1 Chronicles 28

Ilonggo (Ang Biblia (1982))

← Chapter 27 Jump to: Chapter 29 →

1Gintipon ni David sa Jerusalem ang tanan nga principe sang Israel, ang mga principe sang mga kabikahan, ang mga pangolo sang mga hut-ong nga nag-alagad sa hari tungud sa kinabon, ang mga pangolo sang linibo, ang mga pangolo sang ginatus, ang mga manugdumala sang tanan nga pagkabutang kag mga kaugalingon sang hari kag sang iya mga lalaking anak, pati ang mga tulugyanan, ang gamhanan nga mga tawo, ang tanan nga mga tawo nga isganan.

2Niyan si Hari David nagtindug sa iya mga tiil kag nagsiling: “Pamatii ako, mga utud ko kag katawohan ko. Yari ini sa akon tagiposoon ang pagpatindug sing balay nga palahuwayan sang kaban sang katipan sang Ginoo, kag nga palatungan sang aton Dios; kag nakahanda ako nga sa palatindugon.

3Apang ang Dios nagsiling sa akon, ‘Dili ka magpatindug sing balay nga sa akon ngalan, bangud nga tawo ikaw sang inaway kag nakapaagay sing dugo.’

4Apang ang Ginoong Dios sang Israel nagpili sa akon sa bug-os nga panimalay sang akon amay nga manginhari sa Israel sing dayon; kay si Juda ginpili niya nga manginprincipe, kag sa panimalay sang Juda ang panimalay sang akon amay, kag sa mga lalaking anak sang akon amay nahamut-an niya ako nga himoon nga hari sa bug-os nga Israel.

5Kag sa tanan ko nga lalaking anak (kay ginhatagan ako sang Ginoo sing madamu nga mga anak) napili niya ang akon lalaking anak nga si Salomon sa paglingkod sa trono sang ginharian sang Ginoo sa ibabaw sang Israel.

6Nagsiling sia sa akon, ‘Si Salomon nga imo anak sia magapatindug sang akon balay kag sang akon mga luwang, kay napili ko sia nga mangin-akon anak, kag ako mangin-iya amay.

7Palig-onon ko ang iya ginharian sing dayon, kon magpadayon sia sa paghimo sang akon mga sogo kag sang akon mga pagsolondan, subong sang sa sini nga adlaw.’

8Busa karon sa itololok sang bug-os nga Israel, ang katilingban sang Ginoo, kag sa atubangan sang aton Dios, bantayi kag usisaa ninyo ang tanan nga mga sogo sang Ginoo nga inyo Dios; agud nga mapanag-iyahan ninyo ini nga maayo nga duta, kag mabilin ini nga panublion sa inyo mga anak sa olihi ninyo sing dayon.

9“Kag ikaw, Salomon nga anak ko, kilalahon mo ang Dios sang imo amay, kag alagdon sia sa himpit nga tagiposoon kag sa handa nga hunahuna; kay ang Ginoo nagausisa sang tanan nga tagiposoon, kag nagahangup sang tanan nga painoino sang mga hunahuna. Kon pangitaon mo sia, makita sia nimo; apang kon bayaan mo sia, isikway ka niya sing dayon.

10Talupangda karon, kay ang Ginoo nagpili sa imo sa pagpatindug sing balay nga sa santuario; magpakabakud ka, kag himoa ini.”

11Niyan ginhatag ni David kay Salomon nga iya anak ang huwaran sang portico sang templo, kag sang iya mga balay, sang iya mga bahandian, sang iya mga hulut nga naibabaw, sang iya mga hulut nga nasulud, kag sang duug nga pakilooyan;

12kag ang huwaran sang tanan nga yara sa iya paagi sa Espiritu nahanungud sa mga luwang sang balay sang Ginoo, kag sang tanan nga hulut palibut, sa mga bahandian sang balay sang Dios, kag sa mga bahandian sang nahalad nga mga butang;

13nahanungud man sa mga kinabon sang mga sacerdote kag sang mga Levinhon, kag sa tanan nga buluhaton sang pag-alagdan sang balay sang Ginoo; kag sa tanan nga gamit sang pag-alagdan sa balay sang Ginoo,

14ang bulawan sa timbang nga sa mga gamit nga bulawan tungud sa tanan nga gamit sa tagsa ka bagay sang pag-alagdan, ang pilak tungud sa tanan nga gamit sang tagsa ka bagay sang pag-alagdan,

15sa timbang man nga sa mga candelero nga bulawan kag sa mga suga sini, sa timbang sang bulawan nga sa tagsa ka candelero kag sa mga suga sini, sa mga candelero nga pilak sa timbang sa tagsa ka candelero, kag sa mga suga sini, sono sa naigoan sang tagsa ka candelero,

16ang bulawan sa timbang nga sa mga latok sang tinapay nga pahayag, nga sa tagsa ka latok, ang pilak nga sa mga latok nga pilak,

17kag ang mga kaw-it sa unud, ang mga batiya, kag ang mga tagayan nga bus-og nga bulawan; kag sa mga yahong nga bulawan sa timbang nga sa tagsa ka yahong; nga sa mga yahong nga pilak sa timbang nga sa tagsa ka yahong;

18nga sa halaran sang incienso ang bulawan nga naulay sa timbang, kag ang bulawan nga sa huwaran sang kangga ang mga querubin nga nagahumlad sang ila mga pakpak kag naglandog sang kaban sang katipan sang Ginoo.

19Ini tanan ginpahangup niya paagi sa sulat gikan sa kamut sang Ginoo nahanungud sini, ang tanan nga buluhaton sono sa sini nga huwaran.

20Niyan nagsiling si David kay Salomon nga iya anak, “Magpakabakud kag magpakaisug, kag himoa ini. Dili magkahadluk ukon magkahangawa; kay ang Ginoong Dios, bisan ang akon Dios, nagaupud sa imo. Sia indi magpabaya sa imo ukon magbiya sa imo, tubtub nga ang tanan nga buluhaton sa pag-alagdan sang balay sang Ginoo matapus.

21Kag yari karon yara ang mga kinabon sang mga sacerdote kag sang mga Levinhon nga sa bug-os nga pag-alagdan sang balay sang Dios; kag magaupud sa imo sa tanan nga bagay sang buluhaton ang tagsa ka tawo nga sampaton nga may kabubut-on nga sa bisan ano nga bagay sa pag-alagdan; ang mga pangolo man kag ang bug-os nga katawohan yara sa bug-os nga sogo.”

← Chapter 27 Jump to: Chapter 29 →