1 Corinthians 16

Ilonggo (Ang Biblia (1982))

← Chapter 15 Jump to:

1Karon nahanungud sa amut nga sa mga balaan; subong sa ginsogo ko sa mga iglesia sa Galacia, amo man ang himoon ninyo.

2Sa nahaunang adlaw sang tanan nga semana, ang tagsatagsa sa inyo magpain nga supton niya, sono sa iya pagkabugana, agud nga sa pag-abut ko handa na ang mga amut.

3Kag sa pag-abut ko, ang bisan sin-o nga pakamaayohon ninyo ipadala ko sila nga may mga sulat sa pagdol-ong sa Jerusalem sang inyo dolot.

4Kon nagakaigo nga ako maglakat man, magaupud sila sa akon.

5Magaduaw ako sa inyo kon makaagi na ako sa Macedonia, kay maagi ako sa Macedonia,

6kag upud sa inyo ayhan mapabilin ako ukon mapataliwan sang tigtulugnaw, agud nga mapatigayon ninyo ako sa akon panlakatan, sa bisan diin ako makadto.

7Kay indi ako buut magpakigkita sa inyo karon sa pag-agi lamang; nagalaum ako sa pagpabilin sa inyo sing pila ka tion, kon itugut sang Ginoo.

8Apang magapabilin ako sa Efeso tubtub sa Pentecostes.

9kay nagbukas sa akon ang ganhaan nga daku nga sa mabungahon nga pagpangabudlay, kag may madamu nga mga kasumpung.

10Kon mag-abut si Timoteo, tatapa ninyo nga manginkaupud sia ninyo sa walay kahadluk, kay nagahimo sia sang buluhaton sang Ginoo, subong sang ginahimo ko man.

11Gani walay tawong magtamay sa iya. Patigayonon ninyo sia sa iya panlakatan sa paghidait, agud nga makakari sia sa akon; kay ginapaabut ko sia kaupud sang mga kauturan.

12Kon nahanungud sa aton utud nga si Apolos, ginpakilooyan ko sia sa pagkara sa inyo kaupud sang mga kauturan, apang indi gid kabubut-on sang Dios nga magkara sia karon. Makara sia kon may kahigayonan sia.

13Magbantay kamo, maglig-on sa pagtoo, magpakalalaki kamo, magpakabakud.

14Ang tanan nga ginahimo ninyo paghimoon sa gugma.

15Karon, mga kauturan, nahibaloan ninyo nga ang panimalay ni Estefanas amo ang nahaunang mga bunga sa Acaya, kag nagpanugyan sila sang ila kaugalingon sa pag-alagad sa mga balaan;

16ginapakilooy ko sa inyo nga kamo magapasakup sa amo nga mga tawo kag sa tagsa ka kabulig kag manugpangabudlay.

17Nagakalipay ako sa pag-abut ni Estefanas kag ni Fortunato kag ni Acaico, kay nagtal-us sila sa inyo;

18ginpaumpawan nila ang akon espiritu kag ang inyo. Kilalaha ninyo ang subong nga mga tawo.

19Ang mga iglesia sa Asia nagaabiabi sa inyo. Nagaabiabi sa inyo sing tinagiposoon sa Ginoo si Aquila kag si Priscila, kaupud ang iglesia nga yara sa ila balay.

20Nagaabiabi sa inyo ang tanan nga kauturan. Mag-abiabihay kamo nga may balaan nga haluk.

21Ako, si Pablo, nagasulat sining pag-abiabi sa akon kaugalingon nga kamut.

22Kon ang bisan sin-o wala nagahigugma sang Ginoo, manginpinakamalaut sia. O Ginoo, kari ka!

23Ang bugay ni Ginoong Jesu-Cristo manginkaupud ninyo.

24Ang akon gugma manginkaupud ninyo tanan kay Cristo Jesus. Kabay pa.

← Chapter 15 Jump to: