1 Chronicles 12

Ilonggo (Ang Biblia (1982))

← Chapter 11 Jump to: Chapter 13 →

1Karon amo ini sila ang nagkadto kay David sa Ziclag, sang sia nagpanago pa bangud kay Saul nga anak ni Cis; kag sila sa gamhanan nga mga lalaki nga iya mga kabulig sa inaway.

2Nasangkapan sila sing mga pana, kag makagamit sang kamut nga too kag sang wala sa paglabyog sing mga bato kag pagpana sang mga baslay gikan sa pana; gikan sila sa mga himata ni Saul sang Benjamin.

3Ang puno si Ahiezer, ugaling si Joas, ang mga anak nga lalaki ni Semaa nga Gabaanhon; si Jeziel kag si Pelet, ang mga anak nga lalaki ni Azmavet; si Beraca, si Jehu nga Anatotnon,

4si Ismaias nga Gabaonhon, gamhanan nga tawo sa katloan kag manugdumala sang katloan; si Jeremias, si Jahaziel, si Johanan, si Jozabad nga Gederanhon,

5si Eluzai, si Jerimot, si Bealias, si Semarias, si Sefatis nga Harufnon;

6si Elcana, si Isias, si Azarel, si Joezer, kag si Jasobeam, nga Corinhon;

7kag si Joela kag si Zebadias, ang mga anak nga lalaki ni Jeroham sang Gedor.

8Sa mga Gadhanon may nagsimpon kay David sa kuta sa kamingawan nga gamhanan nga mga lalaki nga isganan kag nahanas sa inaway, nga makagamit sing taming kag bangkaw, nga ang ila mga nawung kaangay sang mga nawung sang mga leon, kag madasig sila subong sang mga usa sa kabukiran:

9si Ezer nga puno, si Obadias nga ikaduha, si Eliab nga ikatlo,

10si Mismana nga ikap-at, si Jeremias nga ikalima,

11si Atai nga ikan-um, si Eliel nga ikapito,

12si Johanan nga ikawalo, si Elzabad nga ikasiam,

13si Jeremias nga ikapulo, si Macbanai nga ikapulog isa.

14Ini sila sa mga anak nga lalaki ni Gad mga pangolo sang kasoldadosan, sia nga kubus gid tupung sa isa ka gatus kag ang labing daku sa isa ka libo.

15Amo ini sila ang nagtabok sa Jordan sa nahauna nga bulan, sang naglapaw ini sa tanan niya nga mga pangpang, kag ginpatal-as nila tanan sila nga sa nalupyakan, ang nayon sa sidlangan kag ang nayon sa katundan.

16Kag gikan sa mga anak sang Benjamin kag sang Juda may nag-abut sa kuta kay David.

17Si David naggowa sa pagsugata sa ila kag nagsiling, “Kon nagakari kamo sa akon sa paghidait sa pagbulig sa akon, ang akon tagiposoon mangin-isa sa inyo; apang kon sa pagtugyan sa akon sa mga kasumpung nakon, sa ginatan-aw nga wala sing panlugus sa akon mga kamut, niyan ang Dios sang aton mga ginikanan magtan-aw sini kag magsabdong sini.”

18Niyan ang Espiritu nag-abut kay Amasai, nga puno sang katloan, kag nagsiling sia, “Imo kami, O David; kag sa imo luyo, O anak ni Jesse! Paghidait, paghidait sa imo, kag paghidait sa imo mga kabulig! Kay ang imo Dios nagabulig sa imo.’ Niyan ginbaton sila ni David, kag ginhimo sila nga mga pangolo sang iya kabon.

19Gikan sa Manases man may nagsaylo nga iban kay David sang nagkadto sia upud sa mga Filistinhon batok kay Saul sa inaway. (Apang sila wala magbulig sa ila, kay tungud sa laygay ginpahalin sia sang mga ginoo sang mga Filistinhon, nga nagasiling, “Magasaylo sia sa iya agalon nga si Saul sa katalagman sang aton mga olo.”)

20Sang nagkadto sia sa Ziclag, nagsaylo sa iya gikan sa Manases: si Adna, si Jozabad, si Jediael, si Micael, si Jozabad, si Eliu, kag si Zilletai, mga puno sang linibo gikan sa Manases.

21Sila nagbulig kay David batok sa kabon sang manugpangati; kay sila tanan gamhanan nga mga lalaki nga isganan, kag mga pangolo sa kasoldadosan.

22Kay sa adlawadlaw nag-abut ang mga lalaki kay David sa pagbulig sa iya, tubtub nga may daku nga kasoldadosan, kaangay sang kasoldadosan sang Dios.

23Amo ini ang kadamuon sang binilog sang mga nasangkapan sang hinganiban sa inaway, nga nag-abut kay David sa Hebron, sa pagsaylo sa iya sang ginharian ni Saul, sono sa polong sang Ginoo.

24Ang mga anak ni Juda nga nagdala sing taming kag bangkaw anum ka libo kag walo ka gatus nasangkapan nga sa inaway.

25Sa mga anak ni Simeon, gamhanan nga mga lalaki nga isganan nga sa inaway, pito ka libo kag isa ka gatus.

26Sa mga anak ni Levi apat ka libo kag anum ka gatus.

27Si Joiada, manugdumala sang panimalay ni Aaron, kag upud sa iya ang tatlo ka libo kag pito ka gatus.

28Si Sadoc, gamhanan nga pamatan-on nga lalaki nga isganan, kag gikan sa panimalay sang iya amay duha ka pulo kag duha ka pangolo.

29Gikan sa mga anak ni Benjamin, ang mga himata ni Saul, tatlo ka libo, kay tubtub sadto ang kalabanan sa ila nagmainunungon sa panimalay ni Saul.

30Sa mga anak ni Efraim duha ka pulo ka libo kag walo ka gatus, gamhanan nga mga lalaki nga isganan, bantug nga mga lalaki sa ila mga kabaranggayan.

31Gikan sa katunga nga kabikahan ni Manases napulo kag walo ka libo, nga ginhingadlan sa ngalan sa pagkadto kag paghimo nga hari kay David.

32Gikan sa mga anak ni Isacar mga lalaki nga may paghangup sang mga panag-on, sa paghibalo sang dapat himoon sang Israel, ang ila mga pangolo duha ka gatus, kag ang tanan nila nga himata yara sa ila pagsogo.

33Gikan sa Zabulon ang sarang makasimpon sa kasoldadosan, nga makapahamtang sang inaway sa paagisud, sa tanan nga bagay sang mga gamit sa inaway, kalim-an ka libo, kag makapaagisud sa inaway kag indi duha sing tagiposoon.

34Gikan sa Neftali isa ka libo ka pangolo kag upud sa ila katloan kag pito ka libo nga may taming kag bangkaw.

35Gikan sa mga Danhanon nga makapaagisud sa inaway duha ka pulo kag walo ka libo kag anum ka gatus.

36Gikan sa Aser ang sarang makasimpon sa kasoldadosan nga makapaagisud sa inaway kap-atan ka libo.

37Sa tabok sang Jordan gikan sa mga Rubenhon kag sa mga Gadhanon kag sa katunga nga kabikahan ni Manases isa ka gatus kag duha ka pulo ka libo nga may tanan nga bagay sang mga gamit sang inaway sa pag-awayan.

38Ini tanan, nga mga lalaki sa inaway, nga makapaagisud sa inaway, nag-abut nga may bug-os nga tagiposoon sa Hebron sa paghimo nga hari kay David sa ibabaw sang bug-os nga Israel; ang tanan nga iban man sang Israel isa sing tagiposoon sa paghimo nga hari kay David.

39Kag didto sila upud kay David sing tatlo ka adlaw, nga nagakaon kag nagainum, kay ang ila mga himata nag-aman nga sa ila.

40Labut pa ang mga malapit sa ila, tubtub sa Isacar kag sa Zabulon kag sa Neftali, naglulan sing kalan-on sa mga asno kag sa mga camelyo kag sa mga mula kag sa mga baka, mga balon nga harina, mga pighol nga mga higos, mga pinungpung sang pasas, kag alak kag lana, mga baka kag mga carnero, nga bugana, kay sa Israel may kinasadya.

← Chapter 11 Jump to: Chapter 13 →