1 Corinthians 7

Ilonggo (Ang Biblia (1982))

← Chapter 6 Jump to: Chapter 8 →

1Karon nahanungud sa mga butang nga ginsulat ninyo. Maayo sa tawo nga indi magtandug sing babayi.

2Apang bangud sang mga pagpakighilawas, ang tagsa ka lalaki maghuput sing iya kaugalingon nga asawa kag ang tagsa ka babayi maghuput sing iya kaugalingon nga bana.

3Ihatag sang bana sa iya asawa ang nagakaigo kag subong man sang asawa sa bana.

4Ang asawa walay gahum sa iya kaugalingon nga lawas, kondi ang bana; subong man ang bana walay gahum sa iya kaugalingon nga lawas, kondi ang asawa.

5Indi kamo magdumiliay luwas kon sa ginakasugtanan nga sa panag-on, agud nga mapanugyan ninyo ang inyo kaugalingon sa pangamuyo; apang niyan magtingub kamo liwat, agud nga indi kamo pagsulayon ni Satanas bangud sang inyo pagkadimapinugungon.

6Ini ginasiling ko subong nga pahanugut, indi nga sogo.

7Buut ko kuntani nga ang tanan nga tawo subong sa akon. Apang ang tagsa ka tawo may kaugalingon nga hiyas gikan sa Dios, ang isa sa sini nga bagay kag ang isa sa sina.

8Nagasiling ako sa mga diminyo kag sa balo nga mga babayi nga maayo sa ila kon magpadayon sila nga diminyo subong sa akon.

9Apang kon indi sila makapugung, magpangasawa sila. Kay maayo pa nga magpangasawa sang sa masonog sa kailigbon sang unud.

10Nagatugon ako sa mga minyo, indi ako kondi ang Ginoo, nga ang asawa dili magbulag sa bana

11(apang kon magbulag sia, magpadayon sia nga diminyo ukon sa baylo sini magpasag-uli sa iya bana)—kag nga ang bana dili magbulag sa iya asawa.

12Sa iban nagasiling ako, indi ang Ginoo, nga kon ang bisan sin-o nga utud may asawa nga dimatinoohon, kag nagasugut sa pagpakigpuyo sa iya, dili niya pagbulagan sia.

13Ang asawa nga may bana nga dimatinoohon, kag nagasugut sa pagpakigpuyo sa iya, dili niya pagbulagan sia.

14Kay ang bana nga dimatinoohon ginapabalaan paagi sa asawa, kag ang asawa nga dimatinoohon ginapabalaan paagi sa bana. Kay sa lain nga bagay, ang inyo mga kabataan diputli; apang karon mga balaan sila.

15Apang kon ang dimatinoohon magbulag, pabulaga sia; ang utud nga lalaki ukon babayi wala magapus sa amo nga kahimtangan. Kay ang Dios nagtawag sa aton sa paghidait.

16Paano bala ang pagkahibalo mo, O asawa, kon maluwas mo ang imo bana? Paano bala ang pagkahibalo mo, O bana, kon maluwas mo ang imo asawa?

17Lamang, sono sa napanagtag sang Ginoo sa tagsa ka tawo, sono sa pagtawag sang Dios sa iya, maggawi sia. Ini amo ang pagsolondan ko sa tanan nga iglesia.

18May tawo bala nga nacircuncidar na sang sia tinawag? Dili sia mangindicircuncidado. May tawo bala nga dicircuncidado sang sia tinawag? Dili sia magpacircuncidar.

19Ang circuncision kag ang dicircuncision walay kapuslanan, kondi ang pagbantay sang mga sogo sang Dios.

20Ang tagsa ka tawo magpadayon sa kahimtangan diin sia gintawag.

21Ulipon ka bala sang pagtawag sa imo? Dili ka sina magsapak. Apang kon makapanginhilway ka, gamita ang kahigayonan.

22Kay ang ulipon nga tinawag sa Ginoo sia hinilway sang Ginoo. Subong man ang hinilway nga tinawag ulipon ni Cristo.

23Sa kabilyanan ginbakal kamo; dili kamo magmangin-ulipon sang mga tawo.

24Gani, mga kauturan, ang tagsa magpadayon kaupud sa Dios, sa kahimtangan diin gintawag sia.

25Karon nahanungud sa mga diminyo, wala ako sing sogo sang Ginoo, apang nagahatag ako sang akon panghunahuna subong sang isa nga nakabaton sing kalooy sa Ginoo sa pagkamasaligan.

26Ginahunahuna ko bangud sang kasisit-an nga yari sa aton nga maayo sa tawo nga magpadayon subong nga amo sia.

27Nahigtan ka bala sa isa ka asawa? Dili ka maghimulat sa pagpanginpalus. Nakapalus ka bala sa isa ka asawa? Dili ka magpangasawa.

28Apang kon magpangasawa ka, indi ka makasala, kag kon ang dalaga magpamana, indi sia makasala. Walay sapayan ang nagapangasawa may kapipit-an nga kalibutanon, kag buut ko nga malikawan ninyo ina.

29Ang buut ko silingon, mga kauturan, ang tion nga napat-ud ginpalip-ot; kutub karon, ang mga may asawa magpuyo subong nga walay asawa,

30kag ang mga nagahibi subong nga wala sila nagahibi, kag ang mga nagakalipay subong nga wala sila nagakalipay, kag ang mga nagabakal subong nga wala sila nagaangkon sini,

31kag ang mga nagasimpon sa kalibutan subong nga wala nagasimpon sini. Kay ang dagway sining kalibutan nagataliwan.

32Buut ko nga kamo mahilway sa mga paghimud-os. Ang diminyo nagahimud-os sa mga butang nga iya sang Ginoo, kon paano ang pagpahamuut sa Ginoo;

33apang ang tawong minyo nagahimud-os sa mga butang sang kalibutan, kon paano ang pagpahamuut sa iya asawa, kag ang iya mga handum nabahinbahin.

34Kag ang babayi nga diminyo ukon ang dalaga nagahimud-os sa mga butang sang Ginoo, kon paano ang pagpakabalaan sa lawas kag sa espiritu; apang ang may bana nagahimud-os sa mga butang sang kalibutan, kon paano ang pagpahamuut niya sa iya bana.

35Ini ginasiling ko sa inyo kaugalingon nga kapuslanan, indi sa pagpugong sa inyo, kondi sa pagpauswag sang maayong kahusayan kag sa pagdangat sang inyo dinabahinbahin nga pagkatutum sa Ginoo.

36Kon ang bisan sin-o nagahunahuna nga wala sia nagagawi sing nagakaigo ayon sa iya palangasaw-on, kon ang iya kailigbon masingkal, kag ginakinahanglan nga mangin-amo ini, maghimo sia sang buut niya: magpakasal sila—indi ini sala.

37Apang ang malig-on sa iya tagiposoon, nga walay kinahanglan kondi may gahum sa iya kaugalingon, kag nakatapat sini sa iya tagiposoon, sa paghuput sa iya nga palangasaw-on, nagahimo sia sing maayo.

38Gani ang nagapakasal sa iya palangasaw-on nagahimo sing maayo; kag ang wala nagapangasawa nagahimo sing maayo pa.

39Ang asawa nahigtan samtang buhi ang iya bana. Kon ang bana mapatay, hilway sia sa pagpamana sang buut niya, lamang sa Ginoo.

40Apang malipayon pa sia kon magpadayon subong nga amo sia sono sa akon panghunahuna. Kag nagahunahuna ako nga yari sa akon ang Espiritu sang Dios.

← Chapter 6 Jump to: Chapter 8 →