1 Kings 5

Ilonggo (Ang Biblia (1982))

← Chapter 4 Jump to: Chapter 6 →

1Karon si Hiram nga hari sang Tiro nagpadala sang iya mga alagad kay Salomon, sang nakabati sia nga ginhaplas nila sia nga hari sa tal-us sang iya amay; kay si Hiram mahigugmaon gihapon kay David.

2Kag si Salomon nagpadala kay Hiram nga nagasiling,

3“Ikaw nakahibalo nga ang akon amay nga si David wala makapatindug sing balay sa ngalan sang Ginoo nga iya Dios tungud sang mga inaway nga naglibut sa iya sa tagsa ka luyo, tubtub nga ang Ginoo nagbutang sa ila sa idalum sang mga dapadapa sang iya mga tiil.

4Apang karon ang Ginoo nga akon Dios naghatag sa akon sing kapahuwayan sa tagsa ka luyo; walay kasumpung ukon malain nga hitabu.

5Kag gani ako nagabuko sa pagpatindug sing balay sa ngalan sang Ginoo nga akon Dios, sono sa ginpamolong sang Ginoo kay David nga akon amay, ‘Ang imo anak, nga ibutang ko sa imo trono sa tal-us nimo, sia magapatindug sing balay nga sa akon ngalan.’

6Busa karon sogo ka nga pagpudlan nila ako sing mga cedro sa Libano; kag ang akon mga alagad magaupud sa imo mga alagad, kag ako magahatag sa imo sing sohol tungud sa imo mga alagad sono sa tanan nga isiling mo; kay ikaw nakahibalo nga wala sing bisan sin-o sa amon nga makahibalo sa pagpulud sing kahoy subong sa mga Sidonhon.”

7Sang pagkabati ni Hiram sang mga polong ni Salomon, nagkalipay sia sing daku, kag nagsiling, “Pakamaayohon ang Ginoo sining adlaw, nga naghatag kay David sing anak nga maalam sa ibabaw sining katawohan nga daku.”

8Kag si Hiram nagpadala kay Salomon, nga nagasiling, “Nabatian ko ang imo balita nga ginpadala sa akon; himoon ko ang tanan nga imo luyag nahanungud sa tablon nga cedro kag nahanungud sa tablon nga abeto.

9Ang akon mga alagad magapadulhog sa ila kutub sa Libano tubtub sa dagat; kag balsahon ko sila paagi sa dagat tubtub sa duug nga itangdo mo sa akon, kag didto pahubaran ko sila, kag batonon mo sila; kag ikaw magahimo sang akon luyag sa paghatag sing kalan-on sa akon panimalay.”

10Gani si Hiram naghatag kay Salomon sing tablon nga cedro kag tablon nga abeto sono sa tanan niya nga luyag,

11samtang si Salomon naghatag kay Hiram sing duha ka pulo ka libo ka koro nga trigo nga kalan-on sang iya panimalay, kag duha ka pulo ka koro nga lana nga lunsay. Sa amo naghatag si Salomon kay Hiram tuigtuig.

12Kag ang Ginoo naghatag kay Salomon sing kaalam, sono sa iya ginsaad sa iya; kag may paghidait sa tunga ni Hiram kag ni Salomon; kag naghimo sila nga duha sing pagdampigay.

13Si Hari Salomon nagtipon sing takay sa pigus nga pagpangabudlay gikan sa bug-os nga Israel; kag ang takay katloan ka libo ka lalaki.

14Kag ginpadala niya sila sa Libano, tagpulo ka libo sa tagsa ka bulan sa bulosbulos; isa ka bulan sila sa Libano kag duha ka bulan sa balay; si Adoniram amo ang pangolo sang mga tawo nga nagapangabudlay sa takay.

15Si Salomon may kapitoan ka libo nga manugdala sang mga lulan kag kawaloan ka libo nga manugpulud sa kabukiran,

16luwas sang puno nga mga manugdumala ni Salomon sa buluhaton, tatlo ka libo kag tatlo ka gatus ang nagagahum sa mga tawo nga nagpangabudlay sa buluhaton.

17Ang hari nagsogo, kag nagkali sila sing dalagku nga mga bato, mga bato nga malahalon sa pagpasad sang sadsaran sang balay sing nabasbasan nga bato.

18Gani ang mga manugbalay ni Salomon kag ang mga manugbalay ni Hiram kag ang mga Gibalnon nagbasbas sini kag nag-aman sang tablon kag sang mga bato sa pagpatindug sang balay.

← Chapter 4 Jump to: Chapter 6 →