1 Chronicles 21

Ilonggo (Ang Biblia (1982))

← Chapter 20 Jump to: Chapter 22 →

1Si Satanas nagtindug batok sa Israel, kag nagsugyot kay David sa pag-isip sang Israel.

2Gani si David nagsiling kay Joab kag sa mga principe sang katawohan. “Lakat, isipa ang Israel kutub sa Beer-seba tubtub sa Dan, kag sugiri ako, agud nga mahibaloan ko ang kadamuon nila.”

3Apang si Joab nagsiling, “Himoon sang Ginoo ang iya katawohan sing isa ka gatus pa ka pilo sang kadamuon nila! Ginoo kong hari, indi bala sila tanan alagad sang akon ginoo? Ngaa bala niyan nga ginakinahanglan ining butang sang akon ginoo? Ngaa bala nga manginkabangdanan sia sang pagpakasala sa Israel?”

4Apang ang polong sang hari naglandas kay Joab. Gani si Joab nagtaliwan kag naglibut sa bug-os nga Israel, kag nag-abut sa Jerusalem.

5Kag gintugyan ni Joab ang kadamuon sang pag-isip sang katawohan kay David. Tanan sila sa Israel isa ka milyon kag isa ka gatus ka libo ka lalaki nga naggabut sang espada, kag sa Juda apat ka gatus kag kapitoan ka libo ka lalaki nga naggabut sang espada.

6Apang wala niya pag-isipa sa ila ang Levi kag Benjamin, kay ang polong sang hari kangil-aran kay Joab.

7Apang ang Dios naakig sining butang, kag ginsakit niya ang Israel.

8Kag si David nagsiling sa Dios, “Nakasala ako sing daku nga ginhimo ko ining butang. Apang karon, ginaampo ko sa imo, kuhaa ang kalautan sang imo alagad; kay ako nakahimo sing binuang gid.”

9Kag ang Ginoo nagpamolong kay Gad, nga manugpanan-aw ni David, nga nagasiling,

10“Lakat kag ipamolong kay David, ‘Amo ini ang ginasiling sang Ginoo, Tatlo ka butang ginatanyag ko sa imo; pili ka sing isa sa ila, nga mahimo ko sa imo.’”

11Gani si Gad nagkadto kay David kag nagsiling sa iya, “Amo ini ang ginasiling sang Ginoo, ‘Pili ka sang buut mo:

12tatlo ka tuig nga tiggulutum; ukon tatlo ka bulan nga papason ka sang imo mga kaaway, samtang ginalambut ka sang espada sang imo mga kaaway; ukon tatlo ka adlaw nga ang espada sang Ginoo, ang kamatay sa duta, kag ang manugtunda sang Ginoo nagalaglag sa bug-os gid nga ginsakpan sang Israel.’ Karon patugsilingi kon ano ang isabat ko sa nagpadala sa akon.”

13Niyan si David nagsiling kay Gad, “Yari ako sa dakung ital-ital; pahologa ako sa kamut sang Ginoo, kay daku gid ang iya mga kalooy; apang indi ako pagpahologa sa kamut sang tawo.”

14Gani ang Ginoo nagpadala sing kamatay sa Israel; kag napukan sa Israel ang kapitoan ka libo ka tawo.

15Kag nagpadala ang Dios sing manugtunda sa Jerusalem sa paglaglag sini; apang sang buut na sia maglaglag, nakita sang Ginoo, kag nagkalisud sia sa malaut; kag nagsiling sa manugtunda nga nagalaglag, “Tuman na; karon punggi ang imo kamut.” Kag ang manugtunda sang Ginoo nagtindug sa luyo sang linasan ni Ornan nga Jebusnon.

16Kag ginbayaw ni David ang iya mga mata, kag nakita ang manugtunda sang Ginoo nga yara sa tunga sang duta kag langit, nga may espada nga nagabut sa iya kamut nga nauntay sa ibabaw sang Jerusalem. Niyan si David kag ang mga tigulang, nga napanaptan sing panapton nga sako, naghapa.

17Kag si David nagsiling sa Dios, “Indi bala ako ang nagsogo nga isipon ang katawohan? Ako gid ang nakasala kag nakahimo sing malaut gid. Apang ini nga mga carnero, ano bala ang nahimo nila? Ginaampo ko sa imo, O Ginoo nga akon Dios, patup-a sa akon ang imo kamut kag sa panimalay sang akon amay; apang indi batok sa imo katawohan nga pagpamatyon sila.’”

18Niyan ang manugtunda sang Ginoo nagsogo kay Gad nga silingon si David nga magtaklad si David kag magpatindug sing halaran sa Ginoo sa linasan ni Ornan nga Jebusnon.

19Gani si David nagtaklad sono sa nasiling ni Gad, nga ginpamolong niya sa ngalan sang Ginoo.

20Karon si Ornan nagalinas sing trigo; nagbalikid sia kag nakakita sang manugtunda, kag ang iya apat ka anak nga lalaki nga nag-upud sa iya nagpanago sila.

21Sang nag-abut si David kay Ornan, nagtolok si Ornan kag nakita si David kag naggowa sa linasan, kag naghapa sa duta sa atubangan ni David.

22Niyan si David nagsiling kay Ornan, “Ihatag sa akon ang duug sini nga linasan agud nga magpatindug ako sa iya sing halaran sa Ginoo —ihatag mo ini sa akon sa bug-os nga bili—agud nga mapa-untat ang kamatay sa katawohan.”

23Kag si Ornan nagsiling kay David, “Kuhaa ini nga sa imo; kag maghimo ang akon ginoo nga hari sang maayo sa iya mga mata; yari karon, ginahatag ko ang mga baka nga sa halad-nga-sinonog, kag ang mga gamit sa linas nga sa gatong, kag ang trigo nga sa halad-nga-kalan-on. Ginahatag ko ini tanan.”

24Apang si Hari David nagsiling kay Ornan, “Indi, kondi baklon ko ini gid sa bug-os nga bili; kay indi ako magkuha sang imo tungud sa Ginoo, ukon magdolot sing halad-nga-sinonog nga wala sing bili.”

25Gani ginhatag ni David kay Ornan tungud sa duug ang anum ka gatus ka siclo nga bulawan sa timbang.

26Kag nagpatindug didto si David sing halaran sa Ginoo kag nagdolot sing mga halad-nga-sinonog kag mga hald-sa-paghidait, kag nagtawag sa Ginoo, nga nagsabat sa iya gikan sa langit paagi sa kalayo sa halaran sang halad-nga-sinonog.

27Niyan ginsogo sang Ginoo ang manugtunda; kag gintagub niya liwat ang iya espada.

28Sa sadto nga tion, sang nakita ni David nga nasabat sia sang Ginoo sa linasan ni Ornan nga Jebusnon, naghalad sia didto.

29Kay ang kayangkayang sang Ginoo, nga ginhimo ni Moises sa kamingawan, kag ang halaran sang halad-nga-sinonog yadto sa sadto nga tion sa mataas nga duug sa Gabaon;

30apang si David indi makakadto sa atubangan sini sa pagpamangkot sa Dios; kay nahadluk sia bangud sang espada sang manugtunda sang Ginoo.

← Chapter 20 Jump to: Chapter 22 →