1 Corinthians 12

Ilonggo (Ang Biblia (1982))

← Chapter 11 Jump to: Chapter 13 →

1Karon nahanungud sa mga hiyas nga espirituhanon, mga kauturan, indi ako buut nga indi ninyo mahibaloan.

2Nahibaloan ninyo nga sang mga Gentil pa kamo, ginpangdala kamo sa mga diosdios nga apa, sa bisan paano nga madala kamo.

3Busa ginapakilala ko sa inyo nga walay tawo nga nagapamolong paagi sa Espiritu sang Dios nga nagasiling “Si Jesus pinakamalaut!” kag walay tawo nga makasiling “Si Jesus Ginoo” kondi sa Espiritu Santo.

4Karon may nagakalainlain nga mga hiyas, apang isa ka Espiritu;

5kag may nagakalainlain nga mga pagpanghikot, apang isa ka Ginoo;

6kag may nagakalainlain nga mga pagbuhat, apang isa ka Dios nga nagabuhat sang tanan nga butang sa tanan.

7Sa tagsatagsa ginahatag ang pagpahayag sang Espiritu nga sa kapuslanan sang kadam-an.

8Sa isa ginahatag paagi sa Espiritu ang polong sang kaalam, kag sa isa ang polong sang pagkilala sono sa amo nga Espiritu,

9sa isa pagtoo paagi sa amo nga Espiritu, sa isa ang mga hiyas sa pagpang-ayo paagi sa isa ka Espiritu,

10sa isa ang mga pagbuhat sang mga katingalahan, sa isa ang pagpanagna, sa isa mga pagkilala sa mga espiritu, sa isa mga nagakalainlain nga hambal, sa isa ang pagpatpat sang mga hambal.

11Ini tanan ginabuhat sang isa kag amo nga Espiritu, nga nagapanagtag sa tagsatagsa sono sa iya ginabuut.

12Kay subong nga ang lawas isa kag may madamu nga bahin, kag ang tanan nga bahin sang lawas, bisan madamu sila, isa ka lawas, amo man si Cristo.

13Kay sa isa ka Espiritu ginbautisohan kita tanan sa isa ka lawas—mga Judio ukon mga Griego, mga ulipon ukon hilway—kag tanan ginpainum sa isa ka Espiritu.

14Kay ang lawas indi isa ka bahin kondi madamu.

15Kon magsiling ang tiil. “Bangud nga indi ako ang kamut, ako indi iya sang lawas,” ina wala nagahimo nga sia indi iya sang lawas.

16Kag kon magsiling ang dulunggan, “Bangud nga ako indi ang mata, ako indi iya sang lawas,” ina wala nagahimo nga sia indi iya sang lawas.

17Kon ang bug-os nga lawas mata, diin bala ang idulungug? Kon ang bug-os nga lawas dulunggan, diin bala ang isilinghut?

18Apang napahamtang sang Dios sa lawas, ang tagsatagsa sang mga bahin, sono sa iya nahamut-an.

19Kon sila tanan isa ka bahin, diin ang lawas?

20Sa karon, madamu sila nga bahin, apang isa ka lawas.

21Ang mata indi makasiling sa kamut, “Wala ako sing kinahanglan sa imo,” ukon liwat ang olo sa mga tiil, “Wala ako sing kinahanglan sa inyo.”

22Hinonoo, kinahanglan ang mga bahin sang lawas nga daw amo ang maluya pa,

23kag yadtong mga bahin sang lawas nga ginahunahuna ta nga kubus sa pagkadungganon sa ila sini ginahatag ta ang bugana pa nga dungug, kag ang aton mga bahin nga malaw-ay ginatipigan sing labi pa,

24nga wala ginakinahanglan sang aton mga bahin nga matahum. Apang ginpahamtang sang Dios ang lawas sing tingub, nga nagahatag sing bugana pa nga dungug sa kubus nga bahin,

25agud nga walay pagbinahinbahin sa lawas, kondi ang mga bahin magkabalaka ang isa tungud sa isa.

26Kon ang isa ka bahin nagaantus, ang tanan nga bahin nagaantus upud sa iya; kon ang isa ka bahin ginapadunggan, ang tanan nga bahin nagakalipay upud sa iya.

27Karon kamo amo ang lawas ni Cristo kag ang tagsatagsa mga bahin sa iya.

28Kag ginbutang sang Dios sa iglesia ang nahauna mga pinadala, ang ikaduha mga manalagna, ang ikatlo mga manunudlo, ugaling ang mga manugbuhat sang kalatingalahan, ugaling ang mga manugpang-ayo, mga manugtabang, mga manugmando, mga manughambal sa nagakalainlain nga dila.

29Mga pinadala bala ang tanan? Mga manalagna bala ang tanan? Mga manunudlo bala ang tanan? Mga manugbuhat sing kalatingalahan bala ang tanan?

30May mga hiyas bala ang tanan sa pagpang-ayo? Nagahambal bala ang tanan sa dila? Nagapatpat bala ang tanan?

31Apang handuma ninyo sing hanuut ang dalagku pa nga mga hiyas. Kag magapahayag ako sa inyo sing labing maayo nga paagi.

← Chapter 11 Jump to: Chapter 13 →