1 Kings 16

Ilonggo (Ang Biblia (1982))

← Chapter 15 Jump to: Chapter 17 →

1Kag ang polong sang Ginoo nag-abut kay Jehu nga anak ni Hanani batok kay Baasa, nga nagasiling,

2“Sa bagay nga ginbayaw ko ikaw gikan sa yab-ok kag ginhimo ikaw nga principe sa akon katawohan nga Israel, kag ikaw naglakat sa dalanon ni Jeroboam, kag ginpapakasala mo ang akon katawohan nga Israel, sa pagpaakig sa akon tungud sang ila mga sala,

3yari karon, silhigon ko sing bug-os si Baasa kag ang iya panimalay, kag himoon ko ang imo panimalay kaangay sang panimalay ni Jeroboam nga anak ni Nabat.

4Ang mapatay kay Baasa sa banwa kaonon sang mga ido; kag ang mapatay sa iya sa latagon kaonon sang kapispisan sang kalangitan.”

5Karon ang nabilin nga mga binuhatan ni Baasa, kag ang iya ginhimo, kag ang iya kagamhanan, wala bala sila masulat sa Tolon-an sang mga Maragtas sang mga Hari sang Israel?

6Kag si Baasa nagtolog upud sa iya mga ginikanan, kag ginlubung sa Tirsa; kag naghari nga tal-us niya si Ela nga iya anak nga lalaki.

7Labut pa ang polong sang Ginoo nag-abut kay Jehu nga manalagna nga anak ni Hanani batok kay Baasa kag batok sa iya panimalay, bangud sang tanan nga kalautan nga iya ginhimo sa itololok sang Ginoo, sa pagpaakig sa iya sa mga binuhatan sang iya mga kamut, nga nanginkaangay sang panimalay ni Jeroboam, kag bangud nga ginpatay niya sia.

8Sa ikaduha ka pulo kag anum nga tuig ni Asa nga hari sang Juda, nagsugud sa paghari si Ela nga anak ni Baasa sa Israel sa Tirsa, kag naghari sing duha ka tuig.

9Apang ang iya alagad nga si Zimri, pangolo sang katunga sang iya mga kangga, nagpuhon batok sa iya. Sang didto sia sa Tirsa, nga nagainum sa iya kahulugbon sa balay ni Arsa, nga tulugyanan sang panimalay sa Tirsa,

10si Zimri nagsulud kag naglabo sa iya kag nagpatay sa iya, sa ikaduha ka pulo kag pito nga tuig ni Asa nga hari sang Juda, kag naghari nga tal-us niya.

11Sang nagsugud sia sa paghari, sa gilayon nga nakalingkod sia sa iya trono, ginpapas niya ang bug-os nga panimalay ni Baasa; wala niya sia pagbilini sing bisan isa ka bata nga lalaki sang iya mga himata ukon sang iya mga abyan.

12Sa sini ginlaglag ni Zimri ang bug-os nga panimalay ni Baasa, sono sa polong sang Ginoo, nga iya ginpamolong batok kay Baasa paagi kay Jehu nga manalagna,

13tungud sang tanan nga sala ni Baasa kag sang mga sala ni Ela nga iya anak nga ginpakasala nila, kag sa ila ginpapakasala nila ang Israel, sa pagpaakig sa Ginoong Dios sang Israel sa ila mga kadayawan.

14Karon ang nabilin nga mga binuhatan ni Ela, kag ang tanan nga iya ginhimo, wala bala sila masulat sa Tolon-an sang mga Maragtas sang mga Hari sang Israel?

15Sa ikaduha ka pulo kag pito nga tuig ni Asa nga hari sang Juda naghari si Zimri sing pito ka adlaw sa Tirsa. Karon ang katawohan nagpahamtang sing dologan batok sa Gibeton, nga iya sang mga Filistinhon,

16kag ang katawohan nga yara sa dologan nakabati nga ginasiling, “Si Zimri nagpuhon, kag nagpatay man sang hari”; busa ang bug-os nga Israel naghimo kay Omri, ang pangolo sang kasoldadosan, nga hari sa ibabaw sang Israel sadtong adlaw sa dologan.

17Gani si Omri kag ang bug-os nga Israel upud sa iya nagtaklad gikan sa Gibeton, kag ginkibon nila ang Tirsa.

18Kag sang nakita ni Zimri nga naagaw na ang banwa, nagsulud sia sa castilyo sang balay sang hari, kag gintutdan sa kalayo ang balay sang hari sa ibabaw niya, kag napatay,

19bangud sang iya mga sala nga ginpakasala niya, sa paghimo sang malaut sa itololok sang Ginoo, sa paglakat sa dalanon ni Jeroboam, kag sa iya sala nga ginhimo niya, sa pagpapakasala sang Israel.

20Karon ang nabilin nga mga binuhatan ni Zimri, kag ang pagluib nga iya ginpadugi, wala bala sila masulat sa Tolon-an sang mga Maragtas sang mga Hari sang Israel?

21Niyan ang katawohan sang Israel nagbahin sa duha; ang katunga sang katawohan nagsonod kay Tibni nga anak ni Ginat, sa paghimo sa iya nga hari, kag ang katunga nagsonod kay Omri.

22Apang ang katawohan nga nagsonod kay Omri naglandas batok sa katawohan nga nagsonod kay Tibni nga anak ni Ginat; gani si Tibni napatay, kag si Omri naghari.

23Sa ikakatloan kag isa nga tuig ni Asa nga hari sang Juda, nagsugud sa paghari si Omri sa ibabaw sang Israel, kag naghari sing napulog duha ka tuig; sa Tirsa naghari sia sing anum ka tuig.

24Ginbakal niya kay Semer ang bakolod nga Samaria sing duha ka talanton nga pilak; kag nagpatindug sia sa ibabaw sang bakolod, kag ginhingalanan ang banwa nga iya ginpatindug, Samaria, sono sa ngalan ni Semer, ang tag-iya sang bakolod.

25Si Omri naghimo sang malaut sa itololok sang Ginoo, kag nanginmalauton sia labaw sa tanan nga una sa iya.

26Kay naglakat sia sa bug-os nga dalanon ni Jeroboam nga anak ni Nabat, kag sa iya mga sala nga sa ila ginpapakasala niya ang Israel, sa pagpaakig sa Ginoo, ang Dios sang Israel, sa ila mga kadayawan.

27Karon ang nabilin nga mga binuhatan ni Omri nga iya ginhimo, kag ang kagamhanan nga iya ginpakita, wala bala sila masulat sa Tolon-an sang mga Maragtas sang mga Hari sang Israel?

28Kag si Omri nagtolog upud sa iya mga ginikanan, kag ginlubung sa Samaria; kag naghari nga tal-us niya si Acab nga iya anak.

29Si Acab nga anak ni Omri nagsugud sa paghari sa ibabaw sang Israel, sa ikakatloan kag walo nga tuig ni Asa nga hari sang Juda, kag naghari si Acab nga anak ni Omri sa Israel sa Samaria sing duha ka pulo kag duha ka tuig.

30Kag si Acab nga anak ni Omri naghimo sang malaut sa itololok sang Ginoo labaw sa tanan nga una sa iya.

31Kag subong nga daw diotay pa nga butang sa iya ang paglakat sa mga sala ni Jeroboam nga anak ni Nabat, ginpangasawa niya si Jezabel nga babaying anak ni Etbaal nga hari sang mga Sidonhon, kag nagkadto kag nag-alagad kay Baal, kag nagsimba sa iya.

32Nagpatindug sia sing halaran kay Baal sa balay ni Baal, nga iya napatindug sa Samaria.

33Kag si Acab naghimo sang Ashera. Si Acab naghimo pa gid sing labi sa pagpaakig sa Ginoo, ang Dios sang Israel, sang sa tanan nga hari sang Israel nga una sa iya.

34Sa iya mga adlaw si Hiel nga Bet-elnon nagpatindug sang Jerico; ginpasad niya ang sadsaran sini upud sa kadulaan ni Abiram nga iya panganay, kag ginpahamtang ang iya mga gawang upud sa kadulaan sang iya anak nga kamanghuran nga si Segub, sono sa polong sang Ginoo, nga ginpamolong niya paagi kay Josue nga anak ni Nun.

← Chapter 15 Jump to: Chapter 17 →