1 Corinthians 1

Ilonggo (Ang Biblia (1982))

Jump to: Chapter 2 →

1Si Pablo, nga ginatawag nga pinadala ni Jesu-Cristo paagi sa kabubut-on sang Dios, kag si Sostenes nga aton utud,

2Sa iglesia sang Dios nga yara sa Corinto, sa mga ginpakabalaan kay Cristo Jesus, nga ginatawag nga mga balaan kaupud sang tanan nga nagapanawag sa ngalan sang aton Ginoong Jesu-Cristo sa tagsa ka duug, nga ila Ginoo kag aton:

3Ang bugay sa inyo kag paghidait nga gikan sa Dios nga aton Amay kag kay Ginoong Jesu-Cristo.

4Nagapasalamat ako gihapon sa akon Dios tungud sa inyo bangud sang bugay sang Dios nga ginhatag sa inyo kay Cristo Jesus,

5nga sa tagsa ka bagay ginpamanggad kamo sa iya sa bug-os nga paghambal kag sa tanan nga pagkilala—

6subong nga ang pagpamatuud nahanungud kay Cristo ginpalig-on sa tunga ninyo—

7agud nga indi kamo makulangan sa bisan ano nga hiyas nga espirituhanon, sa nagahulat kamo sang pagpahayag sang aton Ginoong Jesu-Cristo;

8nga magapalig-on man sa inyo tubtub sa katapusan, nga disalabdongon sa adlaw sang aton Ginoong Jesu-Cristo.

9Matutum ang Dios, nga paagi sa iya gintawag kamo sa pagpakig-ambit sa iya Anak nga si Jesu-Cristo nga aton Ginoo.

10Ginapakilooy ko sa inyo, mga kauturan, sa ngalan sang aton Ginoong Jesu-Cristo, nga maghilisugut kamo tanan sa inyo nga walay pagbinahinbahin sa inyo, kondi mag-isa kamo ka painoino kag kaisipan.

11Kay nasugid sa akon sang katawohan ni Cloe, mga kauturan ko, nga may pagpinuyasay sa tunga ninyo.

12Ang buut ko isiling amo ini nga ang tagsatagsa sa inyo nagasiling, “Ako kay Pablo,” ukon “Ako kay Apolos,” ukon “Ako kay Cefas,” ukon “Ako kay Cristo.”

13Nabahinbahin bala si Cristo? Ginlansang bala sa cruz si Pablo tungud sa inyo? Ukon ginbautisohan bala kamo sa ngalan ni Pablo?

14Nagapasalamat ako sa Dios nga wala ako sing ginbautisohan sa inyo luwas kay Crispo kag kay Gayo;

15basi kon ang bisan sin-o nga tawo magsiling nga ginbautisohan kamo sa akon ngalan.

16(Ginbautisohan ko man ang panimalay ni Estefanas. Luwas sini, wala ako makahibalo kon nakabautiso ako sing iban.)

17Kay wala ako pag-ipadala ni Cristo sa pagbautiso kondi sa pagwali sang maayong balita, kag indi sa kaalam sang mga polong, basi kon magmanginwalay gahum ang cruz ni Cristo.

18Kay ang polong sang cruz kabuangan sa nagakawala, apang sa aton nga ginaluwas ini gahum sang Dios.

19Kay nasulat na, “Laglagon ko ang kaalam sang mga maalam, kag pakawalaon ko ang paghangup sang mga mahangponon.”

20Diin bala ang maalam? Diin bala ang escriba? Diin bala ang manugbais sining panuigon? Wala bala pagpakabuanga sang Dios ang kaalam sang kalibutan?

21Kay sanglit, sa kaalam sang Dios, ang kalibutan paagi sa iya kaalam wala makakilala sa Dios, nahamut-an sang Dios ang pagluwas sa mga nagatoo paagi sa kabuangan sang amon ginawali.

22Kay ang mga Judio nagakinahanglan sing mga tanda kag ang mga Griego nagapangita sing kaalam,

23apang amon ginawali si Cristo nga ginlansang sa cruz, nga sa mga Judio kasandaran kag sa mga Gentil kabuangan,

24apang sa mga tinawag, mga Judio kag mga Griego, si Cristo amo ang gahum sang Dios kag kaalam sang Dios.

25Kay ang kabuangan sang Dios maalam pa sa mga tawo, kag ang kaluyahon sang Dios makusug pa sa mga tawo.

26Kay tan-awa ang pagtawag sa inyo, mga kauturan; indi madamu sa inyo ang maalam sono sa kalibutanon nga mga talaksan, indi madamu ang mga gamhanan, indi madamu ang mga dungganon;

27kondi ginpili sang Dios ang buang-buang sang kalibutan sa pagpakahuya sang maalam, ginpili sang Dios ang maluya sa kalibutan sa pagpakahuya sang makusug,

28ginpili sang Dios ang kubus kag talamayon sa kalibutan, bisan ang mga butang nga indi amo, sa pagpakawalay pulus sang mga butang nga amo,

29agud nga walay tawo nga magpabugal sa atubangan sang Dios.

30Sia amo ang puno sang inyo kabuhi kay Cristo Jesus, nga ginhimo sang Dios nga aton kaalam, aton pagkamatarung kag pagpakabalaan kag pagtubus;

31busa, sono sa nasulat na, “Ang nagapabugal, magpabugal nahanungud sa Ginoo.”

Jump to: Chapter 2 →