1 Kings 15

Ilonggo (Ang Biblia (1982))

← Chapter 14 Jump to: Chapter 16 →

1Karon sa tuig nga ikanapulog walo ni Hari Jeroboam nga anak ni Nabat nagsugud sa paghari si Abiam sa ibabaw sang Juda.

2Naghari sia sa Jerusalem sing tatlo ka tuig. Ang ngalan sang iya iloy si Maaca nga anak ni Abisalom.

3Kag naglakat sia sa tanan nga sala sang iya amay nga nahimo niya sing una sa iya; kag ang iya tagiposoon indi bug-os sa Ginoo nga iya Dios, subong sang tagiposoon ni David nga iya amay.

4Wala sing sapayan tungud kay David ginhatagan sia sang Ginoo nga iya Dios sing suga sa Jerusalem, sa pagpahamtang sang iya anak nga lalaki madason sa iya, kag sa pagpalig-on sang Jerusalem;

5bangud nga si David naghimo sang matarung sa mga mata sang Ginoo, kag wala maglipas sa bisan ano nga butang nga ginsogo niya sa iya sa tanan nga adlaw sang iya kabuhi, luwas lamang sa nahanungud kay Urias nga Hethanon.

6Karon may inaway sa tunga ni Roboam kag ni Jeroboam sa tanan nga adlaw sang iya kabuhi.

7Ang nabilin nga mga binuhatan ni Abiam, kag ang tanan nga iya ginhimo, wala bala masulat sila sa Tolon-an sang mga Maragtas sang mga Hari sang Juda? Kag may inaway sa tunga ni Abiam kag ni Jeroboam.

8Kag si Abiam nagtolog upud sa iya mga ginikanan; kag ginlubung nila sia sa banwa ni David. Kag naghari nga tal-us niya si Asa nga iya anak.

9Sa ikaduha ka pulo nga tuig ni Jeroboam nga hari sang Israel nagsugud si Asa sa paghari sa ibabaw sang Juda,

10kag naghari sia sing kap-atan kag isa ka tuig sa Jerusalem. Ang ngalan sang iya iloy si Maaca nga babayi nga anak ni Abisalom.

11Kag si Asa naghimo sang matarung sa mga mata sang Ginoo subong sang ginhimo ni David nga iya amay.

12Ginsobol niya ang mga sodomanhon sa duta, kag ginkuha ang tanan nga diosdios nga nahimo sang iya mga ginikanan.

13Si Maaca man nga iya iloy ginkuha niya sa pagkahara bangud nga nakahimo sia sing kalangil-aran nga larawan nga Ashera; kag ginpulud ni Asa ang larawan niya kag ginsonog ini sa sapa nga Cedron.

14Apang ang mga duug nga mataas wala makuha. Walay sapayan ang tagiposoon ni Asa bug-os sa Ginoo sa tanan niyang adlaw.

15Kag gindala niya sa balay sang Ginoo ang mga butang nga ginhalad sang iya amay kag ang mga butang nga iya gid ginhalad, pilak, kag bulawan, kag mga suludlan.

16Kag may inaway sa tunga ni Asa kag ni Baasa nga hari sang Israel sa tanan nga adlaw nila.

17Si Baasa nga hari sang Israel nagtaklad batok sa Juda, kag nagpatindug sang Rama, agud nga indi matugutan ang bisan sin-o sa paggowa ukon sa pagsulud kay Asa nga hari sang Juda.

18Niyan ginkuha ni Asa ang tanan nga pilak kag bulawan nga nabilin sa mga bahandi sang balay sang Ginoo kag ang mga bahandi sang balay sang hari, kag gintugyan sila sa mga kamut sang iya mga alagad; kag ginpadala sila ni Hari Asa kay Ben-hadad nga anak nga lalaki ni Tabrimon, ang anak nga lalaki ni Hesion, hari sang Siria, nga nagpuyo sa Damasco, nga nagasiling,

19“Manginmay kasugtanan sa tunga nakon kag nimo, sa tunga sang akon amay kag sang imo amay: yari karon, ako nagapadala sa imo sing dolot nga pilak kag bulawan; lakat, bugtoa ang imo kasugtanan kay Baasa nga hari sang Israel, agud nga magbiya sia sa akon.”

20Kag si Ben-hadad nagpamati kay Hari Asa, kag ginpadala niya ang mga pangolo sang mga hangaway batok sa kabanwaanan sang Israel, kag gingubat ang Ijon, ang Dan, ang Abel-bet-maaca, kag ang bug-os nga Cinerat, pati ang bug-os nga duta sang Neftali.

21Kag sang pagkabati sini ni Baasa, nag-untat sia sa pagpatindug sang Rama, kag nagpuyo sa Tirsa.

22Niyan si Hari Asa nagpabantala sa bug-os nga Juda, walay nalasik, kag gindala nila ang mga bato sang Rama kag ang iya mga tablon, nga ginpatindug ni Baasa; kag sa sini si Hari Asa nagpatindug sang Geba sang Benjamin kag sang Mizpa.

23Karon ang nabilin nga mga binuhatan ni Asa, ang tanan niyang kagamhanan, kag ang tanan nga iya ginhimo, kag ang mga banwa nga iya ginpatindug, wala bala sila masulat sa Tolon-an sang mga Maragtas sang mga Hari sang Juda? Apang sa tion sang iya katigulangon nagbalatian sia sa iya mga tiil.

24Kag si Asa nagtolog upud sa iya mga ginikanan, kag ginlubung upud sa iya mga ginikanan sa banwa ni David nga iya amay; kag naghari nga tal-us niya si Josafat nga iya anak.

25Si Nadab nga anak ni Jeroboam nagsugud sa paghari sa Israel sa ikaduhang tuig ni Asa nga hari sang Juda; kag naghari sia sing duha ka tuig sa Israel.

26Ginhimo niya ang malaut sa itololok sang Ginoo, kag naglakat sa dalanon sang iya amay, kag sa iya sala nga sa sini ginpapakasala niya ang Israel.

27Si Baasa nga anak ni Ahias, sa panimalay ni Isacar, nagpuhon batok sa iya; kag ginpilas sia ni Baasa sa Gibeton, nga iya sang mga Filistinhon; kay si Nadab kag ang bug-os nga Israel nagalikup sang Gibeton.

28Gani sa ikatlong tuig ni Asa nga hari sang Juda ginpatay sia ni Baasa, kag naghari nga tal-us niya.

29Kag sa gilayon nga naghari sia, ginpapas niya ang bug-os nga panimalay ni Jeroboam; walay ginbilin sia kay Jeroboam sang bisan anong nagaginhawa, tubtub nga nalaglag niya sia, sono sa nasiling sang Ginoo nga iya ginpamolong paagi sa iya alagad nga si Ahias nga Silonhon;

30bangud sang mga sala ni Jeroboam nga ginpakasala niya kag bangud sa ila ginpapakasala niya ang Israel, kag bangud sang pagpaakig nga ginpaakig niya ang Ginoo, ang Dios sang Israel.

31Karon ang nabilin nga mga binuhatan ni Nadab, kag ang tanan nga iya ginhimo, wala bala sila masulat sa Tolon-an sang mga Maragtas sang mga Hari sang Israel?

32Kag may inaway sa tunga ni Asa kag ni Baasa nga hari sang Israel sa tanan nga adlaw nila.

33Sa ikatlong tuig ni Asa nga hari sang Juda, nagsugud sa paghari si Baasa nga anak ni Ahias sa ibabaw sang bug-os nga Israel sa Tirsa, kag naghari sing duha ka pulo kag apat ka tuig.

34Ginhimo niya ang malaut sa itololok sang Ginoo, kag naglakat sa dalanon ni Jeroboam kag sa iya sala nga sa sini ginpapakasala niya ang Israel.

← Chapter 14 Jump to: Chapter 16 →