1 Chronicles 29

Ilonggo (Ang Biblia (1982))

← Chapter 28 Jump to:

1Kag si David nga hari nagsiling sa bug-os nga katilingban, “Si Salomon nga akon anak, nga amo lamang ang ginpili sang Dios, bataon kag linghud pa, kag ang buluhaton daku; kay ang palacio indi tungud sa tawo kondi tungud sa Ginoong Dios.

2Karon nakaaman ako sa bug-os ko nga kusug tungud sa balay sang akon Dios sang bulawan nga sa mga butang nga bulawan, sang pilak nga sa mga butang nga pilak, kag sang saway nga sa mga butang nga saway, sang salsalon nga sa mga butang nga salsalon, kag sang kahoy nga sa mga butang nga kahoy, sang mga bato nga onice kag mga bato nga inugtampok, mga bato nga inughalup, sang sarisari nga mga duag, tanan nga bagay sang mga bato nga bilidhon, kag mga bato nga marmol sing bugana.

3Labut pa man, bangud nga natuhoy ko ang akon gugma sa balay sang akon Dios, sa ginatan-aw nga may akon ako nga kaugalingon nga bahandi nga bulawan kag pilak, ginahatag ko ini sa balay sang akon Dios labaw kag kapin pa sa tanan nga akon naaman nga sa balaan nga balay:

4tatlo ka libo ka talanton nga bulawan, gikan sa bulawan sang Ofir, kag pito ka libo ka talanton nga pilak nga inulay, nga inugtaklap sa mga dingding sang mga balay,

5ang bulawan nga sa mga butang nga bulawan, kag ang pilak nga sa mga butang nga pilak, kag nga sa tanan nga bagay sang buluhaton sang mga kamut sang mga manugpadugi. Sin-o bala niyan ang nagadolot sing kinabubut-on, sa paghalad sang iya kaugalingon sini nga adlaw sa Ginoo?”

6Niyan ang mga principe sang mga kabaranggayan kag ang ma principe sang mga kabikahan sang Israel, ang mga pangolo sang linibo kag sang ginatus, pati ang mga manugdumala sang buluhaton sang hari nagdolot sing kinabubut-on.

7Naghatag sila nga sa pag-alagdan sang balay sang Dios sing lima ka libo ka talanton nga bulawan kag napulo ka libo ka darico, napulo ka libo ka talanton nga pilak, napulog walo ka libo ka talanton nga saway, kag isa ka gatus ka libo ka talanton nga salsalon.

8Kag sila nga may ila nga mga bato nga bilidhon naghatag sini sa bahandi sang balay sang Ginoo, sa pagtatap ni Jehiel nga Gersonhon.

9Niyan ang katawohan nagkasadya bangud nga nakadolot sila sing kinabubut-on, kay sa himpit nga tagiposoon nagdolot sila sing kinabubut-on sa Ginoo; si David nga hari man nagkasadya sa dakung kalipay.

10Busa si David nagpakamaayo sa Ginoo sa atubangan sang bug-os nga katilingban; kag si David nagsiling: “Pagpakamaayohon ka, O Ginoo, ang Dios ni Israel nga amon amay, sa gihapon kag sa gihapon.

11Imo, O Ginoo, ang pagkadaku, kag ang gahum, kag ang himaya, kag ang pagdaug, kag ang pagkahalangdon; kay ang tanan nga yara sa mga langit kag sa duta imo; imo, O Ginoo, ang ginharian kag ikaw ginbayaw subong nga pangolo labaw sa tanan.

12Ang kamanggaran kag kadungganan nagagikan sa imo, kag ikaw nagagahum sa tanan. Yara sa imo kamut ang gahum kag kusug; kag yara sa imo kamut ang pagpadaku kag paghatag sing kusug sa tanan.

13Busa karon, Dios namon, nagapasalamat kami sa imo kag nagadayaw sang imo mahimayaon nga ngalan.

14“Apang sin-o bala ako, kag ano ang akon katawohan, nga sarang kami sa paghalad sa sining bagay sing kinabubut-on gid? Kay ang tanan nga butang nagagikan sa imo, kag gikan sa imo kaugalingon naghatag kami sa imo.

15Kay mga dumuloong kami sa atubangan mo, kag mga manlulugayaw subong sang tanan namon nga ginikanan; ang amon kaadlawan sa duta subong sang landong, kag umalagi.

16O Ginoong Dios namon, ini tanan nga sinuput nga naaman namon sa pagpatindug sa imo sing balay nga sa imo balaan nga ngalan nagagikan sa imo kamut kag imo tanan kaugalingon.

17Nakilala ko man, Dios ko, nga ikaw nagatilaw sang tagiposoon, kag may kahamuut sa pagkatarung; sa pagkatarung sang akon tagiposoon gindolot ko sing kinabubut-on ini tanan nga butang, kag karon nakita ko nga may kalipay ang imo katawohan, nga nagatambong diri, nga nagadolot sing kinabubut-on sa imo.

18O Ginoo, ang Dios ni Abraham, ni Isaac, kag ni Israel, nga amon mga ginikanan, hupti ini sing dayon sa painoino sang mga hunahuna sang tagiposoon sang imo katawohan, kag amana ang ila mga tagiposoon sa imo.

19Hatagi si Salomon nga akon anak sing tagiposoon nga himpit sa pagbantay sang imo mga sogo, sang imo mga pagpamatuud, kag sang imo mga palatukuran, sa paghimo sini tanan nga mga butang, kag sa pagpatindug sang palacio nga tungud sini nagpanigana ako.”

20Niyan si David nagsiling sa bug-os nga katilingban, “Pakamaayoha ang Ginoo nga inyo Dios.” Kag ang bug-os nga katilingban nagpakamaayo sa Ginoo, ang Dios sang ila mga ginikanan, kag nagduko sila sang ila mga olo, kag nagyaub sa Ginoo, kag sa hari.

21Kag naghalad sila sing mga halad sa Ginoo, kag nagdolot sing mga halad-nga-sinonog sa Ginoo sa madason sadtong adlaw, sing isa ka libo ka tinday sang baka nga lalaki, isa ka libo ka carnero nga lalaki, kag isa ka libo ka cordero, pati sang ila mga halad-nga-ilimnon, kag mga halad nga bugana nga sa bug-os nga Israel;

22kag nagkaon kag nag-inum sila sa atubangan sang Ginoo sadtong adlaw nga may dakung kasadya. Kag ginhimo nila nga hari si Salomon nga anak ni David sa ikaduhang tion, kag ginhaplas sia nga principe sa Ginoo, kag si Sadoc nga manginsacerdote.

23Niyan si Salomon naglingkod nga hari sa trono sang Ginoo sa tal-us ni David nga iya amay; kag nag-uswag sia, kag ang bug-os nga Israel nagtuman sa iya.

24Kag ang tanan nga principe kag gamhanan nga tawo, kag subong man ang tanan nga lalaking anak ni Hari David, nagpasakup sila kay Salomon.

25Kag ang Ginoo nagpadaku kay Salomon sing lakas sa itololok sang bug-os nga Israel, kag naghatag sa iya sing subong nga harianon nga pagkahalangdon nga wala pa maagum sang bisan sin-ong hari nga una sa iya sa Israel.

26Sa amo si David nga anak ni Jesse naghari sa bug-os nga Israel.

27Ang tion nga naghari sia sa bug-os nga Israel kap-atan ka tuig; pito ka tuig nga naghari sia sa Hebron, kag katloan kag tatlo ka tuig nga naghari sia sa Jerusalem.

28Niyan napatay sia sa maayong katigulangon, nga puno sang kaadlawan, kamanggaran, kag kadungganan; kag naghari nga tal-us niya si Salomon nga iya anak.

29Karon ang mga binuhatan ni Hari David, ang nahauna kag ang katapusan, nasulat sila sa Maragtas ni Samuel nga manugpanan-aw, kag sa Maragtas ni Natan nga manalagna, kag sa Maragtas ni Gad nga manugpanan-aw,

30pati ang bug-os niyang paghari kag ang iya kagamhanan kag ang mga tion nga nag-agi sa iya kag sa Israel, kag sa tanan nga ginharian sang kadutaan.

← Chapter 28 Jump to: