon.”

← Chapter 16 Jump to: Chapter 18 →