1 Corinthians 5

Ilonggo (Ang Biblia (1982))

← Chapter 4 Jump to: Chapter 6 →

1Ginasugid sing matuud nga may pagpakighilawas sa tunga ninyo, kag ang amo nga pagpakighilawas wala bisan sa mga Gentil; kay ang isa sa inyo nagahuput sang asawa sang iya amay.

2Kag kamo nagapahabok! Indi bala kamo dapat magkasubu? Ang naghimo sini kuhaon sa tunga ninyo.

3Kay bisan ako wala sa lawas apang yara sa espiritu, kag subong nga daw yara, nakahukom na ako sa nakahimo sining butang

4sa ngalan sang aton Ginoong Jesus. Kon kamo nagkatipon sing tingub, kag yara ang akon espiritu, kaupud sang gahum sang aton Ginoong Jesus,

5itugyan ninyo ining tawo kay Satanas sa paglaglag sang unud, agud nga ang iya espiritu maluwas sa adlaw ni Ginoong Jesus.

6Indi maayo ang inyo pagpabugal. Wala bala kamo makahibalo nga ang diotay nga tapay nagalatum sang bug-os nga linamas?

7Panghugas kamo gikan sa daan nga tapay agud nga manginbag-o kamo nga linamas, subong nga wala kamo sing tapay. Kay ang aton pascua nga cordero, si Cristo, nahalad na.

8Busa hiwaton ta ang piesta, indi sa daan nga tapay, sa tapay sang kalainan kag kalautan, kondi sa tinapay nga walay tapay sang kabunayag kag kamatooran.

9Nagsulat ako sa inyo sa akon sulat nga dili kamo magpakig-upud sa mga makihilawason;

10indi nga dili na gid magpakig-upud sa mga makihilawason sining kalibutan, ukon sa mga mahamkonon kag mga malugus, ukon sa mga diwatahan, kay niyan kinahanglan nga maggowa kamo sa kalibutan.

11Apang hinonoo nagasulat ako sa inyo nga dili kamo magpakig-upud sa bisan kay sin-o nga ginhingalanan nga utud kon sia makihilawason ukon mahamkonon, ukon diwatahan, mapasipalahon, palahobog, ukon malugus—bisan sa pagkaon dili kamo magpakig-upud sa iya.

12Ano bala ang akon sa paghukom sa mga tagagowa? Indi bala ang mga sa sulud sang iglesia ang hukman ninyo?

13Ang mga tagagowa Dios ang nagahukom. Isikway ninyo ang tawo nga malaut sa tunga ninyo.

← Chapter 4 Jump to: Chapter 6 →