1 Kings 1 — Ilonggo (Ang Biblia (1982))

1Karon si Hari David tigulang na kag sobol sa panuigon; kag ginkunupan nila sia sing mga panapton, apang wala sia sing kainit.

2Busa nagsiling sa iya ang iya mga alagad, “Pangitaan ang akon ginoong hari sing pamatan-on nga ulay, kag mag-atubang sia sa hari, kag mag-atipan sa iya; magtolog sia sa imo sabak, agud nga ang akon ginoong hari mainitan.”

3Gani nagpangita sila sing maayoayong dalaga sa bug-os nga ginsakpan sang Israel, kag nakita si Abisag nga Sunamnon, kag gindala sia sa hari.

4Ang dalaga tama gid kaayoayo; kag nag-atipan sia sa hari kag nag-alagad sa iya; apang ang hari wala maghiusa sa iya.

5Karon si Adonias nga anak ni Haguit nagpakataas sang iya kaugalingon, nga nagasiling, “Ako magahari”; kag nag-aman sia sing mga kangga kag mga manugkabayo, kag kalim-an ka lalaki nga magadalagan sa una niya.

6Ang iya amay wala nga mas-a magpasubu sa iya sa bisan anong tion sa pagsiling, “Ngaa bala nga naghimo ka sing subong?” Sia man maayoayo gid nga lalaki; kag natawo sia madason kay Absalom.

7Nakigsapul sia kay Joab nga anak ni Sarvia kag kay Abiatar nga sacerdote; kag sila nga nagasonod kay Adonias nagbulig sa iya.

8Apang si Sadoc nga sacerdote, kag si Benaya nga anak ni Joiada, kag si Natan nga manalagna, kag si Simei, kag si Rei, kag ang gamhanan nga mga lalaki ni David wala mag-upud kay Adonias.

9Si Adonias nag-ihaw sing mga carnero, mga baka, kag mga pinatambok sa luyo sang Bato sang Zohelet, nga yara sa luyo sang En-rogel, kag gin-agda niya ang tanan niyang utud, ang lalaki nga mga anak sang hari, kag ang tanan nga lalaki sang Juda, ang mga alagad sang hari,

10apang wala niya pag-agdaha si Natan nga manalagna ukon si Benaya ukon ang gamhanan nga mga lalaki ukon si Salomon nga iya utud.

11Niyan si Natan nagpamolong kay Bat-seba nga iloy ni Salomon, “Wala ka bala makabati nga nagahari si Adonias nga anak ni Haguit kag wala makahibalo sini si David nga aton ginoo?”

12Busa kari ka karon, tuguti ako nga maghatag sa imo sing laygay, agud nga maluwas mo ang imo kaugalingon nga kabuhi kag ang kabuhi sang imo anak nga si Salomon.

13Lakat ka kag magkadto kay Hari David, kag isiling sa iya, ‘O hari nga akon ginoo, wala ka bala magsumpa sa imo ulipon nga babayi, nga nagasiling, “Si Salomon nga imo anak magahari madason sa akon, kag sia magalingkod sa akon trono”? Ngaa bala niyan nga nagahari si Adonias?’

14Niyan samtang nagapamolong ka pa didto sa hari, ako man magasulud sa olihi mo kag magapalig-on sang imo mga polong.”

15Gani si Bat-seba nagkadto sa hari sa sulud sang hulut (karon ang hari tama na gid ka tigulang, kag si Abisag nga Sunamnon nagaalagad sa hari).

16Si Bat-seba nagduko kag nagyaub sa hari, kag ang hari nagsiling, “Ano bala ang buut mo?”

17Sia nagsiling sa iya, “Ginoo ko, ikaw nagsumpa sa imo ulipon nga babayi sa Ginoo nga imo Dios, nga nagasiling, ‘Si Salomon nga imo anak magahari madason sa akon, kag sia magalingkod sa akon trono.’

18Kag karon, yari karon, si Adonias nagahari, bisan ikaw, ginoo kong hari, wala makahibalo sini.

19Nag-ihaw sia sing mga baka, mga pinatambok, kag bugana nga mga carnero, kag nag-agda sang tanan nga anak sang hari, kay Abiatar nga sacerdote, kag kay Joab nga pangolo sang kasoldadosan; apang si Salomon nga imo alagad wala niya pag-agdaha.

20Kag karon, ginoo kong hari, ang mga mata sang bug-os nga Israel yara sa imo, agud nga sugiran mo sila sang magalingkod sa trono sang akon ginoong hari madason sa iya.

21Sa isa ka bagay mahanabu, kon ang akon ginoong hari magtolog upud sa iya mga ginikanan, nga ako kag ang akon anak nga si Salomon kabigon nga mga makasasala.”

22Sang nagpakighambal pa sia sa hari, si Natan nga manalagna nagsulud.

23Kag ginsugid nila sa hari, “Yari si Natan nga manalagna.” Kag sang nagsulud sia sa atubang sang hari, nagyaub sia nga nagahapa sa duta sa atubang sang hari.

24Kag si Natan nagsiling, “Ginoo kong hari, nagsiling ka bala, ‘Si Adonias magahari madason sa akon, kag sia magalingkod sa akon trono’?

25Kay nagdulhog sia sining adlaw, kag nag-ihaw sing mga baka, mga pinatambok, kag mga carnero sa kabuganaan, kag gin-agda niya ang tanan nga anak sang hari, ang mga pangolo sang kasoldadosan, kag si Abiatar nga sacerdote; kag yari karon, nagakinaon kag nagainum sila sa atubang niya, kag nagasiling, ‘Mabuhi si Hari Adonias!’

26Apang ako, nga imo alagad, kag si Sadoc nga sacerdote, kag si Benaya nga anak ni Joiada, kag si Salomon nga imo alagad, wala niya pag-agdaha.

27Ginhimo bala ining butang sang akon ginoong hari kag wala mo mapahayag sa imo mga alagad kon sin-o ang maglingkod sa trono sang akon ginoong hari madason sa iya?”

28Niyan si Hari David nagsabat, “Itawag ako kay Bat-seba.” Gani sia nagkadto sa atubang sang hari, kag nagtindug sa atubang sang hari.

29Kag ang hari nagsumpa, kag nagsiling, “Sa nagakabuhi ang Ginoo, nga nagtubus sang akon kalag sa tanan nga kalisdanan,

30sono sa ginsumpa ko sa imo sa Ginoo, ang Dios sang Israel, nga nagasiling, ‘Ang imo anak nga si Salomon magahari madason sa akon, kag sia magalingkod sa akon trono nga tal-us sa akon’; sa pagkamatuud amo ini ang himoon ko sining adlaw.”

31Niyan si Bat-seba naghapa sa duta, kag nagyaub sa hari, kag nagsiling, “Magkabuhi sa gihapon ang akon ginoong Hari David!”

32Si Hari David nagsiling, “Itawag ako kay Sadoc nga sacerdote, kay Natan nga manalagna, kag kay Benaya nga anak ni Joiada.” Gani nag-abut sila sa atubangan sang hari.

33Kag ang hari nagsiling sa ila, “Dalha upud sa inyo ang mga alagad sang inyo ginoo, kag pasakya si Salomon nga akon anak sa akon mula, kag padulhoga sia pakadto sa Gihon;

34kag didto ipahaplas sia nga hari sa Israel kay Sadoc nga sacerdote kag kay Natan nga manalagna; niyan patonoga ninyo ang budyong, kag isiling, ‘Mabuhi si Hari Salomon!’

35Niyan magtaklad kamo sa olihi niya, kag magaabut sia kag magalingkod sa akon trono; kay magahari sia nga tal-us nakon; kag gintangdo ko sia nga manginmanugdumala sang Israel kag sa ibabaw sang Juda.”

36Kag si Benaya nga anak ni Joiada nagsabat sa hari, “Kabay pa! Ang Ginoo, ang Dios sang akon ginoong hari, nagasiling sing subong.

37Subong nga ang Ginoo nag-upud sa akon ginoong hari, amo man mag-upud sia kay Salomon, kag magpadaku pa sang iya trono sang sa trono ni Hari David nga akon ginoo.”

38Gani si Sadoc nga sacerdote, kag si Natan nga manalagna, kag si Benaya nga anak ni Joiada, kag ang mga Keretnon kag ang mga Peletnon, nagdulhog kag ginpasakay si Salomon sa mula ni Hari David, kag gindala sia sa Gihon.

39Didto si Sadoc nga sacerdote nagkuha sang isa ka sungay nga lana gikan sa Layanglayang, kag ginhaplas si Salomon. Niyan ginpatonog nila ang budyong; kag ang bug-os nga katawohan nagsiling, “Mabuhi si Hari Salomon!”

40Kag ang bug-os nga katawohan nagtaklad sa olihi niya, nga nagapatonog sing mga lantoy, kag nagakasadya sa dakung kalipay, sa bagay nga ang duta naglitik sa kagahud nila.

41Si Adonias kag ang tanan nga inagda upud sa iya nakabati sang naghingapus sila sa pagkaon. Kag sang pagkabati ni Joab sang tonog sang budyong, nagsiling sia, “Ngaa bala ini nga kagahud sang banwa may sininggit?”

42Sang nagapamolong pa sia, yari karon, si Jonatan nga anak ni Abiatar nga sacerdote nag-abut; kag nagsiling si Adonias, “Sulud ka, kay ikaw tawo nga takus kag nagadala sing maayo nga mga balita.”

43Si Jonatan nagsabat kay Adonias, “Indi, kay ang aton ginoong Hari David naghimo nga hari kay Salomon;

44kag ang hari nagpadala upud sa iya kay Sadoc nga sacerdote, kay Natan nga manalagna, kag kay Benaya nga anak ni Joiada, kag sang mga Keretnon kag sang mga Peletnon; kag ginpasakay nila sia sa mula sang hari;

45kag si Sadoc nga sacerdote kag si Natan nga manalagna naghaplas sa iya nga hari sa Gihon; kag gikan didto nagtaklad sila nga nagakasadya, sa bagay nga ang banwa nagtonog liwat. Ini amo ang kagahud nga inyo nabatian.

46Si Salomon man nagalingkod sa trono sang ginharian.

47Labut pa ang mga alagad sang hari nag-abut sa pagkamaayo sang aton ginoong Hari David, nga nagasiling, ‘Ang imo Dios maghimo sang ngalan ni Salomon nga maayo pa sa imo ngalan, kag magpadaku sang iya trono labi pa sa imo trono.’ Kag ang hari nagdunguk sa iya higdaan.

48Kag ang hari nagpamolong man, ‘Pakamaayohon ang Ginoo, ang Dios sang Israel, nga naghatag sining adlaw sing isa nga maglingkod sa akon trono, nga ang akon mga mata nagatan-aw gid sini.’”

49Niyan ang tanan nga inagda ni Adonias hinadlukan, kag nagtindug, kag ang tagsa ka tawo nagkadto sa iya dalanon.

50Kag si Adonias nahadluk bangud kay Salomon; kag nagtindug sia, kag naglakat, kag nagkapyut sa mga sungay sang halaran.

51Kag ginsugid ini kay Salomon, “Yari karon, si Adonias nagakahadluk kay Hari Salomon; kay, yari karon, nagkapyut sia sa mga sungay sang halaran, nga nagasiling, ‘Pasumpaa anay sa akon si Hari Salomon nga indi niya pagpatyon sa espada ang iya alagad.’”

52Kag si Salomon nagsiling, “Kon magpakita sia sang iya kaugalingon nga tawo nga takus, wala sing isa ka bohok niya nga maholog sa duta; apang kon makita ang pagkamalaut sa iya, mapatay sia.”

53Gani si Hari Salomon nagpadala, kag ginpapanaug nila sia gikan sa halaran. Kag nag-abut sia kag nagyaub kay Hari Salomon; kag si Salomon nagsiling sa iya, “Pauli ka sa imo balay.”