1 Kings 19

Ilonggo (Ang Biblia (1982))

← Chapter 18 Jump to: Chapter 20 →

1Si Acab nagsugid kay Jezabel sang tanan nga nahimo ni Elias, kag kon paano nga ginpamatay niya sa espada ang tanan nga manalagna.

2Niyan nagpadala si Jezabel kay Elias sing manugbalita, nga nagasiling, “Maghimo sa akon sing subong sini ang mga dios, kag labi pa man, kon indi ko mahimo ang imo kabuhi subong sang kabuhi sang isa sa ila buwas sa mga amo ining tion.”

3Niyan sang nakita niya ini, nagtindug sia, kag naglakat tungud sang iya kabuhi, kag nag-abut sa Beer-seba, nga sakup sang Juda, kag ginbilin didto ang iya alagad.

4Apang sia iya nagkadto sa kamingawan sing isa ka adlaw nga lalakton, kag nag-abut kag naglingkod sa idalum sang kahoy nga enebro; kag nagpangabay sia nga sa iya kaugalingon nga mapatay sia, kag nagsiling, “Tuman na; karon, O Ginoo, kuhaa ang akon kabuhi; kay indi ako maayo pa sa akon mga ginikanan.”

5Kag naghigda sia kag nagtolog sa idalum sang kahoy nga enebro; kag yari karon, isa ka manugtunda nagtandug sa iya, kag nagsiling sa iya, “Bangon ka kag magkaon.”

6Kag nagtolok sia, kag yari karon, sa iya olohan may nabibingka nga kalan-onon sa ibabaw sang mga bato nga nabaga kag isa ka tibud nga tubig. Kag nagkaon sia kag nag-inum, kag naghigda liwat.

7Kag ang manugtunda sang Ginoo nagbalik sa ikaduha, kag nagtandug sa iya, kag nagsiling, “Bangon ka kag magkaon, bangud nga ang lalakton tama pa kalawig sa imo.”

8Kag nagbangon sia, kag nagkaon kag nag-inum, kag naglakat sa kusug sadtong pagkaon sing kap-atan ka adlaw kag kap-atan ka gab-i tubtub sa Horeb nga bukid sang Dios.

9Kag didto nag-abut sia sa lungib, kag nagdayon didto; kag yari karon, ang polong sang Ginoo nag-abut sa iya, kag nagsiling sia sa iya, “Ano bala ang ginahimo mo diri, Elias?”

10Nagsiling sia, “Naimon gid ako nga sa Ginoo, ang Dios sang mga kasoldadosan; kay ang katawohan sang Israel nagbiya sang imo katipan, nagwasak sang imo mga halaran, kag nagpatay sa espada sang imo mga manalagna; kag ako, ako gid lamang, ang nabilin; kag ginatinguhaan nila ang akon kabuhi, sa pagkuha sini. ”

11Kag nagsiling siya, “Gowa ka, kag magtindug sa bukid sa atubangan sang Ginoo.” Kag yari karon, ang Ginoo nag-agi kag ang daku kag mabaskug nga hangin nagpalitik sang mga bukid, kag nagpugday sang mga igang sa atubangan sang Ginoo, apang ang Ginoo wala sa hangin; kag madason sa hangin ang linog, apang ang Ginoo wala sa linog;

12kag madason sa linog ang kalayo, apang ang Ginoo wala sa kalayo; kag madason sa kalayo isa ka tingug nga mahinay.

13Kag sang nabatian ini ni Elias, gintabonan niya ang iya nawung sang iya kunup kag naggowa kag nagtindug sa salamputan sang lungib. Kag yari karon, may nag-abut nga tingug sa iya, kag nagsiling, “Ano bala ang ginahimo mo diri, Elias?”

14Nagsabat sia, “Naimon gid ako nga sa Ginoo, ang Dios sang mga kasoldadosan; kay ang katawohan sang Israel nagbiya sang imo katipan, nagwasak sang imo mga halaran, kag nagpatay sa espada sang imo manalagna; kag ako, ako gid lamang, ang nabilin; kag ginatinguhaan nila ang akon kabuhi, sa pagkuha sini.”

15Kag ang Ginoo nagsiling sa iya, “Lakat, balik sa imo dalanon pakadto sa kamingawan sang Damasco; kag kon mag-abut ka, haplason mo si Hazael nga manginhari sa Siria;

16kag si Jehu nga anak ni Nimsi haplason mo nga hari sa Israel; kag si Eliseo nga anak ni Safat sang Abel-mehola haplason mo nga manalagna nga tal-us nimo.

17Kag ang makapalagyo sa espada ni Hazael patyon ni Jehu; kag ang makapalagyo sa espada ni Jehu patyon ni Eliseo.

18Apang ibilin ko sa Israel ang pito ka libo, ang tanan nga tuhud nga wala magluhud kay Baal, kag ang tagsa ka baba nga wala maghaluk sa iya.”

19Gani nagtaliwan sia didto, kag nakita si Eliseo nga anak ni Safat, nga nagaarado, nga may napulo kag duha ka pares nga baka sa una niya, kag sia upud sa ikapulog duha. Si Elias naglabay sa iya kag gintaklap ni Elias ang iya kunup kay Eliseo.

20Kag ginbayaan niya ang mga baka, kag naglagas kay Elias, kag nagsiling, “Pahaluka ako anay sa akon amay kag sa akon iloy, kag ugaling magasonod ako sa imo.” Kag sia nagsiling sa iya, “Balik ka; kay ano bala ang nahimo ko sa imo?”

21Kag nagbalik sia gikan sa pagsonod sa iya, kag nagkuha sang isa ka pares nga baka, kag gin-ihaw sila, kag ginloto ang unud nila sang mga gamit sang mga baka, kag ginhatag sa mga tawo, kag nagkaon sila. Niyan nagtindug sia kag nagsonod kay Elias, kag nag-alagad sa iya.

← Chapter 18 Jump to: Chapter 20 →