Joshua 17

Ilonggo (Ang Biblia (1982))

← Chapter 16 Jump to: Chapter 18 →

1Niyan amo ini ang kapalaran nga sa kabikahan ni Manases, kay panganay sia ni Jose. Nahanungud kay Maquir nga panganay ni Manases, ang amay ni Galaad, bangud nga tawo sia nga hangaway, busa iya ang Galaad kag Basan.

2Gani ang kapalaran iya sang nabilin nga kabikahan ni Manases sono sa ila mga panimalay, sa mga anak ni Abiezer, sa mga anak ni Helec, sa mga anak ni Asriel, sa mga anak ni Siquem, sa mga anak ni Hefer, kag sa mga anak ni Semida; ini sila amo ang mga kaliwatan nga lalaki ni Manases nga anak ni Jose sono sa ila mga panimalay.

3Apang si Zelofehad, anak ni Hefer, anak ni Galaad, anak ni Maquir, anak nga lalaki ni Manases, walay mga anak nga lalaki, kondi mga anak nga babayi; kag ini sila amo ang mga ngalan sang iya mga anak nga babayi: si Mala, si Noa, si Hogla, si Milca, kag si Tirza.

4Sila nagpalapit sa atubangan ni Eleazar nga sacerdote kag sa atubangan ni Josue nga anak ni Nun kag sa atubangan sang mga principe, kag nagsiling, “Ang Ginoo nagsogo kay Moises nga hatagan kami sing panublion sa tunga sang amon mga utud.” Busa ginhatagan sila niya sing panublion sa tunga sang mga utud sang ila amay sono sa sogo sang Ginoo.

5Sa amo naholog kay Manases ang napulo ka bahin, luwas sang duta sang Galaad kag Basan, nga yara sa tabok sang Jordan;

6bangud nga ang mga babayi nga anak ni Manases may panublion sa tunga sang iya mga anak nga lalaki. Ang duta sang Galaad ila sang iban nga mga anak nga lalaki ni Manases.

7Ang dulunan ni Manases kutub sa Aser tubtub sa Micmetat, nga yara sa atubang sang Siquem; niyan ang dulunan nagapadayon sa too tubtub sa mga pumuluyo sang En-tapua.

8Ang duta sang Tapua iya ni Manases, apang ang Tapua nga yara sa dulunan ni Manases iya sang mga anak ni Efraim.

9Niyan nagdulhog ang dulunan padolong sa sapa sang Cana. Nayon sa bagatnan sang sapa, ini nga kabanwaanan iya ni Efraim sa tunga sa kabanwaanan ni Manases. Niyan ang dulunan ni Manases yara sa aminhan nga pangpang sang sapa kag ang mga golowaan sini sa dagat;

10ang duta nayon sa bagatnan iya ni Efraim kag ang nayon sa aminhan iya ni Manases, kag ang dagat amo ang iya dulunan; kag nagtabo sila kay Aser sa aminhan, kag kay Isacar sa sidlangan.

11Si Manases may iya sa Isacar kag sa Aser nga Bet-sean kag ang iya mga minoro, kag Ibleam kag ang iya mga minoro, kag ang mga pumuluyo sang Dor kag ang iya mga minoro, kag ang mga pumuluyo sang En-dor kag ang iya mga minoro, kag ang mga pumuluyo sang Taanac kag ang iya mga minoro, kag ang mga pumuluyo sang Meguido kag ang iya mga minoro; bisan ang tatlo ka kataasan.

12Apang ang mga anak ni Manases indi makasobol sang mga pumuluyo sadto nga kabanwaanan; apang ang mga Canaanhon buut magpuyo sadto nga duta.

13Apang sang nagbakud ang katawohan sang Israel, ginbutang nila ang mga Canaanhon sa pagpangabudlay sa takay, kag wala nga mas-a magsobol sa ila sing bug-os.

14Kag ang kabikahan ni Jose nagpamolong kay Josue, nga nagasiling, “Ngaa bala nga ginhatagan mo ako sing isa lamang ka kapalaran kag isa ka bahin nga panublion, sa ginatan-aw nga ako isa ka daku nga katawohan, sa bagay nga ang Ginoo nagpakamaayo sa akon tubtub karon?”

15Kag si Josue nagsiling sa ila, “Kon ikaw daku nga katawohan, taklad ka sa katalonan, kag maghawan nga sa imo mga kaugalingon didto sa duta sang mga Pereznon kag sang mga Refaimnon, kay ang kabakoloran ni Efraim tama kakitid nga sa imo.”

16Ang kabikahan ni Jose nagsiling, “Ang kabakoloran indi tuman sa amon; kag ang tanan nga Canaanhon nga nagapuyo sa nalupyakan may mga kangga nga salsaon, sila nga yara sa Bet-sean kag sa iya mga minoro kag sila nga yara sa Nalupyakan sang Jezreel.”

17Niyan si Josue nagpamolong sa panimalay ni Jose, kay Efraim kag kay Manases, “Ikaw daku nga katawohan, kag may daku nga gahum; dili mag-isa lamang ka kapalaran ang imo,

18kondi ang kabakoloran mangin-imo, bisan ini katalonan, hawanan mo ini kag mangin-imo ang iya mga golowaan; kay sobolon mo ang mga Canaanhon, bisan sila may kangga nga salsalon, kag bisan makusug sila.”

← Chapter 16 Jump to: Chapter 18 →