1 Kings 12

Ilonggo (Ang Biblia (1982))

← Chapter 11 Jump to: Chapter 13 →

1Si Roboam nagkadto sa Siquem, kay ang bug-os nga Israel nagkadto sa Siquem sa paghimo sa iya nga hari.

2Kag sang pagkabati sini ni Jeroboam nga anak ni Nabat (kay didto pa sia sa Egipto, diin nagpalagyo sia gikan sa atubangan ni Hari Salomon), niyan nagpuyo si Jeroboam sa Egipto.

3Kag nagpadala sila kag gintawag sia; kag si Jeroboam kag ang bug-os nga katilingban sang Israel nag-abut kag nagpamolong kay Roboam,

4“Ang imo amay nagpabug-at sang amon gota. Busa karon pamag-ana ang mapiot nga pag-alagdan sang imo amay kag ang mabug-at nga gota nga ginbutang niya sa amon, kag magaalagad kami sa imo.”

5Nagsiling sia sa ila, “Taliwan kamo anay sa tatlo ka adlaw, ugaling balik kamo sa akon.” Gani ang katawohan nagtaliwan.

6Niyan si Hari Roboam nagpakigsapul sa mga tigulang nga lalaki, nga nagtindug sa atubangan ni Salomon nga iya amay sang buhi pa sia, nga nagasiling, “Ano bala ang laygay ninyo sa akon nga isabat sa sining katawohan?”

7Kag nagpamolong sila sa iya, “Kon ikaw mangin-alagad sining katawohan sining adlaw kag mag-alagad sa ila, kag magsabat sa ila kag magpamolong sing maayong mga polong sa ila, niyan sila mangin-imo alagad sa gihapon.”

8Apang ginbayaan niya ang laygay nga ginhatag sa iya sang mga tigulang, kag nagpakigsapul sa mga pamatan-on nga lalaki nga nagtubo upud sa iya nga nagtindug sa atubangan niya.

9Kag nagsiling sia sa ila, “Ano bala ang laygay ninyo nga isabat naton sa sining katawohan nga nagpamolong sa akon, ‘Pamag-ana ang gota nga ginbutang sang imo amay sa amon’?”

10Kag ang mga pamatan-on nga nagtubo upud sa iya nagpamolong sa iya, “Amo ini ang isiling mo sa sining katawohan nga nagpamolong sa imo, ‘Ang imo amay nagpabug-at sang amon gota, apang ikaw magpamag-an sini sa amon’; amo ini ang ipamolong mo sa ila, ‘Ang akon kamalingking madamul pa sa mga balikawang sang akon amay.

11Kag karon, bisan nga ang akon amay naglulan sa inyo sing mabug-at nga gota, ako magadugang sa inyo gota. Ang akon amay nagsilot sa inyo sa mga putik, apang ako magasilot sa inyo sa mga iwiiwi.’”

12Gani sa ikatlo nga adlaw si Jeroboam kag ang bug-os nga katawohan nag-abut kay Roboam, sono sa pangabay sang hari, “Balik kamo sa akon sa ikatlo nga adlaw.”

13Kag ang hari nagsabat sing matigdas sa katawohan, kag sang nagabiya sang laygay nga ginhatag sa iya sang mga tigulang,

14nagpamolong sia sa ila sono sa laygay sang mga pamatan-on, nga nagasiling, “Ang akon amay nagpabug-at sang inyo gota, apang ako magadugang sa inyo gota; ang akon amay nagsilot sa inyo sing mga putik, apang ako magasilot sa inyo sa mga iwiiwi.”

15Gani ang hari wala magpamati sa katawohan; kay butang ini nga nagikan sa Ginoo agud nga mapalig-on niya ang iya polong, nga ginpamolong sang Ginoo paagi kay Ahias nga Silonhon kay Jeroboam nga anak ni Nabat.

16Kag sang nakita sang bug-os nga Israel nga ang hari wala magpamati sa ila, ang katawohan nagsabat sa hari, “Ano bala ang bahin namon kay David? Wala kami sing panublion sa anak ni Jesse. Kadto sa inyo mga layanglayang, O Israel! Karon tatapa ang imo kaugalingon nga balay, David.” Gani ang Israel nagtaliwan sa ila mga layanglayang.

17Apang nahanungud sang katawohan sang Israel nga nagpuyo sa mga banwa sa Juda si Roboam naghari sa ila.

18Niyan ginpadala ni Hari Roboam si Adoram, nga nagdumala sang mga tawo sa takay sa pigus nga pangabudlay, kag ginbato sia nga napatay sang bug-os nga Israel. Kag si Hari Roboam nagdalidali sa pagsaka sa iya kangga, sa pagpalagyo pakadto sa Jerusalem.

19Gani ang Israel nagribok batok sa balay ni David tubtub sini nga adlaw.

20Kag sang pagkabati sang bug-os nga Israel nga si Jeroboam nakabalik na, nagpadala sila kag gintawag sia pakadto sa katilingban kag ginhimo sia nga hari sa ibabaw sang bug-os nga Israel. Wala gid sing nagsonod sa balay ni David, kondi ang kabikahan ni Juda lamang.

21Sang nag-abut si Roboam sa Jerusalem, ginpatipon niya ang bug-os nga panimalay sang Juda, kag ang kabikahan sang Benjamin, isa ka gatus kag kawaloan ka libo ka lalaki nga pinili nga mga hangaway, sa pagpakig-away sa panimalay sang Israel, sa pagpabalik sang ginharian kay Roboam nga anak ni Salomon.

22Apang ang polong sang Dios nag-abut kay Semaya nga tawo sang Dios:

23“Ipamolong kay Roboam nga anak ni Salomon, hari sang Juda, kag sa bug-os nga panimalay sang Juda kag sang Benjamin, kag sa nabilin nga katawohan,

24‘Amo ining ginasiling sang Ginoo, Dili kamo magtaklad ukon magpakig-away sa inyo mga utud nga katawohan sang Israel. Magpauli ang tagsa ka tawo sa iya balay, kay ining butang gikan sa akon.’” Gani sila nagpamati sa polong sang Ginoo, kag nagpauli kag nagkadto sa ila dalanon, sono sa polong sang Ginoo.

25Niyan ginpatindug ni Jeroboam ang Siquem sa kabakoloran sang Efraim, kag nagpuyo didto; kag naggowa sia didto kag ginpatindug ang Penuel.

26Kag si Jeroboam nagsiling sa iya tagiposoon, “Karon magabalik ang ginharian sa panimalay ni David;

27kon ining katawohan magtaklad sa pagdolot sing mga halad sa balay sang Ginoo sa Jerusalem, niyan ang tagiposoon sining katawohan magaliso sa ila ginoo, bisan kay Roboam nga hari sang Juda, kag patyon nila ako kag magabalik kay Roboam nga hari sang Juda.”

28Gani ang hari nagpakigsapul, kag naghimo sia sing duha ka tinday nga baka nga bulawan. Kag nagsiling sia sa ila, “Tama na sa inyo nga magtaklad sa Jerusalem. Yari karon ang imo mga dios, O Israel, nga nagpataklad sa imo gikan sa duta sang Egipto. ”

29Kag ginbutang niya ang isa sa Bet-el, kag ang isa ginbutang niya sa Dan.

30Kag ining butang nanginsala, kay ang katawohan nagkadto sa pagsimba sa atubangan sang isa bisan sa Dan.

31Naghimo sia sing mga balay sa mataas nga mga duug, kag naghimo sing mga sacerdote gikan sa bug-os nga katawohan, nga indi gikan sa mga anak ni Levi.

32Kag si Jeroboam nagtangdo sing piesta sa bulan nga ikawalo sa ikapulog lima nga adlaw sang bulan kaangay sang piesta nga yadto sa Juda, kag nagsaka sia sa halaran; subong sini ang ginhimo niya sa Bet-el, nga nagahalad sa mga tinday nga baka nga iya nahimo. Kag ginbutang niya sa Bet-el ang mga sacerdote sang mataas nga mga duug nga iya nabuhat.

33Nagsaka sia sa halaran nga iya ginhimo sa Bet-el sa ikapulog lima nga adlaw sang bulan nga ikawalo, bisan sa bulan nga iya ginpahito sa iya kaugalingon nga tagiposoon; kag nagtangdo sia sing piesta sa katawohan sang Israel, kag nagsaka sa halaran sa pagsonog sing incienso.

← Chapter 11 Jump to: Chapter 13 →