1 Corinthians 8

Ilonggo (Ang Biblia (1982))

← Chapter 7 Jump to: Chapter 9 →

1Karon nahanungud sa mga kalan-on nga nahalad sa mga diosdios: nakahibalo kita nga “kita tanan may pagkilala.” “Ang pagkilala” nagapahabok, apang ang gugma nagapalig-on.

2Kon ang bisan sin-o nagahunahuna nga nakahibalo sia sing bisan ano, wala pa niya mahibaloi subong nga dapat mahibaloan niya.

3Apang kon ang bisan sin-o nagahigugma sa Dios, sia ginakilala niya.

4Busa, nahanungud sa pagkaon sang kalan-on nga nahalad sa mga diosdios, nakahibalo kita nga “walay pulus ang mga diosdios,” kag nga “walay Dios kondi isa.”

5Kay bisan may mga ginatawag nga mga dios sa langit ukon sa duta—subong nga may madamu nga “dios” kag madamu nga “ginoo”—

6apang sa aton may isa ka Dios, ang Amay, nga sa iya nagikan ang tanan nga butang kag nga sa iya kita nagakabuhi kag isa ka Ginoo, si Jesu-Cristo, nga paagi sa iya nangin-amo ang tanan nga butang kag paagi sa iya kita nagakabuhi.

7Apang, ina nga pagkilala wala sa tanan nga tawo. Apang ang iban, nga naanad sa mga diosdios tubtub karon, nagakaon sang kalan-on subong nga butang nga nahalad sa diosdios; kag ang ila kaisipan, nga maluya, ginadagtaan.

8Ang pagkaon indi makapahamuut sa aton sa Dios. Kon indi kita magkaon indi kita maglain, kag kon kita magkaon indi kita magmaayo pa.

9Lamang mag-andam basi kon sa bisan anong bagay ining kahilwayan ninyo manginkasandaran sa mga maluya.

10Kay kon ang tawo makakita sa imo, nga may pagkilala, nga nagalingkod sa pagkaon sa templo sang diosdios, kon maluya ang iya kaisipan, indi bala maglig-on sia sa pagkaon sang mga kalan-on nga nahalad sa mga diosdios?

11Kag gani tungud sa imo pagkilala sia nga maluya nagakawala, ang utud nga tungud sa iya si Cristo napatay.

12Sa amo, sa pagpakasala batok sa mga kauturan kag sa pagpilas sang ila maluya nga kaisipan, nagapakasala kamo batok kay Cristo.

13Busa, kon ang kalan-on nagapasandad sang akon utud, indi ako magkaon sing unud tubtub sa gihapon, agud nga indi ko mapasandad ang akon utud.

← Chapter 7 Jump to: Chapter 9 →